በሻሸመኔ ከተማ 122 ኩንታል አደገኛ ዕፅ ተይዞ መወገዱ ተገለጸ

ሰኞ ነሐሴ 2 ቀን 2014 (አዲስ ማለዳ) የምዕራብ አርሲ ዞን ፖሊስ ከኢትዮጵያ ፌደራል ፖሊስና ከሌሎች ፀጥታ አካላት ጋር በመቀናጀት 122 ኩንታል አደገኛ ዕፅ ይዞ ማስወገዱን ገለፀ።

የሻሽመኔ ወረዳ ፖሊስ አዛዥ ኮማንደር ሽመልስ ቀናው በወረዳው ውስጥ አደገኛ ዕፅ ለመቆጣጠር ተከታታይ የፓትሮል ቅኝትና ከፍርድ ቤት የመበርበሪያ ትዕዛዝ በማውጣት ቤት ለቤት በተደረገው ድንገተኛ ብርበራና ፍተሻ አደንዛዥ ዕፁንና ተጠርጣሪዎችን በቁጥጥር ሥር ማዋል እንደተቻለ ተናግረዋል።

ኮማንደሩ አያይዘውም ከሌላው ጊዜ በተሻለ ሁኔታ ቁጥጥርና ክትትል እየተደረገ እንደሆነ አውስተው፤ ዕፁ የትውልዱን አእምሮ አደንዝዞ ለወንጀል ድርጊት ስለሚገፋፋ በአገር ላይ የሚያደርሰው ጉዳትና አስከፊነት በመገንዘብ አደንዛዥ ዕፅ ያበቅላሉ ተብለው በሚጠረጠሩ ቀበሌዎች ላይ ለሕብረተሰቡ የግንዛቤ ማስጨበጫ ስልጠና እየተሰጠ እንደሚገኝ ጠቁመዋል።

በወረዳው አደገኛ ዕፅን በዘላቂነት ለማጥፋት የቀበሌ አመራሮችን እና የአካባቢውን ማሕበረሰብ በማስተባበር ከግብርና ባለሙያዎች እና ከሚመለከታቸው አካላት ጋር በመሆን በአካባቢው እንዳይበቅል በትኩረት እየተሰራበት እንደሆነና በመሬቱ ላይ ዕፁን የሚያበቅል ገበሬ ሕጋዊ እርምጃ እንደሚወሰድበትና መሬቱም ሳይቀር እንደሚወረስ ኃላፊው ገልፀዋል።

ከጉዳዩ ጋርም በተያያዘ አምስት ተጠርጣሪዎች ተይዘው ሕግ ፊት ቀርበው ከሦስት ዓመት እሰከ ስድስት ዓመት የፍርድ ዉሳኔ እንደተሰጠባቸውም ኮማንደሩ መናገራቸውን ከፌደራል ፖሊስ ያገኘነው መረጃ አመላክቷል።

በመጨረሻም ኮማንደር ሽመልስ ትብብር ላደረጉ ምስጋና በማቅረብ፤ ዕፁን የሚያመርቱ እና የሚያዘዋውሩ ግለሰቦች ከድርጊታቸው መቆጠብ እንዳለባቸው አሳስበው፤ ይህንንም ተላልፈው በሚገኙ ሰዎች ላይ የተጠናከረ ሕጋዊ እርምጃ እንደሚወሰድም ጠቁመዋል።

Source: Link to the Post

Leave a Reply