You are currently viewing “አዲስ አበባ የሁሉምና ለሁሉም እንጂ የጥቂት ግለሰቦች ፍላጎት ማስፈፀሚያ አይደለችም!” አማራ ሚዲያ ማዕከል/አሚማ    ነሃሴ 20 ቀን 2014 ዓ.ም        አዲስ አበባ ሸዋ የመላው ኢት…

“አዲስ አበባ የሁሉምና ለሁሉም እንጂ የጥቂት ግለሰቦች ፍላጎት ማስፈፀሚያ አይደለችም!” አማራ ሚዲያ ማዕከል/አሚማ ነሃሴ 20 ቀን 2014 ዓ.ም አዲስ አበባ ሸዋ የመላው ኢት…

“አዲስ አበባ የሁሉምና ለሁሉም እንጂ የጥቂት ግለሰቦች ፍላጎት ማስፈፀሚያ አይደለችም!” አማራ ሚዲያ ማዕከል/አሚማ ነሃሴ 20 ቀን 2014 ዓ.ም አዲስ አበባ ሸዋ የመላው ኢትዮጵያ አንድነት ድርጅት (መኢአድ) እና ሌሎች ፓርቲዎች በአዲስ አበባ ወሰን ማካለል እና መሰል ወቅታዊ ጉዳዩ በጋራ የሰጡት መግለጫ:_ አዲስ አበባ የሁሉምና ለሁሉም እንጂ የጥቂት ግለሰቦች ፍላጎት ማስፈፀሚያ አይደለችም! ባለቤት አልባነት ተጫጭኗት እንደዛሬው ሳይሆን “አዲስ አበባ” ሲባል የሰላም ከተማነቷ፣ እንደነ ኒውዮርክ፣ ጀኔቫ፣… ከሁሉም የዓለም ማዕዘናት መሪዎች ተሰባስበው ጉዳያቸውን የሚመክሩባት፣ አፍሪካውያን በባርነት ቀንበር ሲማቅቁ የነጻነታቸው ቀንዲል ሆና የትግሉን ፊደል ሀ ሁ… ያስቆጠረች ከተማ ነበረች። አዲስ አበባ ጎልታ የወጣችው በሕንጻዋ ሰማይ ጠቀስነት፣ በቪላዎቿ ዐይነ ገብነት፣ በመንገዶቿ ማማር፣ በቴክኖሎጂ ርቀቷ ሳይሆን በነዋሪዎቹ እንግዳ ተቀባይነትና አይበገሬነት፣ በሰላማዊነቷ፣ በተስማሚው የአየር ንብረቷና በቁርጠኛ መሪዎቿ ነበር። ቀደም ያለውን ነገር ትተን በ1879 ዓ.ም በብርሃን ዘኢትዮጵያ እቴጌ ጣይቱ ዳግም ከተቆረቆረች ወዲህ እንኳን አዲስ አበባ እንደ ስሟ እንድታብብ ጠጠር ያልወረወረ ኢትዮጵያዊ አለ ለማለት ያስቸግራል፡፡ ሁሉም ኢትዮጵያዊ በነባርነት ኖሮባታል፤ ሁሉም ዋና ከተማውን ላለማስደፈር ተዋድቆላታል፤ ሁሉም ሠርቷታል እና “ሁሉም” በኩራት “የእኔ” ይላታል፡፡ ዛሬ ላይ አዲስ አበባ አይደለም የመላው ኢትዮጵያውያን የመላው አፍሪካውያን ዋና ከተማ ሆናለች፡፡ ወደጥልቁ ታሪክ ትንተና ሳንገባ በሕወሓት መራሹ ኢሕአዴግ መሪነት በ1987 ዓ.ም የጸደቀው ሕገ መንግስት እንኳን አዲስ አበባ በቻርተር እንድትተዳደር ከደነገገ በኋላ በአጠቃላይ 54,000 (ሃምሳ አራት ሺህ) ሄክታር ስፋት ነበራት፡፡ ይህም አዲስ አበባ መስተዳደር ውስጥ ባሉ 10 ክ/ከተሞችን እና 23 የዙሪያ ቀበሌዎችን ጨምሮ ነው፡፡ ይሄ አኃዝ በ 2009 ዓ.ም 10ኛው የከተማዋ መሪ እቅድ ሲጸድቅ ወደ 52,000 (ሃምሳ ሁለት ሺህ) ሄክታር ዝቅ ብሏል፡፡ ይሄ ማለት ኹለት ልደታ ክ/ከተማን የሚያህሉ ክ/ከተሞች ጠፍተውባታል ማለት ነው፡፡ ምን አልባት ዓለም ላይ ስለሌሎች ነጻነት እየተዋደቀች ይህን ያህል ሙዳ ሥጋ(መሬት) የጠፋባት ብቸኛ ከተማ ሳትሆን አትቀርም፡፡ አሁን ላይ ይሄ አኃዝ በስንት ሺህ ሄክታር ቀንሶ እንደሆነ አይታወቅም። በሕገ መንግስቱ ላይ የተቀመጠን “ልዩ ጥቅም” እጅግ በመለጠጥ ከተማዋን የ”መጠቅለል” ወይም “ጥቅም አልባ” ማድረግ በሚመስል አካሄድ እየተሠራ ያለው ደባ ከሌሎች ዘርፈ ብዙ ችግሮች ጋር ተጋግዞ ለከፋ አደጋ እያጋለጣት ነው። ከሕግ አግባብ ውጭ መታወቂያ ይታደላል (ዴሞግራፊ ቅየራ ብለውታል)፣ ዘረፋው ሕጋዊ እስኪመስል ድረስ ተባብሷል፣ ነዋሪዎች በሕገ-ወጦች ይዘረፋሉ፣ ማቆሚያ በሌለው የኑሮ ውድነት ይሰቃያሉ፣ መተኪያ የሌላቸው ታሪካዊ ቅርሶች በማን አለብኝነት ይፈርሳሉ፣ ሕዝብ ከሌለው ላይ እየቆጠበ የተገነቡ የጋራ መኖሪያ ቤቶች (ኮንዶሚኒዬሞች) ለፖለቲካ ሸሪኮችና ሹማምንቱ እንደ ግል ንብረት ይታደላሉ፣ ከሕግ ውጭ የአጎራባች ክልል ሰንደቅ ዓላማን በትምህርት ቤቶች በመስቀል፣ የክልሉን መዝሙር ዘምሩ በሚል የነገ ሀገር ተረካቢ ትውልድ ማፍለቅያ ትምህርት ቤቶች የፖለቲካ ዓላማ ማስፈጸሚያ ተደርገው የአምባጓሮ መፍለቂያ ሆነዋል፤ ከአጎራባች ክልሎች ሰዎች ወደ ከተማዋ እንዳይገቡ ዘብ አቁመዋል፤ የሚያጠቡ እናቶችንና አዛውንቶች “ወደ የመጣችሁበት ተመለሱ” ተብለዋል። ከዘር ፍጅት ተርፈው በእግሬ አውጭኝ ከተማዋ የደረሱ አቅመ ደካሞች በከተማዋ ለአጭር ጊዜ እንኳን ቆይታ እንዳይኖራቸው ተከልክለዋል፡፡ ይህን ሕገ-ወጥ አሠራር የሚቃወሙትን አካላት ከሕዝብ ጋር ለማጣለትና በኢትዮጵያዊነቱ የማይደራደረውንና ከተማዋን ለመገንባት ከሌሎች ኢትዮጵያውያን ወንድሞቹ ጋር የራሱን ደማቅ አሻራ ያኖረውን የኦሮሞ ሕዝብ ከሌሎች ወንድሞቹ ጋር ለማጋጨት ጸብ አጫሪ ንግግሮችን ሆነ ብሎ በመናገር በግልጽ ቅስቀሳ እየተደረገ ይገኛል። ጊዜያዊ ስልጣንን መከታ አድርገው መሬት እየሸጡ እየለወጡ መኪና ሲቀያይሩ፣ ጠጅና ጮማ ሲያወራርዱ ያልጠሩትን ሕዝብ ክፉ ሥራቸው ሲጋለጥ መሸጎጫ በማድረግ ከጮማው አግልለውት ከሞታቸው ይጠሩታል፡፡ “ላይጠግን አይሠብርም እንዲሉ” ሕዝብ ዘላቂ ጥቅሙንና ዝምድናውን ያውቃልና አይቷቸዋል፣ እምቢ ብሏቸዋልም፡፡ ይህ ኹሉ ደባ አልበቃ ብሎ ሕዝብ የኑሮው ውድነት መቸ ይቀልልኛል? ለልጆቼ ትምህርት ቤት ምን ልክፈል? የናረውን ነዳጅ ወጪ እንዴት ልሸፍን? ለመብራት ከየት አምጥቼ ልክፈል? ትራንስፖርት ወጪዬን እንዴት ልሸፍን? አንጀቴን አሥሬ ያስተማርኩት ልጄ መቸ ይቀጠርልኝ ይሆን? አልበላም ብዬ በቆጠብኳት ኮንዶሞኒዬም መቸ ይደርሰኝ ይሆን? እያለ ሲያብሰለስል የወሰን ማካለል በሚል ምን አልባትም የመጨረሻው ካርድ ተመዞለታል፡፡ የከተማዋን ነዋሪዎች አልፎም መላው ኢትዮጵያውያንን የሚያውክ አካሄድ በገዢው መንግስት በተለይም በአዲስ አበባ ከተማ አስተዳደር እና የኦሮሚያ ክልላዊ መንግስት እየተፈጸመ ነው። ውሳኔው የቦታ ጉዳይ ብቻ ተደርጎ የሚታይበት መንገድም ፈጽሞ ስሕተት ሲሆን ከቦታ በዘለለ በመቶ ሺህዎች የሚቆጠሩ የከተማይቱን ነዋሪዎች መብት የሚጥስ ድርጊት ነው። የአስተዳደር ወሰን ግጭቶችን ጨምሮ ሌሎች የጸብ መነሻና የፍትሕ ብሎም የሰላም እጦት ምክንያት የሆኑ መሰል ጉዳዮች ጥልቅና መተማመን ያለባቸው ሕዝባዊ ውይይቶች፣ የቅርብ ጊዜና የቆዩ አስተዳደራዊ ሰነዶችን በማመሳከር እና በምንጠብቀው ሀገራዊ መግባባት አንድ ጉዳይ ሆኖ እንዲታይ ማድረግና መፍታት ሲገባ በይድረስ ይድረስ በገዢው ፓርቲ እየተፈጸመ ያለው ሕገወጥ ድርጊት ሀገራችንን ከድጡ ወደማጡ የሚያስገባ ተግባር መሆኑን ተገንዝበናል። በሌላ በኩል አዲስ አበባ የሁሉምና ለሁሉም ሳትሆን የግለሰቦች መጫዎቻ ካርድ እየሆነች ነው ብለን እናምናለን፡፡ ስለሆነም፡- 1. በአዲስ አበባ ከተማ እና በኦሮሚያ ክልል መካከል ይካሔዳል የተባለው ሂደቱን ያልጠበቀ፣ ሕግን ያልተከተለ የወሰን ማካለል በአስቸኳይ እንዲቆም እናሳስባለን፡፡ 2. የመንግስት ባለስልጣናት ሕዝቡን ወደግጭት ከሚመሩ እንቅስቃሴዎችና ንግግሮች እንዲቆጠቡ እናሳስባለን፡፡ 3. የከተማ አስተዳደሩ በከተማዋ ውስጥ ለሚያከናውናቸው የትኛውም በጎ ሥራዎች ድጋፍና እውቅና ያለን ቢሆንም በተለይ ከቅርብ ጊዜያት ወዲህ የከተማዋ መገለጫና ማንነት የሆኑ፣ ያለፈው ትውልድ አሻራ ማሳያ ታሪካዊ ቅርሶችን ከማፍረስ እንዲቆጠብ በጥብቅ እንጠይቃለን፡፡ 4. በከተማዋ ውስጥ የሚታየው ከፍተኛ የኑሮ ውድነት፣ የጠራራ ጸሐይ ዝርፊያ፣ ግድያና የመሬት ቅርምት በየኔነትና በዘላቂነት እንዲፈቱ አበክረን እንጠይቃለን፡፡ በመጨረሻም የአዲስ አበባ ከተማ ሕዝብ እንደወትሮው ሁሉ የየአካባቢህን እንቅስቃሴ በትኩረት እንድትከታተል፣ መረጃ እንድታቀብል ብሎም ዘብ እንድትቆም ወንድማዊ ጥሪያችንን እናስተላለፋልን። “ፈጣሪ ኢትዮጵያንና ሕዝቧን ይጠብቅ!” ነሐሴ 20 ቀን 2014 ዓ.ም አዲስ አበባ፣ ኢትዮጵያ

Source: Link to the Post

Leave a Reply