ከደሴ ከተማ አስተዳደር የፀጥታ ምክር ቤት የሰዓት እላፊ ገደብን ጨምሮ የተለያዩ ውሳኔዎችንን አሳለፈ

ሰኞ ነሐሴ 23 ቀን 2014 (አዲስ ማለዳ) የደሴ ከተማ አስተዳደር የፀጥታ ምክርቤት በወቅታዊ የከተማዋ ሰላምና ደህንነት ላይ በሰፊው ከመከረ በኋላ በሚከተሉት ነጥቦች ላይ ውሳኔ አሳልፏል።

በዚህም መሰረት፦

1. በከተማ ደረጃ የምግብ ቤቶች፣ የምሽት መጠጥ ቤቶች/ግሮሰሪዎች/ ከምሽቱ 1፡ዐዐ ሰዓት ጀምሮ በማንኛውም ምክንያት አገልግሎት መስጠት የተከለከለ ነው።

በተጣለው የሰአት ገደብ መሠረት ቁጥጥሩ ተጠናክሮ ስለሚቀጥል ተላልፎ የተገኘ አካል ላይ እርምጃ ይወሰዳል።

2.ማህበረሰቡ ወይም የከተማችን ነዋሪዎችን ለተጨማሪ ችግር ለመዳረግ በማንኛውም ምርት ላይ የዋጋ ጭማሬ የሚያደርጉ አካላት ላይ ህጋዊ ርምጃ የሚወሰድ ይሆናል።

3. በመፈናቀልም ሆነ በሌላ ማንኛውም ምክንያት ወደ ደሴ ከተማ የገቡ ተፈናቃዮች የከተማውን ደህንነት ለማስጠበቅ ሲባል የፀጥታ ሀይላችን ለጋራ ደህንነት ለሚተገብራቸው የፍተሻና የቅድመ-ጥንቃቄ ስራወች ተባባሪ የመሆን ግዴታ አለበት።

በተጨማሪም አልጋ ቤት፣ የመኖሪያ ቤት ወይም መደብ ቤት አከራዮች የየትኛውንም ተከራይ ማንነትን የሚገልፅ መረጃ ለፀጥታ ተቋማት የመስጠት ግዴታ አለባቸው።

በመሆኑም ወደ ከተማችን በማንኛውም ምክንያት የገቡ እንግዶች ከምሽቱ 1፡00 ሰዓት በኋላ መንቀሳቀስ የተከለከለ ነው።

4. በከተማው ውስጥ የሚስተዋሉ ፀጉረ- ልውጦችንና ሰርጎ ገብን በመከታተል በፍጥነት ለፀጥታ ሃይሉ በመጠቆም እና በማስያዝ ማህበረሰባችን የጀመረውን ተግባር አጠናክሮ እንዲቀጥል ተወስኗል፡፡

5. መላ የከተማችን ነዋሪዎች በተለይ ደግሞ ወጣቶች አካባቢያችሁን ከመጠበቅ አንፃር ከፀጥታ ኃይሉ ጋር በመሆን የምታደርጉትን ድጋፍ እንድታጠናክሩ እየጠየቅን ከፀጥታ መዋቅራችን ጋር በመቀናጀት የውስጥ ሰላማችንን በጋራ የመጠበቅ ኃላፊነታችሁን እንድትወጡ እናሳስባለን፡፡

6ኛ. ከተፈቀደላቸው የከተማችን የፀጥታ ኃይሎች ውጭ ጦር መሳሪያ ይዞ መንቀሳቀስ ፈፅሞ የተከለከለ ነው።

7ኛ. ከነሐሴ 22 ቀን 2014 ጀምሮ የትኛውም የከተማችን ነዋሪ ከምሽቱ 2:00 /ኹለት/ ሰዓት ጀምሮ በተናጠልም ሆነ በጋራ መንቀሳቀስ ተከልክሏል::

በከተማ ደረጃ እውቅና ያላቸው የታክሲ አሽከርካሪዎች እስከ ምሽቱ 2:00 ሰዓት ብቻ ህዝቡን እንዲያገለግሉ ተወስኗል::

ነገር ግን በኹሉም የከተማችን አካባቢዎች የሚገኙ የሶስት እግር ተሽከርካሪዎች (ባጃጆች) እስከ ምሽቱ 1፡00 ሰዓት ብቻ አገልግሎት እንዲሰጡ ውሳኔ የተላለፈ ሲሆን በከተማ ደረጃ የስምሪት ፍቃድ የሌለው ባጃጅ መንቀሳቀስም ሆነ አገልግሎት መስጠት የተከለከለ ነው።

ከወቅታዊ ጉዳዮች ጋር በተያያዘ (የፀጥታ መኪኖችና አምቡላንሶች) የሚሰጡት አገልግሎት በሰዓት እላፊ ሳይገደቡ አገልግሎት እንዲሰጡ ተወስኗል።

8. በከተማችን ውስጥ የ”DSTV” የአገልግሎት መስጫዎች በጋራ ተሰብሰቦ ጫት የሚቃምባቸው ቤቶች፣ የሽሻ ቤቶች ከዛሬ ጀምሮ በይፋም ሆነ በስውር አገልግሎት መስጠት የተከለከለ ነው።

9. የጠላትን ሀሳብና እንቅስቃሴ በመደገፍ አሉባልታና ወሬ በማናፈስ በህብረተሰቡ ውስጥ ሽብር የሚነዛ በህግ እንዲጠየቅ ተወስኗል።

10.የከተማችን የፀጥታ ሃይሎች ከምንጊዜውም በላይ በመቀናጀትና በመደራጀት የተሰጣችሁን ኃላፊነት በብቃት በመወጣት ህግ የማስከበር ሚናችሁን እንድትወጡ በጥብቅ እናሳስባለን።

ነሐሴ 22 ቀን 2014

ለተጨማሪ መረጃ:-
033 111 77 48 ወይም 033 111 11 07 ወይም 033 111 16 01 መደወል ይቻላል።

የደሴ ከተማ አስተዳደር የጸጥታ ም/ቤት!!

Source: Link to the Post

Leave a Reply