“አሸባሪዎችን ለማጥፋት የሚደረገውን ጥረት በጋራ አጠናክረን እንቀጥላለን”፦የአማራ እና የኦሮሚያ ክልል ከፍተኛ የሥራ ሀላፊዎች

ሰኞ ሰኔ 20 ቀን 2014 (አዲስ ማለዳ) የአማራ እና የኦሮሚያ ክልል ከፍተኛ የሥራ ሀላፊዎች በወቅታዊ አገራዊ ጉዳይ ውይይት ባደረጉበት ወቅት፤ የአሸባሪዎች ፍላጎት እና ጥፋት የኹለቱን ሕዝቦች አንድነት አይሸረሽረውም ብለዋል።

የአማራ ክልል ርዕሰ መስተዳድር ይልቃል ከፋለ (ዶ.ር) ሰሞኑን በኦሮሚያ ክልል ምዕራብ ወለጋ ጊምቢ ወረዳ የተጨፈጨፉት ንጹሀን ወገኖች በመጀመሪያ የኦሮሚያ ክልል ነዋሪ ቀጥሎ ኢትዮጵያዊ ናቸው፤ ይህን ደግሞ በጋራ አውግዘናል ብለዋል።

ሸኔ የአማራ ብቻ ጠላት አለመሆኑንና የጋራ የኢትዮጵያውያን ጠላት እንደሆነም ገልጸዋል። ሸኔን ከማጥፋት ውጭ አማራጭ እንደሌለ ተወያይተናል፤ አቅጣጫም አስቀምጠናል ብለዋል ርዕሰ መስተዳድሩ።

“አሸባሪው ሕወሃት ጦርነት እየጎሰመ ነው” ያሉት ዶክተር ይልቃል ይህንንም መመከት የምንችለው በጋራ ነው ብለዋል።

የኦሮሚያ ክልል ርዕሰ መስተዳድር ሽመልስ አብዲሳ፤ “ከዚህ በፊት የኹለቱ ሕዝቦች አብሮነት እየተገመደ እንጂ እየላላ አልሄደም፤ አሸባሪው ህወሓት ሲነሳ አንድነታችን ጠንክሮ በአንድ ጉድጓድ እንደተቀበርን አሸባሪው ሸኔ ሲነሳም አንድነታችን የበለጠ እንዲጠናከር አድርጎታል” ብለዋል።

ሸኔ ጊምቢ ላይ ጥቃት የፈፀመው ሦስት ዓላማዎችን ይዞ ነው ያሉት ርዕሰ መስተዳድሩ አንደኛ የአማራና የኦሮሞ ሕዝብን ለመለያየት ሲሆን፤ ይህ ትላንት ሕወሓትም አስቦ ያልተሳካለት ሸኔም ዛሬ የማይሳካለት በእኛ ትውልድ ብቻ ሳይሆን ወደፊትም የማይሆን ነው ብለዋል።

ኹለተኛው ፍርሐትን በአገሪቱ ማንገስ ሲሆን ሦስተኛው ደግሞ ማሸበር ነው ብለዋል። ይህ እንዳይሳካ በጋራ እርምጃ እየወሰድን ነው ብለዋል።

ኹለቱ ሕዝቦች ትላንትም ዛሬም በጋራ መቆም እንደሚቻል ያሳዩ በመሆኑ ሸኔን መዋጋት አይከብዳቸውም ነው ያሉት።

ዛሬ አንድነታችንን የምናሳየው ጽንፈኝነትን በመዋጋት ነው ብለዋል። ለሕዝባችን ለዓላማችን ስንል ትላንት መስዋእትነት እንደከፈልነው ነገም መስዋእትነት ከፍለን ኢትዮጵያን የተሻለች አገር እናደርጋለን ነው ያሉት።

ሸኔን ሽፋንና መረማመጃ አድርገው በአመራሩ ላይ የሚዘምቱ አመራሩን ለመከፋፈል የሚጥሩ አይሳካላቸውም ብለዋል።

የኹለቱ ክልል የብልጽግና ጽሕፈት ቤት ኀላፊዎች ግርማ የሽጥላ እና ፍቃዱ ተሰማ ትላንት ወያኔ እሳት እና ጭድ ናቸው ብሎ በአንድነታችን ቢሳለቅም በጋራ እንደጣልነው ኹሉ የመከፋፈል ዓላማ ያለውን ሸኔን በጋራ እናጠፋዋለን ማለታቸውን አሚኮ ዘግቧል።

Source: Link to the Post

Leave a Reply