You are currently viewing በጋዜጠኛ ተመስገን ደሳለኝ ላይ የ10 ቀናት የምርመራ ጊዜ ተፈቀደ

በጋዜጠኛ ተመስገን ደሳለኝ ላይ የ10 ቀናት የምርመራ ጊዜ ተፈቀደ

በሃሚድ አወል

“ሁከት እና ብጥብጥ በማነሳሳት” ወንጀል ተጠርጥሮ በእስር ላይ በሚገኘው በጋዜጠኛ ተመስገን ደሳለኝ ላይ የ10 ቀናት የምርመራ ጊዜ ተፈቀደ። የምርመራ ጊዜውን የፈቀደው የፌደራል የመጀመሪያ ደረጃ ፍርድ ቤት አራዳ ምድብ የጊዜ ቀጠሮ ችሎት ነው። 

የጊዜ ቀጠሮ ችሎቱ የምርምራ ጊዜውን የፈቀደው የተከሳሽ ጠበቃ ያቀረቡትን መከራከሪያ እና የዋስትና ጥያቄ ውድቅ በማድረግ ነው። የምርመራ ጊዜው ከግንቦት 19፤2014 ጀምሮ የሚታሰብ መሆኑን ችሎቱ ገልጿል። 

ባለፈው ሳምንት ሐሙስ በጸጥታ ኃይሎች የተያዘው ጋዜጠኛ ተመስገን ደሳለኝ፤ ለመጀመሪያ ጊዜ ፍርድ ቤት የቀረበው በማግስቱ አርብ ግንቦት 19 ነበር። በአርብ ዕለቱ ችሎት የተጠርጣሪው ጠበቃ ሔኖክ አክሊሉ፤ ጉዳዩ መታየት ያለበት “በመገናኛ ብዙሃን አዋጅ መሰረት ነው” ብለው ተከራክረው ነበር።

በዚህም ምክንያት ፍርድ ቤቱ መዝገቡን ዘግቶ የጋዜጠኛ ተመስገንን የዋስትና መብት እንዲያከብር ጠበቃው ጠይቀዋል። የፌደራል የመጀመሪያ ደረጃ ፍርድ ቤት በዛሬው የችሎት ውሎው “ምርመራው ጅምር መሆኑን” በመጥቀስ፤ ጉዳዩ የሚታየው “በአዋጁ ነው አይደለም የሚለውን አሁን መወሰን እንደማይቻል” ገልጿል። 

ይህን ተተንርሶም ፍርድ ቤቱ በጋዜጠኛ ተመስገን ጠበቃ በኩል የቀረበውን የዋስትና ጥያቄ ውድቅ አድርጎታል። ፍርድ ቤቱ የፖሊስን የምርመራ ውጤት ለማድመጥ ለሚቀጥለው ሳምንት ሰኞ ግንቦት 29 ቀጠሮ ሰጥቷል።

በአዳራሽ በኩል የተሰየመውን የዛሬው ችሎት በአካል ቀርቦ የተከታተለው ጋዜጠኛ ተመስገን ከሰብዓዊ መብት ጋር የተያያዙ ሁለት አቤቱታዎችን በጠበቃው በኩል አቅርቧል። አቶ ሔኖክ ደንበኛቸው በሚገኙበት ማረፊያ ቤት “ንጹህ ሻወር እና ሽንት ቤት የለም። ይህም ለተላላፊ በሽታ ያጋልጣቸዋል” ሲሉ የመጀመሪያውን አቤቱታ በቃል ለችሎቱ አሰምተዋል።  

ጠበቃው ያቀረቡት ሌላኛው አቤቱታ ጋዜጠኛ ተመስገን በተያዘበት የሶስተኛ ፖሊስ ጣቢያ ያለውን የማረፊያ ክፍል የተመለከተ ነው። ጠበቃ ሄኖክ “30 ሰው በሚይዝ ክፍል ውስጥ ከ400 በላይ ታጭቆ ነው ያለው። ይህ ለጤናቸው አስጊ ነው” ሲሉ ለፍርድ ቤቱ አስረድተዋል። ጠበቃ ሔኖክ፤ የጋዜጠኛ ተመስገን ደሳለኝ አያያዝ እንዲስተካከል ትዕዛዝ እንዲሰጥላቸው አሊያም ኃላፊው ቀርበው እንዲያስረዱ አመልክተዋል። 

ከአዲስ አበባ አበባ ፖሊስ ኮሚሽን የመጡት መርማሪዎች በችሎት ለተነሳው ጉዳይ በሰጡት ምላሽ “የእስረኛ አስተዳደር አይደለንም። የምርመራ ስራ ነው የምንሰራው” ብለዋል። የተመስገን ጠበቃ ያቀረቡትን አቤቱታ የሰማው ችሎቱ “ምርመራው ሰብዓዊ መብታቸውን ባከበረ መልኩ እንዲከናወን” ትዕዛዝ ሰጥቷል። (ኢትዮጵያ ኢንሳይደር)

The post በጋዜጠኛ ተመስገን ደሳለኝ ላይ የ10 ቀናት የምርመራ ጊዜ ተፈቀደ appeared first on Ethiopia Insider.

Source: Link to the Post

Leave a Reply