ንብረትነቱ የስዊድን ኤምባሲ የሆነ እና አራት ሚሊዮን ብር የዋጋ ግምት ያለው ተሽከርካሪ የሸጠ ግለሰብ ከነኤግዚቢቱ በቁጥጥር ስር ዋለ።***የወንጀል ድርጊቱ የተፈፀመው በልደታ ክፍለ ከተማ ወ…

ንብረትነቱ የስዊድን ኤምባሲ የሆነ እና አራት ሚሊዮን ብር የዋጋ ግምት ያለው ተሽከርካሪ የሸጠ ግለሰብ ከነኤግዚቢቱ በቁጥጥር ስር ዋለ።

***
የወንጀል ድርጊቱ የተፈፀመው በልደታ ክፍለ ከተማ ወረዳ 7 ልዩ ቦታው ጥቁር አንበሳ ተብሎ በሚጠራው አካባቢ በሚገኘው ስዊድን ኤምባሲ ውስጥ ነው።

ተጠርጣሪው ግለሰብ በኤምባሲው ውስጥ በሹፍርና ሞያ ተቀጥሮ እየሠራ የነበረ ሲሆን የሚያሽከረክረውን የሰሌዳ ቁጥር ኮ.ዲ 11-028 ቶዮታ ራቫ ፎር የሆነ ተሽከርካሪ ይዞ መሰወሩን የልደታ ክ/ከተማ ፖሊስ መምሪያ ወንጀል መርማሪ ዋና ሳጅን ውባለ ሻምበል ገልፀዋል ።

ተሽከርካሪው መጥፋቱን ያረጋገጡ ጉዳዩ የሚመለከታቸው የኤምባሲው የስራ ሃላፊዎች ለልደታ ክፍለ ከተማ ፖሊስ መምሪያ ማመልከታቸውን የጠቀሱት መርማሪው፤ ፖሊስም የምርመራ እና የክትትል ቡድን በማቋቋም ባደረገው ጥረት ተጠርጣሪው በልደታ ክፍለ ከተማ ወረዳ 7 ልዩ ቦታው ጎላ ሚካኤል ተብሎ በሚጠራው አካባቢ በቁጥጥር ስር ሊውል መቻሉን ተናግረዋል፡፡

አራት ሚሊዮን ብር የዋጋ ግምት ያለውን እና ከኤምባሲው የተወሰደውን ተሽከርካሪ ለማስመለስ በተከናወነ ምርመራ የማስፋት ስራ ተጠርጣሪው ወደ ትግራይ ክልል መቀሌ ከተማ በመውሰድ በአንድ ሚሊዮን 175 ሺህ ብር እንደሸጠው በማረጋገጥ ከተሸጠበት እንዲመለስ መደረጉን ዋና ሳጅን ውባለ አስረድተዋል፡፡

ማንም ሰው ወንጀል ፈፅሞ ከህግ ለማምለጥ ቢሞክርም የኋላ ኋላ ከተጠያቂነት እንደማይድን ያስታወሱት መርማሪው፤ ግለሰቦችም ሆኑ ተቋማት በተለያዩ ምክንያትና ሁኔታዎች ንብረታቸውን ለሌሎች ሰዎች በእምነት አሳልፈው ከሰጡ በኋላ ተገቢውን ክትትልና ቁጥጥር ቢያደርጉ ተመሳሳይ ወንጀሎችን መከላከልና መቀነስ እንደሚቻል በማመን የሚጠበቅባቸውን ሃላፊነት እንዲወጡ የአዲስ አበባ ፖሊስ መልዕክቱን አስተላልፏል፡፡

ምንጭ፡- አዲስ አበባ ፖሊስ

መጋቢት 05 ቀን 2016 ዓ.ም

ውድ አድማጮቻችን እና ተከታዮቻችን የኢትዮ ኤፍ ኤም ወቅታዊ አዳዲስ መረጃዎችና ፕሮግራሞችን ለማግኘት ከታች ያሉትን ገፆቻንን ይጎብኙ ቤተሰብ ይሁኑ ።

Telegram https://t.me/ethiofm107dot8

Twitter https://twitter.com/EthioFM

YouTube https://www.youtube.com/@onelovebroadcast/videos

Facebook https://www.facebook.com/onelovebroadcast

Source: Link to the Post

Leave a Reply