በኮምቦልቻ ከተማ የባጃጅ አሽከርካሪ የሆኑ ግለሰብ ወድቆ ያገኙትን 130 ሺሕ ብር ለባለቤቱ መመለሳቸው ተገለጸ

ማክሰኞ መስከረም 10 ቀን 2015 (አዲስ ማለዳ) በኮምቦልቻ ከተማ የባጃጅ አሽከርካሪ የሆኑት ይማም መሃመድ ወድቆ ያገኙትን 130 ሺሕ ብር ለባለቤቱ በታማኝነት መመለሳቸውን የከተማ አስተዳደሩ ኮምዩኒኬሽን ቢሮ አስታወቀ።

ግለሰቡ ዕለተ አርብ መስከረም 6 ቀን 2015 ከጧቱ አራት ሰዓት አካባቢ ባጃጃቸው ላይ ወድቆ ያገኙትን 130 ሺሕ ብር ለባለቤቱ ለመመለስ ጥረት ማድረግ ጀምረዋል። ከጧት ጀምረው በባጃጅ ላይ በርካታ ሰው ጭነው እና አውርደው ሰለነበር የዕቃው ባለቤት ማን ይሆናል ብለው እያሰቡ ነው።

በመጀመሪያ ደረጃ በፌስታል የተጠቀለለው እቃ ብር መሆኑን አልጠረጠሩም። የእቃው ባለቤት ትሆናለች ብለው ወደ ገመቱት አንድ ባለ ሱቅ ደንበቸውው ጋር በመሄድ የያዙትን ፌስታል በውስጡ የያዘውን እቃ ከፍተው ሳያዩ የሰጧት ቢሆንም፤ ከፍታ በማየት የሷ አለመሆኑን እና በፌስታሉ ውስጥ ያለውም ብር መሆኑን ትንግረዋለች።ገንዘቡ የማን ሊሆን እንደሚችል ቢያወጡ ቢያወርዱም ሊመጣለቸው አልቻለም። የገንዘቡ ባለቤት ሊፈልገኝ ይችላል ብለው የጠረጠሩበት ቦታ ኹሉ በመሄድ ባለቤቱን ያለመታከት ፈልገውታል።

ይማም መሃመድ “የሰዉ ገንዘብ የሰዉ ነው በላቤ በጥረቴ ያገኘሁትን ገንዘብ በረካ ያድርግልኝ።” ብለው ገንዘቡ እጃቸው ከገባበት ሰዓት ጀምሮ የገንዘቡን ባለቤት ሲያፈላልጉ ቢቆዩም ሊያገኙት አልተቻላቸውም። “የኔ ጭንቀት” ይላሉ ይማም፤ “የኔ ጭንቀት የገንዘቡን ባለቤት አግኝቼ ማታ ሳይበሳጭ እና ሌሊቱን በሀሳብ ሲሰቃይ እንዳያድር ነበር።” ሆኖም የገንዘቡ ባለቤት ኑረዲን የተባሉት ግለሰብ የባጃጅ ሾፌሩን በማፈላለግ በይማሞ መሃመድ ስልክ ላይ በደወሉበት ቅጽበት ፣ ብሩ እጃቸው ላይ እንዳለ እና እሱን ለማግኜት ፍለጋ ላይ እንደነበር በመግለጽ 130 ሺሕ ብሩን ለባለቤቱ ኑረዲን ያለምንም ድርድር እና ማግባቢያ ሊመልሱ ችለዋል።

የገንዘቡ ባለቤት ይማም መሃመድ ላሳዩት ታማኝነት የገንዘብ ስጦታ ቢያቀርቡላቸውም ለመቀበል ፈቃደኛ ሳይሆኑ ቀርተዋል።

የባጃጅ ማህበራት የቦርድ ስብሳቢ የሆኑት ፍቅሩ ወለደ ጻድቅ በይማም መሃመድ ተግባር እንደኮሩ ተናግረው፤ በኮምቦልቻ ከተማ የባጅጅ ባለንብረቶች ማህበር ሥም የአክብሮት ምስጋና በማቅረብ ተመሳሳይ የተቀደሰ ተግባር የፈፀሙ የባጃጅ አሽከርከሪዎች መኖራቸውን ጠቁመዋል።ከዚህ በተቃራኒ የባጃጅ አገልግሎትን ለዘረፉ እና የተለያዩ ወንጀሎች መስሪያ የሚጠቀሙበት እንዳሉ የገለጹት ፍቅሩ ጥቂቶች በሚሰሩት የሥርቆት ወንጀል የሚበዛው የባጃጅ አሽከርካሪ ሥም እየጠፋ በመሆኑ የይማም መሃመድን አራዕያ በመከተል የተረሱ፣ የወደቁ የተሳፋሪ ንብረቶችን በመመለስ የኮምቦልቻን ህብረተሰብ በታማኝነት እንዲያገለግሉ እና የባጃጅ ላይ ሥርቆት የሚሰሩትን በማጋለጥ ከፀጥታ ተቋሙ ጋር በትብብር እንዲሰሩ ጥሪያቸውን አስተላልፈዋል ።

የኮምቦልቻ ከተማ የመንገድ ትራፊክ ድህንነት አስተባባሪ የሆኑት ኮማንደር ወሰን አሰፋ በበኩላቸው በይማም መሃመድ ተግባር እንደተደሰቱ ገልጸው፤ ይማም መሃመድ በነበረን የሥራ ክትትል የሥነ ምግባር ችግር የሌለባቸው ሥራቸውን አክብረው የሚሰሩ የባጃጅ አሽከርካሪ መሆናቸውን ተናግረዋል።አክለውም ሌሎች የህዝብ አገልግሎት የሚሰጡ አሽከርካሪዎች እና ረዳቶች ከይማሞ መሃመድ ትልቅ አስተማሪ ትምህርት በመውስድ ህብረተሰቡን በቅንነት በታማኝነት እንዲያገለግሉ ሲሉ መልዕክታቸውን አስተላልፈዋል።

Source: Link to the Post

Leave a Reply