አዲሱ የደቡብ ኢትዮጵያ ክልል 36.2 ቢሊዮን ብር የተሻሻለ በጀት አጸደቀ 

በተስፋለም ወልደየስ

ባለፈው ዓመት ነሐሴ በይፋ የተመሰረተው የደቡብ ኢትዮጵያ ክልል፤ በስሩ ያሉ መዋቅሮቹ ያደረጉትን የአደረጃጀት ለውጥ ታሳቢ ያደረገ የተሻሻለ በጀት አጸደቀ። የክልሉ ምክር ቤት ዛሬ ሐሙስ ታህሳስ 4 ባካሄደው መደበኛ ስብሰባው፤ ለክልሉ መንግስት የ2016 እቅድ ማስፈጸሚያ የሚሆን 36.2 ቢሊዮን ብር በሙሉ ድምጽ አጽድቋል። 

የደቡብ ኢትዮጵያ ክልል በህዝበ ውሳኔ ከቀድሞው የደቡብ ብሔር፣ ብሔረሰቦችን እና ህዝቦች ክልል በተነጠለበት ወቅት፤ ለነባሩ ክልል ተመድቦ ከነበረው በጀት ውስጥ 54.24 በመቶ ድርሻ እንዲያገኝ ከስምምነት ተደርሶ ነበር። በዚህ ክፍፍል መሰረት ክልሉ 11 ቢሊዮን ብር ያህል በጀት ይዞ ይፋዊ ምስረታውን አከናውኗል።

በነባሩ ክልል የተደረገው የድርሻ ክፍፍል ከዚህ ቀድም የነበሩ መዋቅሮችን ታሳቢ ያደረገ መሆኑ እና የአዲሱ ክልል ማዕከል ድርሻ በግልጽ አለመለየቱ፤ የበጀት ማስተካከያውን ለማድረግ ዋነኛ ምክንያቶች መሆናቸው በዛሬው የምክር ቤት ስብሰባ ላይ ተገልጿል። ከዚህ በተጨማሪ በአዲሱ ክልል ስር ያሉ የተዋቀሩ አዲስ ዞኖች የገቢ እቅዳቸውን ለማሻሻል መፈለጋቸው እና ነባር ዞኖች በበኩላቸው “የገቢ አቅማቸውን አሟጠው ለመጠቀም” በመወሰናቸው የበጀት ማስተካከያው መዘጋጀቱ ተነግሯል። 

በአዲሱ ክልል ስር ያሉ መዋቅሮች፤ ለመሰብሰብ ባቀዱት ገቢ ላይ ባደረጉት ማሻሻያ ቀድሞ ከተያዘው 11 ቢሊዮን ብር የገንዘብ መጠን 5.5 ቢሊዮን ብር ጭማሪ መምጣቱን የደቡብ ኢትዮጵያ ክልል የፋይናንስ ቢሮ ኃላፊ አቶ ተፈሪ አባተ ለክልሉ ምክር ቤት አባላት አብራርተዋል። የደቡብ ኢትዮጵያ ክልል ካሉበት “ብዙ ችግሮች፣ የመሰረተ ልማት ጥያቄዎች፣ የመልማት ፍላጎት” እና በአሁኑ ወቅት በሀገሪቱ ካለው “የዋጋ ግሽበት” አንጻር “ገቢን አሟጥጦ መሰብሰብ አስፈላጊ” በመሆኑ የበጀት ማስተካከያው ለምክር ቤቱ መቅረቡንም ገልጸዋል።

ፌዴሬሽኑን በመቀላቀል አስራ ሁለተኛ ክልል የሆነው የደቡብ ኢትዮጵያ ክልል ከዚህ ቀደም ከነባሩ ደቡብ ተነጥሎ የራሱን ክልል እንደመሰረተው የደቡብ ምዕራብ ኢትዮጵያ ህዝቦች ክልል ሁሉ ለመንግስት ሰራተኞች በወቅቱ ደመወዝ የመክፈል ችግር ገጥሞታል። ይሄንኑ ጉዳይ በዛሬው መደበኛ ጉባኤ ላይ በተደጋጋሚ ያነሱት የክልሉ ምክር ቤት አባላት፤ የክልሉ መንግስት ለችግሩ መፍትሔ እንዲያበጅ ጠይቀዋል። (ኢትዮጵያ ኢንሳይደር)

Source: Link to the Post

Leave a Reply