You are currently viewing በአማራ ተወላጆች ላይ በተፈጸመው ጭፍጨፋ  የኢትዮጵያ ባለሥልጣናት ገለልተኛ የሆነ ምርመራ እንዲያከናውኑ አምነስቲ ጠየቀ ስቶክሆልም :- ሐምሌ 14/2014 ዓ.ም…

በአማራ ተወላጆች ላይ በተፈጸመው ጭፍጨፋ የኢትዮጵያ ባለሥልጣናት ገለልተኛ የሆነ ምርመራ እንዲያከናውኑ አምነስቲ ጠየቀ ስቶክሆልም :- ሐምሌ 14/2014 ዓ.ም…

በአማራ ተወላጆች ላይ በተፈጸመው ጭፍጨፋ የኢትዮጵያ ባለሥልጣናት ገለልተኛ የሆነ ምርመራ እንዲያከናውኑ አምነስቲ ጠየቀ ስቶክሆልም :- ሐምሌ 14/2014 ዓ.ም አሻራ ሚዲያ በኦሮሚያ ክልል ምዕራብ ወለጋ ውስጥ የአማራ ተወላጆች ላይ በተፈጸመው ጭፍጨፋ የኢትዮጵያ ባለሥልጣናት ገለልተኛ የሆነ ምርመራ እንዲያከናውኑ አምነስቲ ኢንተርናሽናል ጠይቋል። የመብት ተቆርቋሪው ድርጅት ሐምሌ 14/2014 ዓ.ም. ባወጣው መግለጫ በምዕራብ ወለጋ፣ ጊምቢ ወረዳ፣ ቶሌ ቀበሌ ሰኔ 11/2014 ዓ.ም. በተፈጸመው ጭፍጨፋ በመቶዎች የሚቆጠሩ ሰዎች መገደላቸውን እንዲሁም በርካቶች መቁሰላቸውን ገልጿል። “በኦሮሞ ነፃነት ሠራዊት ተፈፅሟል የተባለው በቶሌ የተፈፀመው ዘግናኝ ግድያ፣ ጥቃት ፈጻሚዎቹ ለሰው ሕይወት ያላቸውን ግድየለሽነት ያሳየ ነው። ሴቶች እና ህጻናት ሕይወታቸውን ያጡበት ይህ አሰቃቂ ግድያ ገለልተኛ እና ውጤታማ በሆነ መልኩ መመርመር አለበት” ሲሉ የአምነስቲ ኢንተርናሽናል የምስራቅ እና ደቡብ አፍሪካ ዳይሬክተር ዴፕሮስ ሙቼና ተናግረዋል። አክለውም “የኢትዮጵያ ባለሥልጣናት እነዚህን ግድያዎች የፈጸሙ ግለሰቦች ለፍርድ እንዲቀርቡ እስከ መጨረሻው ድረስ ሊሄዱ ይገባል” ብለዋል። አምነስቲ ከጥቃቱ የተረፉ እና የተጎጂ ቤተሰቦችን ዋቢ አድርጎ እንዳሰፈረው ግድያዎቹ የተፈጸሙት በኦሮሞ ነጻነት ሠራዊት መሆኑን ነው። ቢቢሲ ያናገራቸው ከጭፍጨፋው የተረፉ ነዋሪዎችና መንግሥት ጥቃቱን የፈጸመው ‘ሸኔ’ በሚል የሚጠራው ታጣቂው የኦሮሞ ነፃነት ሠራዊት እንደሆነ ሲገልጹ፣ የኦሮሞ ነጻነት ሠራዊት ግን ለጥቃቱ የመንግሥት ኃይሎችን ተጠያቂ አድርጎ ገለልተኛ ምርመራ እንዲደረግ መጠየቁ ይታወሳል። ተቋሙ የዐይን እማኞችን፣ ከጥቃቱ የተረፉ ነዋሪዎችን፣ የተጎጂዎችን ቤተሰብ አባላት እና የአካባቢውን ባለሥልጣናት ጨምሮ 10 ግለሰቦችን አናግሯል። በዚህም ጥቃት የጅምላ ግድያ፣ ቤቶች ማቃጠልና ዘረፋ ተፈፅሟል ብለዋል። በተጨማሪም የአምነስቲ የምርመራ ቡድንም የሳተላይት ምስሎችን የመረመረ ሲሆን ሰኔ 11/2014 ዓ.ም. በቶሌ ቀበሌ በሚገኙ መንደሮች ውስጥ የእሳት ቃጠሎ መነሳቱንም አረጋግጧል። በምዕራብ ወለጋ በሁለት ሳምንት ውስጥ በመቶዎች የሚቆጠሩ ሰዎች መገደላቸውን ተከትሎ የፖለቲካ ፓርቲዎችና ሌሎች ወገኖች ገለልተኛ ምርመራ እንዲደረግ ጥሪ አቅርበዋል። የሕዝብ ተወካዮች ምክር ቤት የኢትዮጵያ ሰብአዊ መብቶች ኮሚሽን (ኢሰመኮ) ጭፍጨፋውን በተመለከተ ምርመራ አድርጎ ሪፖርቱን ለምክር ቤቱ እንዲያቀርብ ማዘዙ ይታወሳል። የተባበሩት መንግሥታት ድርጅት የሰብአዊ መብት ኮሚሽንም በጥቃቱ ዙሪያ ምርመራ እንደሚያደርግ አሳውቋል። ለፈጣንና አዳዲስ መረጃዎች የአይበገሬዎቹ ልሳን:- Youtube:- https://www.youtube.com/channel/UCPmgFzP2ZPmdGjHxXjigJaw Facebook:- https://www.facebook.com/asharamedia24 ቴሌግራም:- https://t.me/asharamedia24

Source: Link to the Post

Leave a Reply