በኢትዮጵያ መንግሥት ወይም በአንዳንድ ምዕራባውያን አገራት ግፊት፣ አሸባሪዉ ትሕነግ በጉልበት ይዟቸው የነበሩትን የአማራ ቅርስ የሆኑትን ቦታዎች በድርድር ስም አሳልፎ ለመስጠት የሚደረገውን ጥ…

በኢትዮጵያ መንግሥት ወይም በአንዳንድ ምዕራባውያን አገራት ግፊት፣ አሸባሪዉ ትሕነግ በጉልበት ይዟቸው የነበሩትን የአማራ ቅርስ የሆኑትን ቦታዎች በድርድር ስም አሳልፎ ለመስጠት የሚደረገውን ጥረት ሁሉ አጥብቀን እንደሚቃወሙት የተለያዩ ተቋማት ገለጹ። አማራ ሚዲያ ማዕከል/አሚማ የካቲት 18 ቀን 2014 ዓ.ም አዲስ አበባ ሸዋ ኢትዮጵያውያንናትውልደ-ኢትዮጵያውያን ድርጅቶች እና ተቋማት በጋራ ሆነው በወቅታዊ ሀገራዊ ጉዳይ መግለጫ አውጥተዋል። ሙሉ መግለጫው እንደሚከተለው ይቀርባል:_ የአማራ ቅርስ ቦታዎችን ለድርድር ማቅረብ ተቀባይነት የሌለው መሆኑን አስመልክቶ በውጭ ከሚኖሩ ኢትዮጵያውያንና ትውልደ-ኢትዮጵያውያን ድርጅቶች የተሰጠ መግለጫ፦ እኛ፣ ስማችን ከታች የተዘረዘረው በውጭ የምንኖር ኢትዮጵያውያንና ትውልደ-ኢትዮጵያውያን ድርጅቶች እና ተቋማት፣ በኢትዮጵያ መንግሥት ወይም በአንዳንድ ምዕራባውያን አገራት ግፊት፣ አሸባሪዉ ትሕነግ በጉልበት ይዟቸው የነበሩትን የአማራ ቅርስ የሆኑትን ቦታዎች በድርድር ስም አሳልፎ ለመስጠት የሚደረገውን ጥረት ሁሉ አጥብቀን ለመቃወም ያለንን የማያወላውል አቋም ስናሳውቅ በማያሻማ ቆራጥነትና ፅናት ነው። በስልጣን ላይ ባለው መንግሥት ዘንድ፣ በግልፅም ሆነ በሕቡዕ፣ እነዚህን ቦታዎች አሳልፎ ለትሕነግ ለመስጠት የሚደረግ ሙከራ፣ የኢትዮዽያን ልዕልና ለመጻረር፣ ብሎም የአማራውን ወገን ለማዳከም፣ በአገር ውስጥ ባሉ ፅንፈኞች እና በባዕዳን አካላት ከሚካሄድ አደገኛ ሴራ ተለይቶ ሊታይ እንደማይቻል ልናስገነዝብ እንወዳለን። የአማራ ሕዝብ ቅርስ የሆኑት፣ በተለይም ወልቃይት ጠገዴ ሰቲት ሁመራ ዞንን እና ራያን የመሳሰሉት ቦታዎችን ለመደራደሪያ አቅርቦ ለመስጠት የሚቀርበውን ትርክት የሚደግፍ ታሪካዊም ሆነ ሕጋዊ መሠረት የሌለ መሆኑን በማያጠራጥር ሁኔታ አጥብቀን እናምናለን። በዋናነትና በቅድሚያ፣ በተጠቀሱት አካባቢዎች የሚኖረው አብዛኛው ሕዝብ፣ በማንነቱ ከአማራነት በስተቀር በሌላ ታውቆም ሆነ፣ በሌላ ወገን አስተዳደር ሥር ስለመኖሩ የሚያሳይ፣ መሠረት የያዘ ምንም አይነት የታሪክ ማስረጃ ኖሮ አያውቅም። በአንፃሩ፣ ትሕነግ ለሠላሳ አመታት ያህል በጉልበት ይዟቸው የነበሩት ቦታዎች፣ ወደትግራይ ክልል እንዲጠቀለሉ የተደረገው፣ ኢትዮጵያን ቋንቋን መሠረት ባደረገ ፍረጃ የከፋፈለዉና የችግሮች ሁሉ መንስኤ የሆነው ሕገ መንግሥት ከመታወጁ በፊት ከመሆኑም በላይ፣ በጊዜው የነበረውን የራሱን የትሕነግን የሽግግር ቻርተር ሳይቀር የሚፃረር እርምጃ መሆኑ የተረጋገጠ ሃቅ ነው። በአለፉት ሁለት አመታት፣ የኢትዮዽያ መንግሥት ለትግራይ ክልል ከመቶ ቢሊዮን ብር በላይ ሲያወጣ፣ ከትሕነግ ጭቆና አገዛዝ ለተላቀቁት ቦታዎች ግን የበጀት ድጋፍ መነሳቱ፣ ሁኔታዉን በከፍተኛ ትዝብት፣ ቅሬታና ንዴት ስንመለከተው እንድንቆይ አድርጎናል። የምዕራባውያን አገሮችም፣ የአማራው ሕዝብ ለደረሰበት ጉዳት ትኩረት ሳይሰጡ፣ የዚህ ሕዝብ ታሪካዊ ቅርስ የሆኑትን ቦታዎች ለአሸባሪው ትሕነግ ተላልፎ እንዲሰጥ ከባድ ተፅእኖ ሲያደርጉ ይታያሉ። በአጠቃላይ፣ ትሕነግ በኃይል እና በዕብሪት አስፋፍቶት ለነበረው ወሰን እውቅና መስጠት፣ የአካባቢዉን ነዋሪዎች ሰብአዊ መብት ከመጣስ አልፎ፣ ትሕነግ ከሠላሳ ዓመታት በላይ ሲፈጽም የነበረዉን ግፍ እና በደል እንዲቀጥል ድጋፍ ተለይቶ ሊታይ አይችልም የሚል እምነት አለን። ይህንን በተመለከተም፣ የአሁኑ የአሜሪካ አስተዳደር፣ ለትሕነግ ተስፋፊነት ጥያቄ የሚያደርገው ጥብቅና አድሎአዊና ኢፍትሃዊ በመሆኑ አበክረን እናወግዛለን። ስለዚህ፣ ከዚህ በታች ስማችን የተዘረዘረው ድርጅቶች፣ የሚቀጥሉትን ጥሪዎች በአስቸኳይ ለማቅረብ እንወዳለን፤ 1. ለፍትሕ እና እኩልነት የቆሙ ሰላም ወዳድ ኢትዮጵያውያንና የኢትዮጵያ ወዳጆች ሁሉ፣ ነጻ የወጡትን የአማራ ቦታዎች ለትሕነግ የግፍ አገዛዝ፣ በቀጥታም ሆነ በተዘዋዋሪ፣ አሳልፎ ለመስጠት የሚኖረውን ማንኛውንም ጥረት አጥብቀው እንዲቃወሙ፤ 2. በስልጣን ላይ ያለው ክልላዊም ሆነ ፌደራላዊ መንግሥት፣ ነጻ የወጡትን የአማራ ቦታዎች፣ በቀጥታም ሆነ በተዘዋዋሪ፣ ለትሕነግ የግፍ አገዛዝ አሳልፎ ለመስጠት ከሚደርገ ግፊት በአስቸኳይ እንዲቆጠብ፤ 3. በመጨረሻም፣ አሜሪካና ሌሎች ምዕራብውያን አገሮች በኢትዮጵያ የውስጥ ጉዳይ ጣልቃ በመግባት፣ የተጠቀሱት አካባቢዎች፣ በቀጥታም ሆነ በተዘዋዋሪ፣ በትሕነግ አረመኔያዊ አገዛዝ ሥር እንደገና እንዲወድቁ የሚያደርጉትን ጥረት እንዲያቆሙ። ፈራሚ ድርጅቶች 1. Adwa Great African Victory Association (AGAVA) 2. All Shewa Ethiopian People Multipurpose International Association 3. Amhara Dimtse Serechit 4. Amhara Wellbeing and Development Organization 5. Communities of Ethiopians in Finland 6. Ethio-Canadian Human Rights Association 7. Ethiopian-American Development Council (EADC) 8. Ethiopian Dialogue Forum (EDF) 9. International Ethiopian Women’s Organization (IEWO) 10. Global Alliance for Justice – The Ethiopian Cause 11. Global Alliance for the Rights of Ethiopians (GARE) 12. Global Amhara Coalition 13. Global Ethiopian Scholars Initiative (GESI) 14. Gonder Hibret for Ethiopian Unity 15. New York/New Jersey Tri-State Hope for Ethiopia, Inc. (H4E) 16. Major Lemma Woldetsadik Memorial Foundation 17. Menelik Hall Foundation 18. Network of Ethiopian Scholars (NES) 19. People To People, Inc. (P2P) 20. Radio Yenesew Ethiopia 21. Selassie Stand Up, Inc. 22. The Ethiopian Broadcast Group 23. Vision Ethiopia (VE) 24. Worldwide Ethiopian Civic Associations Network (WE-CAN

Source: Link to the Post

Leave a Reply