You are currently viewing በመቐለ ከተማ የሚገኙ ጡረተኞች፤ የ18 ወራት ውዝፍ የጡረታ አበል እንዲከፈላቸው በሰላማዊ ሰልፍ ጠየቁ

በመቐለ ከተማ የሚገኙ ጡረተኞች፤ የ18 ወራት ውዝፍ የጡረታ አበል እንዲከፈላቸው በሰላማዊ ሰልፍ ጠየቁ

በትግራይ ክልል መቐለ ከተማ የሚገኙ ጡረተኞች ዛሬ ሐሙስ ባካሄዱት ሰላማዊ ሰልፍ፤ የ18 ወራት የጡረታ አበል ባለማግኘታቸው በአስከፊ ማህበራዊ እና ኢኮኖሚያዊ ሁኔታ ላይ እንደሚገኙ ገለጹ። የክልሉ ጊዜያዊ  አስተዳደር የጡረተኞችን ጉዳይ አጽንኦት ሰጥቶ፤ ግዴታውን እንዲወጣ ሰልፈኞቹ ጠይቀዋል። 

ቁጥራቸው 250 ገደማ የሚሆኑት ሰልፈኞች፤ መፈክሮችን፣ የትግራይ ክልል እና የፌደራል መንግስት ባንዲራዎችን አንግበው ዛሬ ረፋዱን በመቐለ ከተማ ጎዳናዎች ተዘዋውረዋል። ሰልፈኞቹ ከያዟቸው መፈክሮች መካከል፤ “መንግስት ለጡረተኞች ራሱ ያወጣውን አዋጅ እና ደንብ ያክብር”፣ “ባለውለታ ይከበራል እንጂ በረሃብ እና በበሽታ አይቀጣም” የሚሉት ይገኙበታል። 

በመቐለ ከተማ ከሚገኙ የተለያዩ የጡረተኛ ማህበራት የተውጣጡት ሰልፈኞች፤ ጥያቄያቸውን በመያዝ የትግራይ ክልል ጊዜያዊ አስተዳደር ጽህፈት ቤት አምርተዋል። ሰልፈኞቹ ለአንድ ዓመት ከስድስት ወር የዘገየው ውዝፍ የጡረታ አበል እንዲከፈላቸው እና የጡረተኞች ቦርድ አመራሮች ኃላፊነታቸውን እንዲወጡ ጥያቄ አቅርበዋል። በጥቅምት 2015 ዓ.ም. በደቡብ አፍሪካ ፕሪቶሪያ የተፈረመው የግጭት ማቆም ስምምነትም በአስቸኳይ ሙሉ በመሉ ተግባራዊ እንዲደረግም ጠይቀዋል።  

የሰሜን ሪጅን ማህበራዊ ዋስትና እና የመንግስት ሰራተኞች ኤጀንሲ ለሰልፈኞቹ ጥያቄዎች በሰጠው ምላሽ፤ ጡረተኞች እስካሁን ያልተከፈላቸውን አበል እንዲያገኙ የትግራይ ክልል ጊዜያዊ አስተዳደር እና የፌደራል መንግስት እየተነጋገሩ መሆኑን ገልጿል። (ኢትዮጵያ ኢንሳይደር)   

Source: Link to the Post

Leave a Reply