ባጃጅ በመቀማት ኹለት ሰዎችን ገድለው በውሃ መፍሰሻ ቱቦ ውስጥ ከተዋል ከተባሉ 3 የጥበቃ ሠራተኞች ውስጥ 2ቱ የእድሜ ልክ እስራት ተፈረደባቸው

3ኛው ተከሳሽ በ15 ዓመት ፅኑ እስራት እንዲቀጣ ተወስኗል

ዕረቡ ሐምሌ 27 ቀን 2014 (አዲስ ማለዳ) ፍርድ ቤቱ በቦሌ ክ/ከተማ፤ ወረዳ 12 ልዩ ቦታው ቦሌ ቡልቡላ ሙሉ ወንጌል አጠቢያ ቤተ ክርስቲያን ተብሎ በሚጠራው አካባቢ ባለ 3 ጓማ ተሽከርካሪ (ባጃጅ) በመቀማት፤ ኹለት ሰዎችን ገድለው የመንገድ ውሃ መፍሰሻ ቱቦ ውስጥ ከተዋል ተብለው ከተከሰሱ 3 የጥበቃ ሠራተኞች ውስጥ፤ ኹለቱ በእድሜ ልክ እስራት ሲቀጡ፤ 3ኛው ተከሳሽ በ15 ዓመት ፅኑ እስራት እንዲቀጣ ወሰነ፡፡

ውሳኔውን ያስተላለፈው የፌዴራል ከፍተኛ ፍ/ቤት ልደታ ምድብ 1ኛ የሰው መግደል ወንጀል ችሎት ሲሆን፤ ተከሳሾቹም 1ኛ ተከሳሽ ዘካሪያስ ኮዶ 2ኛ ተከሳሽ ዮሃንስ ማጠሉ 3ኛ ተከሳሽ አስራት አበበ የተባሉት ግለሰቦች ናቸው።

የዐቃቤ ህግ የክስ መዝገብ እንደሚያሳየው፤ተከሳሾቹ በተለያየ ጊዜ በመገናኘት ባጃጅ ከግለሰቦች ላይ በሀይል ለመንጠቅ ሲመካከሩ እና ሲዘጋጁ ቆይተው፤ ጥር 27 ቀን 2013 ከምሽቱ 2 ሰዓት ከ30 ሲሆን በቦሌ ክ/ከተማ ወረዳ 12 ክልል ልዩ ቦታው ቦሌ ቡልቡላ ሙሉ ወንጌል አጠቢያ ቤተ ክርስቲያን አካባቢ የባጃጅ ባለቤት የሆነው ሟች ማናየ እንየውን በ30 ብር ኮንትራት በማናገር ወደ ሙሉ ወንጌል ቤተክርስቲያን እንዲወስዳቸው በመስማማት ከሥፍራው ያደርሳቸዋል።

በማስከተልም ከባጃጁ ሊያወርዳቸው ሲቆም 3ኛ ተከሳሽ ሟችን በክርኑ አንቆ በመያዝና ህይወቱ እንዲያልፍ ያደረገው መሆኑን የጠቀሰው ዓቃቢህግ፤ 2ኛ እና 3ኛ ተከሳሾች የሟችን እግር በጋራ ይዘው በማውረድ መሞቱን ሲያረጋግጡ ከቤተ ክርስቲያኑ ፊት ለፊት ካለ የመንገድ ቱቦ (የውሃ መውረጃ) በመክተት፤ የሟችን 500 ብር የሚገመት ስልክ እና 185 ሺህ ብር የሚገመት ባጃጅ መውሰዳቸውን በክስ ዝርዝሩ አስረድቷል፡፡

በተጨማሪም የመጀመሪያውን ወንጀል ከፈጸሙ ከአምስት ቀናት በኋላ፤ የካቲት 2 ቀን 2013 ከምሽቱ 03 ሰዓት ከ30 ሲሆን፤ 1ኛ እና 2ኛ ተከሳሾች ምትኩ መለሰ የተባለን ግለሰብ 1ኛ ተከሳሽ የጀኔሬተር ባትሪ ሊሸጥለት በተስማሙት መሰረት ደውሎ እንዲመጣ በማድረግ ተከሻሶች በጥበቃ ሠራተኝነት ተቀጥረው ከሚሰሩበት ሙሉ ወንጌል ቤተ ክርስቲያን ጊቢ ውስጥ እንዲገባና እንዲደበቅ ካደረገው በኋላ፤ 2ኛ ተከሳሽ “ሌባ ሌባ” በማለት ሟችን በያዘው የጥበቃ ዱላ ጭንቅላቱን ሲመታው 1ኛ ተከሳሽም ሟች በወደቀበት የመታው በመሆኑ ህይወቱ ማለፉ ዐቃቤ ህግ ገልጿል።

ተከሳሾቹ የሟቹን 450 ብር የሚገመት ስልክ እና ይዞት የነበረውን 3 ሺህ ብር በመውሰድ ከአሁን በፊት የማናየ እንየውን አስክሬን በከተቱበት ቱቦ ውስጥ መደበቃቸውም በክሱ ተዘርዝሯል።

ተከሳሾች በፖሊስ ክትትል እና በህብረተሰቡ ድጋፍ ተይዘው በ1996 የወጣውን የኢፌዲሪ የወንጀል ህግ በመተላለፍ በፈጸሙት የሰው መግደል እና ከባድ የውንብድና ወንጀል ክስ ተመስርቶባቸውዋል፡፡

በፌዴራል ከፍተኛ ፍ/ቤት ልደታ ምድብ 1ኛ የሰው መግደል ወንጀል ችሎት የቀረቡት ተከሳሾች ድርጊቱን አልፈፀምንም በሚል የእምነት ክህደት ቃላቸውን የሰጡ በመሆኑ፤ ዐቃቤ ህግ ያሰባሰባቸውን የሰው እና የሰነድ ማስረጃዎች በማቅረብ ተከራክሯል።

ተከሳሾችም መከላከያ ማስረጃ በማቅረብ ያሰሙ ቢሆንም፤ በዐቃቤ ህግ የቀረበውን ሰው እና የሰነድ ማስረጃ ማስተባበል ባለመቻላቸው ፍ/ቤቱ ተከሳሾቹን በተከሰሱበት አንቀፅ ሥር ጥፋተኛ ናቸው ብሏል፡፡

በመጨረሻም ሐምሌ 25 ቀን 2014 በዋለው ችሎት 1ኛ እና 2ኛ ተከሳሾች የፈፀሙት ተደራራቢ ወንጀል በመሆኑ፤ በኹለቱም ክሶች አንድ የቅጣት ማክበጃ በመያዝ እያንዳንዳቸው በእድሜ ልክ ፅኑ እስራት እንዲቀጡ፤ 3ኛ ተከሳሽ 4 የቅጣት ማቅለያ ተይዞለት በ15 ዓመት ፅኑ እስራት እንዲቀጣ በፍርድ ቤቱ መወሰኑን የፍትህ ሚኒስቴር መረጃ አመላክቷል።

Source: Link to the Post

Leave a Reply