ባልደራስ ለእውነተኛ ዴሞክራሲ በአማራ ህዝብ ላይ እየደረሰ ያለውን የዘር ጭፍጨፋ አወገዘ አሻራ ሚዲያ ታህሳስ 21/2013 ዓ.ም ባህር ዳር በ…

ባልደራስ ለእውነተኛ ዴሞክራሲ በአማራ ህዝብ ላይ እየደረሰ ያለውን የዘር ጭፍጨፋ አወገዘ አሻራ ሚዲያ ታህሳስ 21/2013 ዓ.ም ባህር ዳር በመተከልና በወለጋ የሚደረገውን የዘር ጭፍጨፋ አስመልክቶ የባልደራስ ለእውነተኛ ዲሞክራሲ ፓርቲ ስራ አስፈፃሚ ትናንት ታህሳስ 20/2013 ዓ.ም. ባካሄደው ስብሰባ በሀገራችንና በወቅታዊ ሀገራዊ ጉዳይ ላይ ሰፊ ውይይት አድርጎ ሰላማዊ ሰልፍ ለማካሄድ ወሳኔ አስተላልፏል፡፡ የሰላማዊ ሰልፉ መካሄድ አራት መሰረታዊ ጭብጦች እንዳሉት የተዘረዘረ ሲሆን እነርሱም በሀገራችን `ኢትዮጵያ ማንነትን መሰረት ያደረገ ጥቃት በተደጋጋሚ በቤኒሻንጉል ጉሙዝ/መተከል አካባቢ፣በወለጋ፣በጉራ ፈርዳና በደቡብ የሀገራችን ክፍልም በሰገን ህዝቦች ቀጣና አካባቢ በጉማይዴ ህዝብ ላይ የተካሄደውን የዘር ማጥፋትን በመቃወም፤ የሱዳንን የድንበር ጥሰት በመቃወም፤ የኦሮሚያ ክልላዊ መንግስት በአዲስ አበባ ከተማ ስለሚገነባቸው ግንባታዎች ጉዳይ እና ስለ ባልደራስ ለእውነተኛ ዲሞክራሲ ፓርቲ አመራሮች እስር እና ዳተኛ ስለሆነው የፍትህ ሂደት ሰላማዊ ሰልፍ ለጥር 09/2013 ዓ.ም. የተጠራ ሲሆን ሰላማዊ ሰልፉን የሚያስተባብር ግብረ – ኃይልም አቋቁሚያለሁ ነው ያለው፡፡ በዓለም ላይ ማንነትን መሠረት አድርጎ የሚፈፀም ግፍ እየጠፋ ነው፡፡ ይሁን እንጂ በሀገራችን ኢትዮጵያ በተደጋጋሚ ዜጎች በማንነታቸው ምክንያት እየተገደሉ ይገኛሉ፡፡ ግልፅ የሆነ የዘር ፍጅት ወንጀል እየተፈፀመ መሆኑም ለማንኛውም ሰው ግልጽ ነው ፡፡ ለዚህ ማሳያ ደግሞ ታህሳስ 13 ቀን 2013 ዓ.ም ከ207 በላይ የአማራ ተወላጆች በመተከል በማንነታቸውና በቀለማቸው ምክንያት ተገድለዋል፡፡ በዚህም ባልደራስ የተሰማውን መሪር ሐዘን ገልጻል፡፡ ከዚህ በፊት በቤንሻንጉል ጉምዝ አካባቢ በተደጋጋሚ አንድን ዘር መሠረት ያደረገ ተመሳሳይ ግድያ መፈፀሙንም አለም ያውቃል፡፡ የአማራ ተወላጆች በወለጋ፣ በጉራ ፈርዳ፣ በቤንሻንጉልና በሌሎች አካባቢዎች በማንነታቸው ብቻ ለዘር ፍጅት እየተዳረጉ ይገኛሉ፡፡ በሀገራችን ኢትዮጵያ ሌላው የዘር ፍጅት የሚካሄድበት አካባቢ ደግሞ በሰገን ሕዝብ አካባቢ ነው፡፡ በደቡብ ኢትዮጵያ የጉማይዴ ነዋሪዎችና የኩስሜ ብሔረሰብ አባላት አካባቢ ወገኖቻችን እያለቁ መሆኑም ይታወቃል፡፡ ይህን የዘር ፍጅት ማስቆም ያልቻለ መንግስት ምን ያደርጋል የሚለው የሁሉም ኢትዮጵያውያን ጥያቄ ነው፡፡ የኩስሜ ብሔረሰብ በቁጥሩ አነስተኛ ሲሆን 40‚000 ሺህ የሚሆኑ ዜጎች ያሉት ነው፡፡ የኩስሜ ዜጎች በአነሷቸው የመልካም አስተዳደር ጥያቄዎች፣ የንፁህ ውሃ አገልግሎት ጥያቄዎች ለእልቂት ተዳርገዋል፡፡የኩስሜ ብሔረሰብ አስተዳደር ካሉት 9 አስተዳደር ቀጣናዎች መካከል በ7ቱ ቀጣናዎች ከፍተኛ የሰብዓዊና ቁሳዊ ውድመት የደረሰ ሲሆን በተለይ ቀጣና 1 ሙሉ በሙሉ ወድሞ የኩስሜ ብሔር አባላት ተሰደዋል፡፡ በተመሳሳይ በአሁን ሰዓት በምስራቅ ወለጋ ጌዳ ወረዳ፣በምዕራብ ወለጋ ሳምቦ ወረዳ፣ በሆሮ-ጉድሩ ዞን እየተፈፀመ ያለው ታሪክ ይቅር የማይለው የግፍ ጭፍጨፋ ሊቆም አልቻም፡፡ ይህ ሁሉ ሲሆንና ማንነትን መሠረት ያደረገ ጥቃት ሲፈፀም ፌደራል መንግስትም ሆነ የክልሉ መንግስት ትኩረት አልሰጡትም፡፡ በአሁኑ በኩስሜ ብሔር አካባቢ የትምህርት ተቋማት፣ ጤና ጥበቃ ተቋማት፣ ግብርና ወዘተ የመሳሰሉት ተቋማት ፈርሰዋል ሕዝቡ በስደትና በስጋት ቁም ስቅሉን እያየ ይገኛል፡፡ በዚሁ በሰገን ሕዝቦች አካባቢ የጉማይዴ ሕዝብ የማያባራ የዘር ፍጅት ወንጀል እየተፈፀመበት ነው፡፡ ዛሬ ጉማይዴ ውስጥ በሰላም ውሎ በሰላም መግባት የማይቻልበት ደረጃ ላይ ተደርሷል፡፡ በ10000 ሺህ የሚቆጠሩ የጉማይዴ ነዋሪዎች ተሰደዋል ተፈናቅለዋል። የአማራ ህዝብ በማንነቱ ጥቃት ሲደርስበት የሚከላከልለት ከማጣቱም በላይ በተሰደደባቸው አካባቢዎች የዕለት ደራሽ እርዳታ ማግኘትም አልቻለም፡፡ መንግስት ለዚህ ሕዝብ ሰላምና ፀጥታ መከታ መሆን አለመቻሉም ብቻ ሳይሆን ሕዝቡን የጎዳው በጥቃቱ የመንግስት ባለሥልጣናት ቀጥተኛ እጅ መኖሩ ነው፡፡ ይህ ሕዝብ የሚደርስበት ግፍ የማያባራው ጥቃቱ በመንግስት የተደራጀ ኃይል እየተፈፀመ በመሆኑ ነው፡፡ በሀገራችን ውስጥ እየተፈፀመ ያለውን ማንነት ተኮር የሆነ የዘር ፍጅት ሕዝባችን ለእልቂት ከመዳረጉም በላይ በየጊዜው የሚያልቁ ወገኖቻችን አስከሬናቸው እንኳን በወጉ አያርፍም፡፡ በታህሳስ 13 ቀን 2013 ዓ.ም በመተከል የተጨፈጨፉት ከ207 በላይ ወገኖቻችንን መንግስት በግሪደር አንድ ጉድጓድ ውስጥ እንዲቀበሩ አድርጓል፡፡ በዓለም አቀፍ የዘር ፍጅት ጥናት ውስጥ የዘር ፍጅት አንዱ መገለጫ በጅምላ መግደልና በጅምላ መቅበር ነው፡፡ በጅምላ መቅበር አንዱ የዘር ፍጅት የመደምደሚያው ወንጀል ነው፡፡ መንግስት ይህንን ወንጀል በገሀድ ፈፅሞታል፡፡ ይህ ጉዳይ የሀገራችንን ባህል፣ ኃይማኖትና የቀብር ሥርዓት የጣሰ እና ያላገጠ ሲሆን ሥነ-ልቦናቸውንም ጎድቷል፡፡ በመሆኑም መንግስት ሊጠየቅበት ይገባል፡፡ በአጠቃላይ በሀገራችን ውስጥ የዘር ፍጅት ወንጀል በየጊዜው እየተፈመ ሲሆን ፌደራል መንግስትም ሆነ የክልል መንግስት ይህንን ወንጀል ለመመከት አልቻሉም ተጠያቂም ናቸው፡፡ በዓለም አቀፍ የዘር ፍጅት ወንጀል ክስ ወቅት በየትም ሀገር የዘር ፍጅት ሲፈፀም ተጠያቂው ራሱ መንግስት ነው፡፡ በመሆኑም ለኢትዮጵያ ሕዝብና ለዓለም አቀፍ ማህበረሰብ የሚከተሉትን አስቸኳይ ጥሪዎች እናቀርባለን ሲል ባልደራስ ለእውነተኛ ዲሞክራሲ ፓርቲ መግለጫ አውጥቷል፡- 1ኛ. የዘር ፍጅት ምልክቶች የሚታዩባቸው አካባቢዎች በፍጥነት ሠራዊታችን በቂ ኃይል እንዲያሰፍር፣ 2ኛ. መላው የሀገራችን ሕዝብ የዘር ፍጅትን በሰላማዊ መንገድ ብቻ ነቅቶና ተግቶ እንዲቃወም፣ 3ኛ. ሁሉም የፖለቲካ ኃይሎች ይህንን ክፉ ወንጀል በመቃወም በአንድነት እንዲቆሙ 4ኛ. በሀገር ውስጥና በውጪ ያላችሁ የኢትዮጵያ ምሁራን በኢትዮጵያ ውስጥ እየተፈፀመ ያለውን የዘር ፍጅት ወንጀል ወደ ሕግ እንድታቀርቡ፣ 5ኛ. በኢትዮጵያ ውስጥ የምትገኙ የሀገር ውስጥና የውጪ ሀገር ሰብዓዊ መብት ተቋማት በሙሉ ይህንን ወንጀል እንድትቃወሙ እና ወንጀል የፈፀሙት ኃይሎች ወደ ሕግ እንዲቀርቡ እንድትታገሉ፣ 6ኛ. የተባበሩት መንግስታት ድርጅትና ወዳጅ ሀገራት በሙሉ የዘር ፍጅት ወንጀልን እንድታወግዙና በመንግስት ላይ ተገቢውን የዲፕሎማሲ ተፅዕኖ በማሳደር ወንጀሉ እንዲቆም እና ወንጀለኞች ለፍትህ እንዲቀርቡ እንድታደርጉ፣ 7ኛ. መላው የሀገራችን ሕዝብ በዘር፣ በኃይማኖት፣ በብሔር ሳንከፋፈል ከመቼውም ጊዜ በላይ በአንድነት ፀንተን እንድንቆምና የዘር ፍጅት እንድንከላከልና የተባበረችውን ኢትዮጵያችንን በጋራ እንድንገነባ በትህትና እንጠይቃለን በማለት መግለጫ ሰጥቷል፡፡ የባልደራስ ለእውነተኛ ዲሞክራሲ ፓርቲ ስራ አስፈፃሚ ትናንት ታህሳስ 20/2013 ዓ.ም. ባካሄደው ስብሰባ በሀገራችን ጉዳይ ላይ ሰፊ ውይይት አድርጎ በወቅታዊ ሀገራዊ ጉዳዬች ላይ ሰላማዊ ሰልፍ ለማካሄድ ወሳኔ አስተላልፏል፡፡

Source: Link to the Post

Leave a Reply