በፍጥነት መገደቢያ መሳሪያ አተገባበር ላይ ማሻሻያ ተደረገ፡፡

ከዚህ ቀደም ተግባራዊ ሲደረግ የቆየው መመሪያ ላይ ማሻሻያ ማድረግ በማስፈለጉ በተሽከርካሪዎች ላይ የፍጥነት መገደቢያ መሳሪያ መግጠም ሳያስፈልጋቸው አገልግሎቱን እንዲያገኙ መወሰኑን የትራንስፓርትና ሎጂስቲክ ሚኒስቴር አስታውቋል፡፡

እንደሚታወቀው ወደ ሃገራችን በሚገቡ አዳዲስ ተሽከርካሪዎች ከሌሎች ቅደመ ሁኔታዎች በተጨማሪነት የፍጥነት መገደቢያ መሳሪያ የማስገጠምና በተቀመጠም ስታንዳርድ መሰረት መገጠሙን የሚያረጋግጥ ማስረጃ የማቅረብ ግዴታ ነበረባቸው፡፡

ይሁንና በአተገባበሩ ላይ እየታየ ያለውን ብልሹ አሰራርና የመልካም አስተዳደር ችግሮችን ለመፈተሸ እና ዘላቂ መፍትሄ ለመስጠት የሚያስችል አሰራርና አደረጃጀት ተጠናቆ ተግባራዊ እስኪደረግ ድረስ እንዲሁም የፍጥነት መገደቢያ መሳሪያው ሊገጠምባቸው የሚገባቸው ተሸከርካሪዎች አይነትና ሌሎች ተያያዥ ችግሮችን በጥናት ምላሽ መስጠት በማስፈለጉ በፍጥነት መገደቢያ መሣሪያ አተገባበር ላይ ማሻሻያ ማደረጉን የትራንስፓርትና ሎጂስቲክ ሚኒስቴር ለኢትዮ ኤፍ ኤም በላከው መግለጫ አስታውቋል፡፡

ስለሆነም አዲስ ተሽከርካሪዎችን ወደ ሃገር ውስጥ የሚያስገቡ ባለንብረቶች በማንኛውም ጊዜ መግጠም እንዳለባቸው አውቀው የግዴታ ስምምነቱን እየፈረሙና አስፈላጊ ሰነዶቻቸውን በአባሪነት እንዲያያይዙ ተደርጎ በተሽከርካሪዎች ላይ የፍጥነት መገደቢያ መሳሪያ መግጠም ሳያስፈልጋቸው አገልግሎቱን እንዲያገኙ ተወስኗል ሲል ሚኒስቴር መስሪያ ቤቱ አስታውቋል፡፡

ኢትዮ ኤፍ ኤም 107.8 የኢትዮጵያውያን
ታህሳስ 06 ቀን 2014 ዓ.ም

Facebooktwitterredditpinterestlinkedinmail

Source: Link to the Post

Leave a Reply