ባልደራስ የአዲስ አበባ ከንቲባ ያለመከሰስ መብት ተነስቶ ለህግ እንዲቀርቡ ጠየቀ

ፓርቲው የኦሮሚያ ሰንደቅ ዓላማ እና መዝሙር በአዲስ አበባ ት/ቤቶች እንዳይይሰቀል እና እንዳይዘመርም አሳስቧል

ዕረቡ ሐምሌ 13 ቀን 2014 (አዲስ ማለዳ) ባልደራስ ለእውነተኛ ዲሞክራሲ ፓርቲ የአዲስ አበባ ከተማ አስተዳደር ከንቲባ አዳነች አበቤ ያለመከሰስ መብት ተነስቶ ለህግ እንዲቀርቡ ጠየቀ።
እንዲሁም የኦሮሚያ ሰንደቅ ዓላማ እና መዝሙር በአዲስ አበባ ትምህርት ቤቶች ላይ እንዳይይሰቀል እና እንዳይዘመር ፓርቲው አሳስቧል።
ባልደራስ ይህን ያለው በዛሬው ዕለት ወቅታዊ ጉዳዮችን አስመልክቶ ባወጣው መግለጫ ላይ ነው።
በመግለጫውም፤ የኢትዮጵያ ሕዝብ ላይ በገዥው ፓርቲ እየተፈጸሙበት ያሉት የሰብዓዊ መብት ረገጣዎች፣ ፖለቲካዊ፣ ኢኮኖሚያዊ እና ማህበራዊ ቀውሶች ከጊዜ ወደ ጊዜ እየከፉ በመሄድ ላይ ይገኛሉ ብሏል።
የከንቲባ አዳነች አበቤ የሥልጣን ዘመን ከተማዋን ከገጠሟት አስከፊና ብልሹ አስተዳደሮች መካከል ግንባር ቀደሙ ከመሆኑም ባሻገር፣ ለሕዝቡ ማንነት ባለው የጠላትነት መንፈስ ከተማዋንም ሆነ አገሪቷን ወደ ቀውስ በፍጥነት እና በጥልቀት እየገፋት ይገኛል ሲልም ፓርቲው በመግለጫው ገልጿል፡፡
ከንቲባዋ ከፍተኛ ሙስና ውስጥ እንደተዘፈቁም ሰሞኑን የጋራ መኖሪያ ቤቶችን ለባለ እድለኞች ለመስጠት በወጣው የተጭበረበረ ዕጣ ላይ ወለል ብሎ ታይቷል ያለው ባልደራስ፤ በዚህ ሂደት፣ አዳነች አበቤ በከንቲባነታቸው ካለባቸው ሀላፊነት ባሻገር፣ በድርጊቱ መሪ ተዋናይ እንደነበሩ በርካታ መረጃዎች ተገኝቶባቸዋል ሲል ገልጿል፡፡
ፓርቲው ”የተጭበረበረው ዕጣ ከመውጣቱ ጥቂት ሰዓታት በፊት፣ በከንቲባዋ የተላከ አንድ ግለሰብ የታሸገውን ኮምፒዩተር ከፍቶ ሲነካካ እንደነበር እና መልዕክተኛው ምን ይሠራ እንደነበር የሚከታተል ሌላ ሰው በአጠገቡ ያልነበረ መሆኑ አንዱ መረጃ ነው“ ያለ ሲሆን፤ ይህ መረጃ፣ ከንቲባዋ በፖሊስ ለመጠየቅ የሚያበቃቸው መሆኑ የአገራችንን የቆየ የፍትህ ሥርዓት በርቀት እንኳን ለሚያውቀው የተሰወረ አይደለም ብሏል፡፡
በተጨማሪም፣ ከንቲባዋ የዕጣውን መረጃ የያዘ ፍላሽ፣ ከመንግሥት አሠራር ውጭ በግል መውሰዳቸውም ታውቋል ያለው ፓርቲው፤ “ከዚህ ቀደም ብሎ፣ እሳቸው በሚመሩት እና በሚቆጣጠሩት የከተማው አስተዳዳር የተሰራው የዕጣ ማውጫ ሶፍትዌር ለማጭበርበር እንደሚያመች ከፌደራሉ ኢኖቬሽን እና ቴክኖሎጂ ሚኒስትር በደብዳቤ እንዲያውቁት ተደርጎ፣ ምንም እርምጃ እንዳልወሰዱ ከመረጃም ባሻገር በማስረጃ ተረጋግጦባቸዋል” ሲልም ገልጿል፡፡
በመሆኑም “ከንቲባዋን ትቶ ሌሎች የአዲስ አበባ አስተዳዳር ባለሥልጣናት እና ሙያተኞች ላይ እርምጃ መወሰዱ የፍትህ ሥርዓቱን ባዶነት እና አድሎኝነት አጋልጧል” ሲል በመግለጫው ያስታወቀው ባልደራስ፤ ”ኹሉም ዜጎች በህግ ፊት እኩል ናቸው ከተባለ፣ የከንቲባዋ ያለመከሰስ መብት ተነስቶ በተነሱት ጥያቄዎች ላይ ለፖሊስ ቃላቸውን መስጠት ይገባቸዋል“ ሲል አሳስቧል፡፡
በተጨማሪም ባልደራስ ”በከተማዋ ላይ የተከፈተው ድምጽ አልባ ወረራ፣ በዚህ ሳምንት የመጨረሻው ከፍታ ላይ ደርሶ የኦሮሚያ ክልል ህገ መንግሥት በከተማዋ ተግባራዊ እንደሚሆን፣ እንዲሁም፣ በአዲስ አበባ ትምህርት ቤቶች የኦሮሚያ ክልል መዝሙር እንደሚዘመር እና ባንዲራውም እንደሚሰቀል ከከንቲባዋ አንደበት ተደምጧል“ ያለው ሲሆን በመሆኑም በሚከተሉት ጉዳዮች ላይ መንግሥት አስቸኳይ እርምጃ እንዲወስድ አሳስቧል።
እነዚህም:-
1. ከተጭበረበረው የጋራ መኖሪያ ቤቶች ዕጣ ጋር በተያያዘ፣ የከንቲባዋ ያለመከሰስ መብት ተነስቶ ለህግ እንዲቀርቡ፣
2. የኦሮሚያ ክልል ህገ መንግሥት በአዲስ አበባ ከተማ ተግባራዊ እንዳይሆን፣
3. የኦሮሚያ ክልል ባንዲራና መዝሙር በአዲስ አበባ ትምህርት ቤቶች እንዳይሰቀል እና እንዳይዘመር በጥብቅ ማሳሰቡን ባልደራስ ለእውነተኛ ዲሞክራሲ ፓርቲ በመግለጫው አስታውቋል።

Source: Link to the Post

Leave a Reply