You are currently viewing በጉራጌ ዞን የተፈጠረው ምንድን ነው?

በጉራጌ ዞን የተፈጠረው ምንድን ነው?

በዛሬው እለት በጉራጌ ዞን የተለያዩ ከተሞች የስራ ማቆም አድማ መኖሩን ኢትዮ ኤፍ ኤም ከዞኑ ነዋሪዎች ያገኝው መረጃ ያመለክታል፡፡

በዛሬው ዕለት ከክልል እንሁን ጥያቄ ጋር በተያያዘ በዞኑ መቀመጫ በወልቂጤ ከተማ የስራ ማቆም አድማ መመታቱ ተሰምቷል።
ከወልቂጤ ከተማ በተጨማሪም “ጉብሬ ጉንችሬ” እንዲሁም “እምድብር” ከተሞች ላይም የስራ ማቆም አድማ መመታቱን ነዋሪዎች ለኢትዮ ኤፍ ኤም በስልክ ተናግረዋል፡፡

በነዚህ ከተማዎች ባንኮች ፣ የተለያዩ መ/ቤቶች፣ የንግድ እና የትራንስፖርት አገልግሎት እንደቆመ የአካባቢው ነዋሪዎች ነግረዉናል።
የእዣ ወረዳና የአገና ከተማ አስተዳደር የመንግስት ሰራተኞችም የህዝቡ ጥያቄ ይመለስ በሚል ሰላማዊ ሰልፍ እያካሄዱ መሆናቸውን በስልክ ሀሳባቸውን የሰጡን ነዋሪዎች ገልጸዋል፡፡

የዞኑ ህዝብ በክልል የመደራጀት ጥያቄው ረጅም ጊዜን ያስቆጠረ መሆኑንና ለጠየቀው ህጋዊ የሆነ ጥያቄ ህጋዊ ምላሽ እንዲሰጠው፣የ”ጉራጌ ክልል” አደረጃጀትም ተግባራዊ እንዲሆንለት በተለያየ መንገድ እየጠየቀ እንደሚገኝ ነዋሪዎቹ ነግረዉናል፡፡

የአካባቢ ነዋሪዎች መንግስት በሰላማዊ እና ህጋዊ መንገድ እየተጠየቀ ላለው የክልልነት ጥያቄ ህጋዊ መልስ እንዲሠጥ ነው የስራ ማቆም አድማ ዋነኛ አላማዉ ሲሉ ነዋሪዎች ለጣበያችን ተናግረዋል፡፡

ባሁኑ ሰአትም በወልቂጤ ከተማ የመከላከያ፣ የፌደራል እንዲሁም የክልሉ ልዩ ሀይሎች በብዛት መግባታቸውን የአካባቢው ነዋሪዎች ነግረውናል፡፡
ከስራ ማቆም አድማው በተጨማሪ በጉንችሬ እና በጉብሬ ሰላማዊ ሰልፎች እየተደረጉ ይገኛሉም ብለውናል፡፡
እስካሁን የተፈጠረ የጸጥታ ችግር አለመኖሩን የተናገሩት ነዋሪዎቹ የመንግም ሆነ የግል ሰራተኞች ስራ አለመግባታቸውን ነዉ የሚናገሩት፡፡

በደቡብ ክልል ያሉ ዞኖችና ልዩ ወረዳዎች ለሁለት ተከፍለው በሁለት አዲስ ክልሎች ለመደራጀት በየምክርቤቶቻቸው ወስነው ውሳኔውን ወደ ፌዴሬሽን ምክር ቤት ማቅረባቸዉን ከዚህ ቀደም ማስታወቃቸዉ ይታወሳል፡፡

በጋራ በአዲስ ክልል እንደራጃለን ብለው በምክር ቤት ውሳኔ አሳልፈው ወደ ፌዴሬሽን ምክር ቤት ጥያቄውን ካቀረቡት መካከል ግን የጉራጌ ዞን እንደሌለበት መጠቀሱ ይታወቃል።
ከሰሞኑ ዞኑ ከአጎራባቾቹ ስልጤ ፣ ከምባታ ጠምባሮ ፣ ሀዲያ፣ ሀላባ ዞኖች እና የም ልዩ ወረዳ ጋር ነበር በአንድ ክልል ይደራጃል ብሎ መንግስት አቅጣጫ አስቀምጦ የነበረው።
ነገር ግን የዞኑ ም/ቤት እስከ ዛሬ ድረስ በጉዳዩ ላይ አልተወያየም፤ አዲሱን አደረጃጀት አላፀደቀም ፤ ከዚህ በፊት ዞኑ እንደገለፀው የክልልነት ጥያቄን ለፌዴሬሽን ም/ቤት አቅርቦ ምላሽ እየጠበቀ ነው።
መንግስት በአሁን ሰዓት ዞኑን በክልል ለማደራጀት እንደሚቸገር በመግለፅ ከአጎራባች ዞኖችና ልዩ ወረዳ ጋር ክልል እንዲሆን ሀሳብ እያቅረበ መሆኑም ተሰምቷል።

በሔኖክ ወ/ገብርኤል
ሐምሌ 03 ቀን 2014 ዓ.ም

Facebooktwitterredditpinterestlinkedinmail

Source: Link to the Post

Leave a Reply