ቅዱስ ሲኖዶስ: ፕሬዝዳንት ዶናልድ ትራምፕ በሕዳሴ ግድብ ላይ የተናገሩትን ፀረ ኢትዮጵያ ንግግር ተቃወመ፤ 9፡00 ጋዜጣዊ መግለጫ ይሰጥበታል

ቅዱስ ሲኖዶስ: ፕሬዝዳንት ዶናልድ ትራምፕ በሕዳሴ ግድብ ላይ የተናገሩትን ፀረ ኢትዮጵያ ንግግር ተቃወመ፤ 9፡00 ጋዜጣዊ መግለጫ ይሰጥበታል

https://1.gravatar.com/avatar/7f09202441ad3b4b636e88820d6a7061?s=96&d=identicon&r=G
  • ሉዓላዊነትንና መብትን የሚፃረር በመኾኑ ኢትዮጵያውያን ያለልዩነት ይቃወሙታል
  • ምልአተ ጉባኤው፣ ሕገ ቤተ ክርስቲያኑን በማሻሻል አስፈላጊነት ላይ እየተወያየ ነው

***

የአሜሪካው ፕሬዝዳንት ዶናልድ ትራምፕ፣ በኢትዮጵያ ሕዳሴ ግድብ ላይ ግብጽ ርምጃ ልትወስድ እንደምትችል የተናገሩት ቃል በእጅጉ እንዳሳዘነው የገለጸው የቅዱስ ሲኖዶስ ምልአተ ጉባኤ፣ ኢትዮጵያውያን ያለልዩነት በአንድነት እንዲቃወሙትና ቀሪ ሥራውን በማጠናቀቅ የአባቶቻቸውን የአይበገሬነት ታሪክ እንዲደግሙ ጥሪ አቀረበ፡፡

የፕሬዝዳንቱ ንግግር፣ የግላቸው የራሳቸውን እንጂ የአሜሪካንን ሕዝብ ሊወክል የማይችል አሳፋሪ እና አሳዛኝ ንግግር ነው፤ በማለት ምልአተ ጉባኤው ተቃውሞታል፡፡ ኢትዮጵያውያን የዓባይን ውኃ በፍትሐዊነት ተጠቅመው ከጨለማ ለመውጣት እና ድህነትን ለመቅረፍ፣ በወዛቸው እና በድካማቸው የገነቡት ግድብ ኾኖ ሳለ፣ ግብጽ ልታፈነዳው እንደምትችል ፕሬዝዳንቱ ሓላፊነት የጎደለው ቃል መናገራቸው አሳፋሪ እንደኾነ አስታውቋል፡፡

ኢትዮጵያውያን በብዙ ነገሮች የተለያየ አመለካከት ቢኖራቸውም፣ የሉዓላዊነት እና የተጠቃሚነት መብት ጉዳይ በኾነው በሕዳሴው ግድብ ግን በአንድነት ቆመው፣ አሳፋሪውንና አሳዛኙን የፕሬዝዳንት ትራምፕ ንግግር እንዲቃወሙት አሳስቧል፡፡አገራቸውን ከውጭ ጠላት በጋራ እየተከላከሉ ሲጠብቆ የኖሩ በመኾናቸው፣ ዛሬም የሕዳሴ ግድብን ቀሪ ሥራ በጋራ በማጠናቀቅ፣ የአባቶቻቸውን የአይበገሬነት ታሪክ እንዲደግሙ ጥሪ አቅርቧል፡፡

በጉዳዩ ላይ ዛሬ ከቀትር በፊት የተወያየበት የቅዱስ ሲኖዶስ ምልአተ ጉባኤ፣ ተሲዓት 9፡00 ላይ ጋዜጣዊ መግለጫ እንደሚሰጥበት፣ የመንበረ ፓትርያርክ ጠቅላይ ቤተ ክህነት የሕዝብ ግንኙነት መመሪያ፣ በፌስቡክ ገጹ ለብዙኀን መገናኛዎች ባስተላለፈው ጥሪ አስታውቋል፡፡

በተያያዘ ዜና፣ ምልአተ ጉባኤው መደበኛ ስብሰባውን ዛሬ የቀጠለ ሲኾን፣ በጠዋቱ ውሎው፣ ሕገ ቤተ ክርስቲያኑን በማሻሻል አስፈላጊነት ላይ መወያየት ጀምሯል፡፡ ለማሻሻያ ሐሳቡ በዋና መነሻነት የተጠቀሰው፣ በሕጉ አንቀጽ 50 ንኡስ አንቀጽ አንድ ላይ፣ የዐዲስ አበባ ሀገረ ስብከት የብፁዕ ወቅዱስ ፓትርያርኩ ልዩ ሀገረ ስብከት ነው፤ በሚል የሰፈረው ድንጋጌ እንደኾነ ተጠቁሟል፡፡

በቅዱስነታቸው በኩል፣ የልዩ ሀገረ ስብከት ድንጋጌ መሻሻል እንደማያስፈልገውና ሙስና ተንሰራፍቷል፤ በአግባቡ አልተመራም፤ ይሻሻል ከተባለም፣ የሌሎች አህጉረ ስብከት አመራርንና አሠራርን አስመልክቶ መታየት የሚገባቸው ድንጋጌዎች እንዳሉ በመጥቀስ ሐሳቡን ተቃውመዋል፡፡

በአንጻሩ፣ አንቀጹ ተሻሽሎ ሀገረ ስብከቱ እንደማንኛውም ሀገረ ስብከት ራሱን ችሎ በሊቀ ጳጳስ እንዲመራ የሚከራከሩ ብፁዓን አባቶች በበኩላቸው፤ ዐዲስ አበባ፣ በስም የቅዱስነታቸው ልዩ ሀገረ ስብከት ይባል እንጂ፣ የአማሳኞች እና የብልሹዎች መነገጃ ኾኖ እየታመሰ መኾኑን ጠቅሰው ተከራክረዋል፤ ማሻሻያ የሚያስፈልጋቸው ሌሎች አናቅጽ እንዳሉ ቢያምኑም፣ ወደፊት መታየት እንደሚችሉና በብዙ ሚልዮን የሚቆጠሩ ምእመናን፣ ከ246 የላይ አጥቢያ አብያተ ክርስቲያን፣ በየጊዜው ገደብ በሌለው ኹኔታ እያበጠ የሚሔድ ከ30ሺሕ በላይ የሚገመት የሰው ኃይል፣ በርካታ ሀብት እና ንብረት ያለው የዐዲስ አበባ ሀገረ ስብከት ግን፣ ከዚኽ በላይ እየታመሰ መቀጠል እንደሌለበትና ራሱን ችሎ ሊቆጣጠረው የሚችል አባት ሊመደብለት እንደሚገባ አስተያየት ሰጥተዋል፡፡

ምልአተ ጉባኤው ከመግለጫው በኋላ በሚኖረው የቀትር በኋላ የሥራ ጊዜ፣ በየመደበኛ ስብሰባው ለሚያወዛግበው የልዩ ሀገረ ስብከት የሕገ ቤተ ክርስቲያኑ ድንጋጌ ጉዳይ፣ ለቤተ ክርስቲያን የሚበጅ ኹነኛ እልባት እንደሚያስቀምጥለት ይጠበቃል፡፡

ዐዲስ አበባ፣ የአገራችን ርእሰ ከተማ ስለኾነና ከሌሎች አህጉረ ስብከት የሚለይባቸው ልዩ ኹኔታዎች ስላሉ፣ እነዚኽን ልዩ ኹኔታዎች ከግምት ከግምት ያስገባ፣ ለየት ያለ አደረጃጀት በቃለ ዐዋዲው እንደሚኖረው በዚያው ድንጋጌ ንኡስ አንቀጽ 3 ላይ ቢገለጽም፣ እስከ አኹን ተግባራዊ አልኾነም፡፡

በቅዱስነታቸው መመሪያ ሰጪነት የቤተ ክርስቲያን ልጆች በኾኑ ከፍተኛ ባለሞያዎች ተጠንቶ እና በካህናት፣ ሊቃውንት፣ ምእመናንና ወጣቶች ግብአት ዳብሮ ቅዱስ ሲኖዶስ በጥቅምት ወር 2006 ዓ.ም. ያጸደቀለት፣ የመዋቅር አደረጃጀት እና አሠራር ለውጥም፣ በአማሳኞች ሻጥር እና በቅዱስነታቸው ቀጣይነት ያለው ቁርጠኝነት ማጣት ሳቢያ ተግባራዊ ሳይደረግ፣ የትግበራ ጊዜው እየባከነበት እንደሚገኝ በተለያየ ጊዜ መዘገቡ ይታወሳል፡፡

133You እና ሌሎች 132 ሰዎች12 አስተያየቶች43 ማጋራቶችይውደዱአስተያየትያጋሩ

Source: Link to the Post

Leave a Reply