ቁጣና ሽልማት – የትናንት ኦስካር ምሽት

https://gdb.voanews.com/093e0000-0a00-0242-fbf7-08da0ff50fc0_w800_h450.jpg

የጥበብ ሥራዎች ዘጠና አራተኛ አካደሚ ሽልማቶች ምሽት በደመቀ፤ ደግሞም ብዙዎችን ባስደነገጠና ባስገረመ አጋጣሚ ትናንት ምሽት ተከናውኗል። ሁለት ዐይን ያስፈጠጡ፣ አዕምሮን የናጡ አጋጣሚዎች በአንድ የኦስካር መድረክ!

ለሁለተኛነት የተጠበቀው “ኮዳ” (መስማት የተሳናቸው አዋቆች ልጅ) ፊልም “ምርጥ ፊልም” ተብሎ ባልተጠበቀ ሁኔታ ኦስካርን ሲጎናፀፍ፤ በሌላ በኩል ገናና፣ በብዙዎች ተወዳጁ ዊል ስሚዝ ከእርሱ ባልተናነሰ ሁኔታ የሚከበረውን የመድረክ ቧልተኛና ተዋናይ ክሪስ ሮክን መድረክ ላይ ወጥቶ በጥፊ አቃጥሎታል።

“ኦ! ዋው! ዋው! ዊል ስሚዝ’ኮ በጥፊ አ..ን አበላኝ!” አለ ክሪስ ባለማመን አስተያየት አፍጥጦ አሁን የተቃጠለ ፊቱን እያሻሸ።

የዊል ስሚዝ ሚስት ጄዳ ፒንኬት ስሚዝ እራሷ ላይ ፀጉር የለም፤ ባሏ አጠገብ ተቀምጣለች።

የዛሬ 25 ዓመት ወጥቶ በነበረ ጂ.አይ. ጄን ፊልም ላይ ዋና ገፀ ባህርይ የነበረችው ጄን ባህር ኃይል ለመቀጠር ስትል ፀጉሯን ተላጭታ ነበር የቀረበችው። ፊልሙ “አድቬንቸር” የሚባል ብዙ አስደናቂና ልብ አንጠልጣይ ትዕይንቶች ያሉት ድራማ ነው።

እናም መድረኩ ላይ የነበረው ክሪስ ይቀልዳል፤ ዐይኖቹ ባጋጣሚ ጄዳ ላይ ያርፋሉ። “ጄዳ፤ እወድሻለሁ! ጂ.አይ. ጄን ሁለትን በጉጉት እጠብቃለሁ! እሺ?” ማለት!

ያኔ አጠገቧ ተቀምጦ ይስቅ የነበረው ዊል (ባሏ) ሚስቱ ዐይኖቿን እያጉረጠረጠች ባለመደሰት ስታንከባልል ያስተውላል። በቀጣዮቹ ሰከንዶች ውስጥ መደረኩ ላይ የታየው በኦስካር ታሪክ ተፈጥሮ አያውቅም።

የሆነውን ሥነ ሥርዓቱን በየዓመቱ እንደሚያደርጉት ሁሉ በቀጥታ ሲተላለፍ ይከታተሉ የነበሩ የአሜሪካ ተመልካቾች ለማየት ዕድል አላገኙም፤ የሃገር ውስጥ ጣቢያዎች በሰከንዶች ውስጥ ከአየር ላይ ሰወሩት። ከአሜሪካ ውጭ ባሉ ቻነሎች ላይ ግን ያለከልካይና አጋጅ በዓለሙ ተናኝቷልና አጭሩ ታሪክ ወዲያው ያለም ወሬ ሆነ። አሜሪካዊያኑም የራሳቸውን ታሪክ ከውጭ አግኝተውት /ወስደውት/ ይኸው እንደትንግርት እየተቀባበሉት ነው። ወሬው ሳር ቅጠሉን ሞልቶታል።

ዊል ስሚዝ የሚስቱ ዐይኖችና ቀልቡ ያዘዙትን ከፈፀመ በኋላ ተመልሶ ተቀመጠና በብዙ መረን ቃላት አጀብ፣ በጩኸትና በቁጣ “ሁለተኛ የሚስቴን ስም እንዳታነሳ!” ብሎ አስጠነቀቀው።

በርግጥ በኋላ እራሱ ዊልም የቴኒስ ንግሥቶቹን ቪነስና ሴሬና ዊልያምስን አባት ታሪክ በያዘው “ኪንግ ሪቻርድ” ፊልም ውስጥ ስለነበረው ተውኔት የምሽቱ ተሸላሚ ነበርና ያንን ለመቀበል የወጣ ጊዜ ፊቱ በእንባው እንደራሰ “አካዳሚውን ይቅርታ እጠይቃለሁ” ብሏል። ክሪስን ግን አላለም። “ክሪስ ላይ የተፈፀመው አድራጎት አግባብ አይደለም፤ ዊል ሊከሰስ ይገባዋል”  የሚሉ በጣም የተናደዱ ሰዎች አሉ። “የሎስ አንጀለስ ፖሊስ ግን እንዲህ ተደረግኩ ብሎ በዊል ላይ ዶሴ የከፈተ ወይም አቤቱታ ያሰማ” ብሏል። ክሪስ “የጁን ይስጠው!” ብሎ ትቶት ይሆን? ይህንን አልሰማንም። ቀኑን ግን “ታሪካዊ” ብሎታል፤ በርግማን ይሁን በግርምት ለጊዜው አይታወቅ እንጂ። 

በነገራችን ላይ ጄድ ባደረባት አሎፔሺያ የሚባል የጤና መስተጓጎል ምክንያት ፀጉሮቿ እንደሚረግፉ የዛሬ ሦስት ዓመት አካባቢ ተናግራ ነበር።

Source: Link to the Post

Leave a Reply