አቶ ግርማ ዋቄ የኢትዮጵያ አየር መንገድ ግሩፕን በቦርድ ሊቀመንበርነት እንዲመሩ ተሾሙ

የኢትዮጵያ አየር መንገድን ለሰባት ዓመታት በዋና ስራ አስፈጻሚነት ያገለገሉት አቶ ግርማ ዋቄ፤ የኢትዮጵያ አየር መንገድ ግሩፕን በቦርድ ሊቀመንበርነት እንዲመሩ ተሾሙ። አቶ ግርማን በአዲሱ የኃላፊነት ቦታ ላይ በቅርቡ የመደባቸው የመንግስት የልማት ድርጅቶች ይዞታ አስተዳደር መሆኑን የኢትዮጵያ አየር መንገድ ማምሻውን ባወጣው መግለጫ አስታውቋል። 

አቶ ግርማ “ከፍተኛ ልምድ ያላቸው፣ ስኬታማ እና ከበሬታ ያላቸው የቢዝነስ መሪ” መሆናቸውን የገለጸው አየር መንገዱ፤ በአቪዬሽን ኢንዱስትሪውም በቅጡ የሚታወቁ ግለሰብ መሆናቸውን አመልክቷል። የኢትዮጵያ አየር መንገድን በመሩባቸው ዓመታት፤ ተቋሙ ላስመዘገበው ፈጣን እና ትርፋማ እድገት መሰረት የጣሉ መሆናቸውን ለዚህ ገለጻው በማሳየነት ጠቅሷል።

“የአቶ ግርማ የውሳኔ አሰጣጥ ክህሎት የተፈተነ እና በሚገባ የተረጋገጠ ነው” ያለው አየር መንገዱ፤ “የእርሳቸው ልምድ፣ የስራ ባህል እና ትጋት ሲቀናጅ፤ ቦርዱን በሊቀመንበርነት ለመምራትም ሆነ አየር መንገዱን ወደ ቀጣይ ደረጃ ለማሻገር ብቁ ያደርጋቸዋል” ሲል የቀድሞው ዋና ስራ አስፈጻሚ ወደ ተቋሙ መመለስ የሚኖረውን ጠቀሜታ አስገንዝቧል።  

አየር መንገዱ በዚሁ መግለጫው የዋና ስራ አስፈጻሚው ተወልደ ገብረማርያምን ከስራ መልቀቅ አረጋግጧል። አቶ ተወልደ ላለፉት ስድስት ወራት በአሜሪካ በህክምና ላይ መቆየታቸውን የገለጸው አየር መንገዱ፤ በግል የጤና ሁኔታዎች ላይ ማተኮር ስለሚገባቸው በኢትዮጵያ አየር መንገድ ግሩፕ ዋና ስራ አስፈጻሚነት መቀጠል አለመቻላቸውን አስረድቷል። 

ይህን ተመርኮዙም አቶ ተወልደ ለኢትዮጵያ አየር መንገድ ግሩፕ አስተዳደር ቦርድ ያቀረቡት በጡረታ ለመሰናበት ጥያቄ ማቅረባቸውን አመልክቷል። ቦርዱ ዛሬ ረቡዕ መጋቢት 14፤ 2014 ባደረገው መደበኛ ስብሰባ አቶ ተወልደ ያቀረቡትን ጥያቄ እንደተቀበለ አየር መንገዱ አስታውቋል። የአየር መንገዱ ቦርድ የአቶ ተወልደን ተተኪ በቅርቡ እንደሚያስታውቅም ጨምሮ ገልጿል። (ኢትዮጵያ ኢንሳይደር) 

The post አቶ ግርማ ዋቄ የኢትዮጵያ አየር መንገድ ግሩፕን በቦርድ ሊቀመንበርነት እንዲመሩ ተሾሙ appeared first on Ethiopia Insider.

Source: Link to the Post

Leave a Reply