ቻርለስ ንጉስ መሆናቸው በይፋ ታወጀ  

https://gdb.voanews.com/09d40000-0a00-0242-e9d4-08da9325e400_w800_h450.jpg

የዳግማዊት ንግስት ኤልሳቤጥ ህይወት ማለፉን ተከትሎ ልጃቸው ቻርልስ ዛሬ በለንደን ቅዱስ ጄምስ ቤተመንግስት በተካሄደ ስርዓት ንግስናቸውን ተቀብለዋል።

ንጉስ ቻርለን እናታቸው ሐሙስ እለት ማረፋቸውን ተከትሎ ወዲያውኑ ንጉስ የሆኑ ሲሆን ከዚህ በኃላ ሳልሳዊ ንጉስ ቻርልስ በመባል ይጠራሉ። ቅዳሜ እለት ንግስናውን ባወጀው ጉባኤ የተካሄደው ስነስርዓት በቴሌቭዥን በቀጥታ የተላለፈው ለመጀመሪያ ግዜ ነው።

የ73 ዓመት እድሜ ያላቸው ቻርለስ ንግስና ለመቀበል በእድሜ የገፉ የመጀመሪያው ንጉስ ሲሆኑ እናታቸው በ96 አመታቸው ህይወታቸው እስካለፈበት ጊዜ ድረስ፣ ላለፉት ሰባት አስርት አመታት እንዳደረጉት “በታማኝነት፣ በአክብሮት እና በፍቅር” እንደሚያገለግሉ ተናግረዋል።

ቻርልስ አርብ እለት ከባለቤታቸው ካሚላ ጋር በመሆን ስኮትላንድ ከሚገኘው ባልሞራል ካስል የተሰኘው መኖሪያ ቤታቸው ተነስተው ለንደን የሚገኘው ቤተመንግስት ሲደርሱ በርካቶች መልካም ምኞት ገልፀውላቸዋል።

አርብ እለት በቅዱስ ጳውሎስ ካቴድራል ለንግስቷ ማስታወሻ በተካሄደ ስነስርዓት ላይ ወደ 2ሺህ የሚጠጉ ሰዎች መገኘታቸው ታውቋል። የዳግማዊ ንግስት ኤልሳቤት የቀብር ስነስርዓት በመጪዎቹ ቀናት የሚካሄድ ሲሆን ሌሎች ንጉሳዊ ቤተሰቦች እና ክቡራን እንግዶች ይገኛሉ ተብሎ ይጠበቀል። ፕሬዝዳንት ጆ ባይደንም ለቀብሩ ወደ እንግሊዝ እንደሚጓዙ አስታውቀዋል።

ይህ በእንዲህ እንዳለ አውስትራሊያኖች በንግስት ኤልሳቤጥ ሞት በከፍተኛ ሁኔታ ማዘናቸው ተገልጿል። የሀገሪቱ የፖለቲካ አመራሮች ሀዘናቸውን ለመግለፅ ዛሬ በፌደራል ፓርላማቸው ጉንጉን አበባ ያኖሩ ሲሆን ጠቅላይ ሚኒስትሩ አንተኒ አልባኒዝ “ንግስቷ ለአውስትራኢያኖች ጎርፍ እና ሰደድ እሳት በመሳሰሉ አሳዛኝ አደጋዎች ውስጥ ሲያልፉ አሳይታ የነበረውን ርህራሄ አስታውሰዋል”

 እ.አ.አ በ1954 አውስትራሊያን በመጎብኘት ንግስት ኤልሳቤት የመጀመሪያዋ የእንግሊዝ ንጉሳዊ ቤተሰብ ሲሆኑ በወቅቱ ወደ 70 ከመቶ የሚገመት ህዝብ እሳቸውን ለማየት አደባባይ ወጥቶ ነበር። 

Source: Link to the Post

Leave a Reply