ለጥያቄ ትፈለጋለህ ተብሎ ከተወሰደ በኋላ ያለበት አልታወቀም ስለተባለዉ ጋዜጠኛ ጎበዜ ሲሳይ ጠበቃዉ ምን አሉ?ጋዜጠኛ ጎበዜ ሲሳይ ከመኖርያ ቤቱ ባሳለፍነዉ እሁድ በመንግስት አካላት ለጥያቄ ት…

ለጥያቄ ትፈለጋለህ ተብሎ ከተወሰደ በኋላ ያለበት አልታወቀም ስለተባለዉ ጋዜጠኛ ጎበዜ ሲሳይ ጠበቃዉ ምን አሉ?

ጋዜጠኛ ጎበዜ ሲሳይ ከመኖርያ ቤቱ ባሳለፍነዉ እሁድ በመንግስት አካላት ለጥያቄ ትፈለጋለህ ተብሎ ቢወሰድም እስካሁን ያለበትን ለማወወቅ አለመቻላቸውን ጠበቃው አቶ አዲሱ አልጋው ኢትዮ ኤፍ ኤም ተናግረዋል፡፡

ጋዜጠኛ ጎበዜ ሲሳይ ሚያዝያ 23/2014 ዓ.ም ጠዋት 4 ሰዓት ላይ በአዲሰ አበባ ከተማ አሰተዳደር ሀያት ባቡር ጣቢያ አካባቢ ከሚገኘው መኖሪያ ቤቱ በመንግሥት የፀጥታ ሀይሎች መወሰዱንና የት እንዳለ ማወቅ እንዳልተቻለ ጠበቃዉ ነግረዉናል፡፡

ስምንት የሚሆኑ ሲቪል የለበሱ የመንግስት አካላት ነን ብለው የመጡ ሰዎች ለጥያቄ ነው የምንፈልገው ብለው መወስዳቸውን አስታውሰው፣ የት እንደታሰረ ባላውቅም ምናልባት ፍ/ቤት ሊያቀርቡት ይችላሉ በሚል ተሰፋ ትላንት ሚያዚያ 25/2014 ጠዋት በፌዴራል የመጀመሪያ ደረጃ ፍ/ቤት አራዳ ምድብ ጊዜ ቀጠሮ ችሎት ቀርቦ ከሆነ በሚል ለማጣራት ከ3 ሰዓት አስከ 5 ሰዓት ድረስ ቆይቼ ነበር ብለዋል ጠበቃዉ፡፡

‹‹ነገር ግን አንድም መርማሪ ፖሊስ ጋዜጠኛ ጎበዜ ሲሳይን በችሎቱ አላቀረበውም›› ሲሉ የጋዜጠኛው ጠበቃ የሆኑት አቶ አዲሱ አልጋው ለኢትዮ ኤፍ ኤም ተናግረዋል፡፡

በተጨማርም ይህ አልሆን ሲል ‹‹የአዲስ አበባ ፖሊስ ኮሚሽን እና ፌደራል ፖሊስ ወንጀል ምርመራ ቢሮ ሄጄ ብጠይቅም የለም ብለውኛል›› ሲሉ ለጣቢያችን ተናግረዋል፡፡
ይህ በእንዲህ እንዳለ የስራ ባልደረቦቹ ወደ ኢትዮጵያ ሰብዓዊ መብቶች ኮሚሽን ቅሬታ ለማቅረብ መሄዳቸውን አስታውስው ያንን ተከትሎም የኢትዮጵያ ሰብዓዊ መብቶች ኮሚሸን ጉዳዩን አጣርቶ መግለጫ አውጥቷል ብለዋል፡፡

ኮሚሽኑ በበኩሉ ጋዜጠኛው ያለበትን ሁኔታ እና የታሰረበትን ቦታ ለማወቅ ጥረት ያደረገ ቢሆንም፣ መረጃ ማግኘት ባለመቻሉ የጋዜጠኛ ጎበዜ ሲሳይ ጉዳይ እንዳሳሰበው መግለፁ ይታወሳል፡፡

መንግስትም ጉዳዩን በአፅኖት ተመልክቶ ምላሽ እንዲሰጥበት ማሳሰቡን በማንሳት መንግስትም በፍጥነት ምላሽ ይሰጥበታል ብለው እንደሚምኑ አንስተዋል፡፡

የጋዜጠኛው ጠበቃ አክለውም እነዚህ አማራጮችን ተጠቅመው ጋዜጠኛ ጎበዜ ሲሳይ ያለበት ወቅታዊ ሁኔታ ካልታወቀ፣ ወደ ፍትሕ ሚኒስቴር መሄዳቸው እንደማይቀር ነገረውናል፡፡

ኢትዮ ኤፍ ኤም 107.8 የኢትዮጵያዊያን

ሚያዝያ 26 ቀን 2014 ዓ.ም

Source: Link to the Post

Leave a Reply