በክፍያ መንገዶች ላይ ከጥቅምት 22 ጀምሮ የታሪፍ ማሻሻያ እንደሚያደርግ ተነገረ

ሐሙስ ጥቅምት 17 ቀን 2015 (አዲስ ማለዳ) የኢትዮጵያ የክፍያ መንገዶች ኢንተርፕራይዝ በክፍያ መንገዶች ላይ ከጥቅምት 22/2015 ጀምሮ አዲስ የክፍያ ታሪፍ ማሻሻያ ተግባራዊ እንደሚያደርግ አስታወቀ።

ኢንተርፕራይዙ ላለፉት 8 ዓመታት ቀልጣፋና ዘመናዊ በሆነ መልኩ ያልተቋረጠ የ24/7 የክፍያ መንገድ አገልግሎት እየሰጠ የሚገኝ ሲሆን፤ የአገራችን ዋነኛ የወጪ እና ገቢ ንግድ መስመር የሆነውን የአዲስ – አዳማ፣ በጅቡቲ መስመር ምስራቃዊ የአገራችንን ክፍል የሚገኘውን የድሬደዋ – ደወሌ እንዲሁም የምስራቅ አፍሪካ የትራንስ ሀይዌይ መንገድ አያያዥ የሆነውን የሞጆ – ባቱ የፈጣንና የክፍያ መንገዶችን ተረክቦ በማስተዳደር ላይ ይገኛል፡፡መንገዶቹ የገቢ-ወጪ ንግድ ኮሪደር አካል እንደመሆናቸው የሎጂስቲክ ስርአቱን ውጤታማነትን በማሳደግ ኢኮኖሚያዊ፣ ማህበራዊ እና አካባቢያዊ ፋይዳቸው የጎላ ነው ያለው ኢንተርፕራይዙ፤ ለሚሰጠው አገልግሎት ተመጣጣኝ የክፍያ ታሪፍ መተግበሩ ለአገልግሎቱ አዋጭነት እና ዘላቂነት ወሳኝ ሚና እንደሚኖረው ገልጿል።

የኢትዮጵያ የክፍያ መንገዶች ኢንተርፕራይዝ የፈጣን የክፍያ መንገድ የአገልግሎት ክፍያ ታሪፍ እሳቤ ተሽከርካሪዎች የፍጥነት መንገድን ሲጠቀሙ ከሚያገኙት የጉዞ ጊዜ ቅናሽ፣ የነዳጅ ወጪ ቅናሽ ሌሎች የተሽከርካሪ ማንቀሳቀሻ ወጭዎች ቅናሽ እንዲሁም ከመንገዱ ዘመናዊነት ጋር ተያይዞ በፍጥነት መንገዱ ላይ ማሽከርከር ከፍተኛ የሆነ ምቾት እና የደህንነት ጥቅም ማግኘታቸው የሚጠቀሱ ናቸው ብሏል፡፡

በመሆኑም የታሪፍ ማሻሻያው ደንበኞች ከፍጥነት መንገዶቹ የሚያገኙትን ኢኮኖሚያዊ ጥቅም እንዲሁም የኦፕሬሽን እና የመንገድ ሀብት ጥገና ወጪ እድገትን ታሳቢ ያደረገ እና ተቋማዊ የፋይናንስ አቅምን ለማሳደግ የታለመ መሆኑ ተገልጿል።ታሪፉ ተሽከርካሪዎች በተጓዙት ርዝመት እና በአራት የክፍያ መደቦች (አነስተኛ ተሽከርካሪዎች (ምድብ አንድ)፣ መለስተኛ ተሽከርካሪዎች (ምድብ ኹለት)፣ የጭነት ተሽከርካሪዎች (ምድብ ሦስት) እና ከባድ እና ተሳቢ ተሽከርካሪዎች (ምድብ አራት) እንደሚከፈልም ተነግሯል።

በመሆኑም ኢንተርፕራይዙ ከጥቅምት 22/2015 ጀምሮ አዲሱን የክፍያ ታሪፍ ማሻሻያ እንደሚተገብር ያስታወቀ ሲሆን፤ ደንበኞች የታሪፍ ለውጥ መኖሩን አውቀው አስፈላጊውን ቅድመ ዝግጅት እንዲያደርጉ አሳስቧል።

The post በክፍያ መንገዶች ላይ ከጥቅምት 22 ጀምሮ የታሪፍ ማሻሻያ እንደሚያደርግ ተነገረ first appeared on Addis Maleda.

Source: Link to the Post

Leave a Reply