በእስራኤል የሚኖሩ ኢትዮጵያዊያን እና ትውልደ ኢትዮጵያዊያን መንግስት የወሰደውን ሕግ የማስከበር እርምጃ በመደገፍ በቴልአቪቭ  ሰላማዊ ሰልፍ አካሄዱ

በእስራኤል የሚኖሩ ኢትዮጵያዊያን እና ትውልደ ኢትዮጵያዊያን መንግስት የወሰደውን ሕግ የማስከበር እርምጃ በመደገፍ በቴልአቪቭ ሰላማዊ ሰልፍ አካሄዱ

አዲስ አበባ፣ ህዳር 25፣ 2013 (ኤፍ.ቢ.ሲ) በእስራኤል የሚኖሩ የቤተ እስራኤል ማኅበረሰብ አባላት፣ ኢትዮጵያዊያን እና ትውልደ ኢትዮጵያዊያን መንግስት የሕወሓት ጁንታ ላይ የወሰደውን ሕግ የማስከበር እርምጃ እና የመከላከያ ሠራዊት ያደረገውን ተጋድሎ በመደገፍ በቴልአቪቭ እስራዔል ሰላማዊ ሰልፍ አካሄደዋል።

የድጋፍ ሰልፉ ተሳታፊዎች ከቴልአቪቭ፣ ከኢየሩሳሌም፣ ከቤርሼባ እና በሌሎችም የእስራኤል ከተሞች የመጡ ሲሆን፣ ይህን ያስተባበሩት ከተለያዩ የማህበረሰቡ አደረጃጀቶች ውስጥ የተውጣጡ መሆኑ ታውቋል።

ሰልፉን ያዘጋጁት ኢትዮጵያዊያን እና ትውልደ ኢትዮጵያዊያን ባለፉት ሁለት ሳምንታት ጁንታውን በመደገፍ እና በመንግስት የተወሰደውን የሕግ ማስከበር እርምጃ በመቃወም ሰልፍ ያደረጉ ሰዎች ጥያቄ ያስቆጣቸው መሆኑን ገልጸዋል።

ሰላማዊ ሰልፈኞቹ በኢምባሲው ጽህፈት ቤት ፊት ለፊት ተገኝተው ባቀረቡት ጥያቄ መሰረት በእስራኤል የኢትዮጵያ ባለሙሉ ሥልጣን አምባሳደር እና ልዩ መልእክተኛ አምባሳደር ረታ ዓለሙ ወደ ሕዝቡ በመሄድ ባስተላለፉት መልዕክት “መንግስታችን የወሰደውን ሕግ የማስከበር እርምጃ እና ለመከላከያ ሠራዊታችንን ያላቸሁን አክብሮት ለመግለጽ ድጋፍ ስላደረጋችሁ በመንግስት ስም አመሰግናለሁ” ብለዋል።

በማያያዝም ሕግ የማስከበር ዘመቻው በድል መጠናቀቁ ትልቅ ስኬት መሆኑን ጠቅሰው፣ በኢትዮጵያ ሕገመንግስት መሰረት በሕግ የሚፈለጉትን የጁንታው ቡድን አባላት ለሕግ ለማቅረብ መንግስት የሚያከናውነው ወንጀለኞችን የማደንና የመልሶ ግንባታ ምዕራፍ ተግባር ተጠናክሮ የሚቀጥል መሆኑን አረጋግጠዋል።

በቀጣይ የመንግስት ዋና ትኩረት የትግራይ ሕዝብ አሁን ካለበት ሁኔታ እንዲወጣ የመልሶ ግንባታ ማከናወን፣ ከመኖሪያችው የተፈናቀሉ የተሰደዱትን ዜጎቻችን ወደነበሩበት ቀዬ መመለስ መሆኑን ገልጸው እነዚህን ተግባራት በመደገፍ ከመንግስት ጎን እንዲቆሙ ጥሪ አቅርበዋል።

የድጋፉ ተሳታፊዎች በመግለጫቸው በሰሜን እዝ ላይ በተፈጸመው ከባድ ክህደት እና ጥቃት ልባችን አዝኗል፤ የጁንታውን ቡድን ለፍትህ ከማቅረብ በተጨማሪ ቡድኑ በሕግ ሊታገድ ይገባል ሲሉ መጠየቃቸውን በእስራዔል የኢትዮጵያ ኤምባሲ ያወጣው መረጃ ያመለክታል፡፡

በመጨረሻም ሰልፈኞቹ ለሀገር መከላከያ ሠራዊት በወቅቱ ያሰባሰቡትን 17 ሺህ 200 የአሜሪካ ዶላር የገንዘብ ድጋፍ ለኤምባሲው አስረክበዋል።

ከፌስቡክ ገፃችን በተጨማሪ ወቅታዊ፣ ትኩስ እና የተሟሉ መረጃዎችን ለማግኘት፡-

የፋና ድረ ገጽ https://www.fanabc.com/ ይጎብኙ፤

ተንቀሳቃሽ ምስሎችን ለማግኘት የፋና ቴሌቪዥን የዩቲዩብ ቻናል https://www.youtube.com/c/fanabroadcastingcorporate/ ሰብስክራይብ ያድርጉ

ፈጣን መረጃዎችን ለማግኘት ትክክለኛውን የፋና ቴሌግራም ቻናል https://t.me/fanatelevision ይቀላቀሉ

ከዚህ በተጨማሪም በትዊተር ገጻችን https://twitter.com/fanatelevision ይወዳጁን

ዘወትር ከእኛ ጋር ስላሉ እናመሰግናለን

The post በእስራኤል የሚኖሩ ኢትዮጵያዊያን እና ትውልደ ኢትዮጵያዊያን መንግስት የወሰደውን ሕግ የማስከበር እርምጃ በመደገፍ በቴልአቪቭ ሰላማዊ ሰልፍ አካሄዱ appeared first on Welcome to Fana Broadcasting Corporate S.C.

Source: Link to the Post

Leave a Reply