ከ12 ነጥብ 8 ሚሊየን ኩንታል በላይ የአፈር ማዳበሪያ ሙሉ በሙሉ ወደ ጅቡቲ ወደብ ተጓጉዞ መጠናቀቁ ተገለጸ

የመጨረሻውን ዙር 500 ሺህ ኩንታል ዩሪያ የጫነች መርከብ ትላንት ወደብ ደርሳለች

ሰኞ ሐምሌ 25 ቀን 2014 (አዲስ ማለዳ) የኢትዮጵያ የግብርና ሥራዎች ኮርፖሬሽን ለ2014/15 የሰብል ዘመን ከውጪ የገዛው ከ12 ነጥብ 8 ሚሊየን ኩንታል በላይ የአፈር ማዳበሪያ ሙሉ በሙሉ ወደ ጅቡቲ ወደብ አጓጉዞ ማጠናቀቁን አስታወቀ፡፡

የመጨረሻውን 10ኛ ዙር 500 ሺህ ኩንታል ዩሪያ ማዳበሪያ የጫነችው መርከብ ትላንት ሐምሌ 24 ቀን 2014 ጂቡቲ ወደብ ደርሳለች፡፡

ይህን ተከትሎም ኮርፖሬሽኑ ለሰብል ዘመኑ ከውጪ የገዛቸው ኤን ፒ ኤስ፣ ኤን ፒ ኤስ ቢ እና ዩሪያ የተሰኙ የአፈር ማዳበሪያዎችን ወደ ጂቡቲ ወደብ የማጓጓዝ ሥራውን ማጠናቀቁን ገልጿል፡፡

ከጥር ወር ጀምሮ ወደብ ከደረሰው ማዳበሪያ ውስጥ እስከ ሐምሌ 24 ቀን 2014 ድረስ ከ12 ሚሊየን 300 ሺህ ኩንታል በላይ ማዳበሪያ ወይም 96 በመቶው ወደ አገር ውስጥ ተጓጉዞ ለአርሶ አደሩ እየቀረበ እንደሚገኝም ነው የኢትዮጵያ የግብርና ሥራዎች ኮርፖሬሽን ያስታወቀው፡፡

ለዘንድሮ የሰብል ዘመን ኦሲፒ እና ፈርቲግሎብ ከተባሉ ዓለም አቀፍ የአፈር ማዳበሪያ አምራች ኩባንያዎች የገዛው የአፈር ማዳበሪያ የኢትዮጵያ ባህር ትራንስፖርትና ሎጂስቲክስ አገልግሎት ድርጅት በመደባቸው 23 ግዙፍ መርከቦች ከሞሮኮ፣ ከዩናይትድ ዓረብ ኤምሬትስና ከግብጽ ተጓጉዞ መጠናቀቁም ተገልጿል፡፡

የኢትዮጵያ የግብርና ሥራዎች ኮርፖሬሽን የግብርና ሚኒስቴር በየዓመቱ አጥንቶ በሚያቀርበው አገራዊ የአፈር ማዳበሪያ ፍላጎት መሰረት ከ2008 ጀምሮ ማዳበሪያ ከውጪ እየገዛ የሚያቀርብ መንግሥታዊ የልማት ድርጅት ነው።

Source: Link to the Post

Leave a Reply