You are currently viewing በረዶ ቀላቅሎ የጣለው ዝናብ በሰብል ላይ ከባድ ጉዳት አደረሰ። አማራ ሚዲያ ማዕከል/አሚማ     ህዳር 3 ቀን 2014 ዓ.ም         አዲስ አበባ ሸዋ በአዊ ብሔረሰብ አስተዳደር በዚገም…

በረዶ ቀላቅሎ የጣለው ዝናብ በሰብል ላይ ከባድ ጉዳት አደረሰ። አማራ ሚዲያ ማዕከል/አሚማ ህዳር 3 ቀን 2014 ዓ.ም አዲስ አበባ ሸዋ በአዊ ብሔረሰብ አስተዳደር በዚገም…

በረዶ ቀላቅሎ የጣለው ዝናብ በሰብል ላይ ከባድ ጉዳት አደረሰ። አማራ ሚዲያ ማዕከል/አሚማ ህዳር 3 ቀን 2014 ዓ.ም አዲስ አበባ ሸዋ በአዊ ብሔረሰብ አስተዳደር በዚገም ወረዳ በአካኮ ሰርዊ ቀበሌ በረዶ ቀላቅሎ የጣለው ዝናብ በደረሱ ሰብሎች ላይ ከባድ ጉዳት ማድረሱን የዚገም ወረዳ ግብርና ጽ/ቤት አስታውቋል፡፡ ጉዳት የደረሰባቸውና ሀሳባቸውን የሰጡ የአካኮ ሰርዊ ቀበሌ አርሶ አደሮች መካከል ወ/ሮ ቅድስት ጌታሁን ፣ አባቴ አቢ እና ኃይሌ መኩሪያው እንደተናገሩት በርካታ የገንዘብና የጉልበት ወጪ በማውጣት በዘሩዋቸው የክረምት ሰብሎች ማለትም በርበሬ ፣ ዳጉሳና ጤፍ ላይ ከባድ ጉዳት እንደደረሰባቸው ገልፀዋል። የተዘራው አዝእርት ለፍሬ የሚያበቃበትና ምርትን በጐተራ በሚከቱበት ሰዓት በረዶ ቀላቅሎ በጣለው ከባድ ዝናብ ሙሉ በሙሉ ከጥቅም ውጭ ማድረጉን ተናግረዋል። ይህንን ከባድ ክስተት በመረዳት የሚመለከታቸው አካላትና መንግስት አቅም የፈቀደውን ሁሉ ድጋፍ እንዲያደርጉላቸው ጠይቀዋል፡፡ የአካኮ ሰርዊ ቀበሌ የተፈጥሮ ሀብት ባለሙያ የሆኑት አቶ አባየነህ ብዙአየሁ እንደገለፁት በረዶ ቀላቅሎ የጣለው ዝናብ በበርበሬ ፣ በዳጉሳና ጤፍ ሰብሎች ላይ በተለይ በበርበሬ ላይ ከባድ ጉዳት ማድረሱን ገልፀዋል። እንደቀበሌ 301.5 ሄክታር መሬት ላይ በተዘራ ሰብል ጉዳት ማድረሱን በመጠቆም የተዘሩ ሰብሎች ከጥቅም ውጭ መሆኑን ተከትሎም አርሶ አደሩ ከአሁኑ እርጥበት ማሳ ላይ ቶሎ የሚደርሱ እንደ ሽምብራ ያሉ ሰብሎችን እንዲዘሩ የማድረግ ስራ እየተሰራ መሆኑን ተናግረዋል፡፡ የዚገም ወረዳ ግብርና ጽ/ቤት ምክትል ኃላፊ ወ/ሮ የትነበርሽ ብርሃኑ በበኩላቸው ሰሞኑን በረዶ ቀላቅሎ በጣለው ከባድ ዝናብ እንደወረዳ ከ5 ቀበሌዎች ማለትም ግምርና ዋግሳት ፣አካኮ ሰርዊ ፣ ኩሊ ፣ ጐደር ጃዊ እና ጀሞራ ቀበሌዎች ከ1460 ሄክታር መሬት በላይ በተዘራ የጤፍ ፣ የዳጉሳና የበርበሬ ሰብሎች ላይ ከባድ ጉዳት ማድረሱን ገልፀዋል፡፡ ም/ኃላፊዋ አያይዘውም አብዛኛውን የቆላ ቀጠናዎች ለመስኖ ስራ ምቹ አለመሆናቸውን ገልፀው አርሶ አደሩ ተስፋ ቆርጦ ስራ እንዳያቆም የተለያዩ አማራጮችን በመጠቀም ኑሮውን እንዲመራ የማድረግ ስራ እየተሰራ እንደሆነ ተናግረው ለተጐዱ አርሶ አደሮች ከሚመለከታቸው አካላት ጋር በመነጋገር ድጋፍ የሚያገኙበትን መንገድ እንደሚያመቻቹ ተናግረዋል፡፡ በመጨረሻም ጉዳት የደረሰባቸው አርሶ አደሮች በደረሰው ክሰተት ከመደናገጥ በሻገር ቀሪ ሰብሎችን ወቅቱን ያልጠበቀ ዝናብ እንዳያበላሸው በወቅቱ መሰብሰብ መቻል አለበት ሲሉ ምክትል ኃላፊዋ መልዕክታቸውን አስተላልፈዋል ሲል ዚገም ኮሚዩኒኬሽን ዘግቧል፡፡

Source: Link to the Post

Leave a Reply