ሙዚቀኛ ሮፍናን ኑሪ እና ዋልያ ቢራ ለ18 ወራት የሚቆይ የአጋርነት ስምምነት ተፈራረሙ።በዚህ ጊዜ ውስጥም 10 የሙዚቃ ኮንሰርቶችን በክልል ከተሞች ለመስራት ታቅዷል።በቅርቡ “ዘጠኝ” በሚል ር…

ሙዚቀኛ ሮፍናን ኑሪ እና ዋልያ ቢራ ለ18 ወራት የሚቆይ የአጋርነት ስምምነት ተፈራረሙ።

በዚህ ጊዜ ውስጥም 10 የሙዚቃ ኮንሰርቶችን በክልል ከተሞች ለመስራት ታቅዷል።
በቅርቡ “ዘጠኝ” በሚል ርዕስ ሁለት የሙዚቃ አልበሞችን በአንድ ቀን ለአድማጮች እንደሚያቀርብ የገለፀው ሮፍናን ለዚህ አልበሙ ከዋልያ ቢራ ጋር የአጋርነት ስምምነት ተፈራርሟል።

ሮፍናን እና ዋልያ ቢራ ከዚህ በፊት “ስድስት” በተሰኘው አልበሙ ላይ የነበራቸው ጥምረት በሙዚቃ ኢንዱስትሪው ላይ ተፅዕኖ ማሳደሩ ተገልጿል።
በዚህም በክልል ከተሞች 6 ኮንሰርቶችን በማዘጋጀት ለብዙዎች የስራ ዕድል መፍጠሩ ነው የተገለጸው።

ሙዚቀኛው ከዋልያ ጋር በመተባበር በዚህ ሳምንት በሮፍናን ማስተር ክላስ ለ1መቶ50 ጀማሪ ሙዚቀኞች ልምዱን ማካፈሉም ተገልጿል።

ዋልያ ቢራ ይህንን የማስተር ክላስ ወደ ክልል ከተሞች ለመውሰድ ዝግጅት መጀመሩንም አስታውቋል።

የሁለቱ የአጋርነት ስምምነት የሙዚቃ ኮንሰርቶችን ከመስራት ባሻገር የአገርን ባህል ማጎልበት ፣ የራስ ጥበብን ማውጣት፣ የስራ ዕድል መፍጠር እና መልካም አመለካከትን መቅረፅ አላማው እንደሆነ ተገልጿል።

ሙዚቀኛው “ሀራምቤ” እና “ኖር” የተሰኙ ሁለት አልበሞችን በጋራ የያዘ “ዘጠኝ” የተሰኘ አልበም ለአድማጮች ለማቅረብ ዝግጅት መጨረሱን ከዚህ በፊት መዘገባችን ይታወሳል።

“ሀራምቤ” በህብረት ውስጥ ያለ የራስ ቀለምን አጉልቶ ማሳየት ላይ ትኩረት ያደረገ ሲሆን፤ “ኖር” የሚለው አልበም ደግሞ ለአዲስ ሀሳብ፣ ለአዲስ አልበም፣ ለአዲስ ፍልስፍና እና ለአዲስ ነገር ኖር ማለትን የሚያሳይ ነው ሲል ሙዚቀኛው ገልጿል።

አልበሞቹ በቀጣይ ሳምንት የመጀመሪያ ቀናት በአንድ ቀን የሚለቀቁ ይሆናል።
ሮፍናን እና ዋልያ ቢራ የአጋርነት ስምምነት ሲያደርጉ ይህ ለሁለተኛ ጊዜ ነው።

በእስከዳር ግርማ

ጥር 30 ቀን 2016 ዓ.ም

Source: Link to the Post

Leave a Reply