You are currently viewing የሃይማኖት ክብርን እና የአምልኮ ሥርዓትን በሚነካ ለሁከትና ብጥብጥ መነሻ የሚሆን የወንጀል ድርጊት ፈጽመዋል ባለቻቸው ግለሰቦችና ተባባሪ ተቋማት ላይ ምርመራ እንዲጣራ ክስ መመስረቷን የኢትዮ…

የሃይማኖት ክብርን እና የአምልኮ ሥርዓትን በሚነካ ለሁከትና ብጥብጥ መነሻ የሚሆን የወንጀል ድርጊት ፈጽመዋል ባለቻቸው ግለሰቦችና ተባባሪ ተቋማት ላይ ምርመራ እንዲጣራ ክስ መመስረቷን የኢትዮ…

የሃይማኖት ክብርን እና የአምልኮ ሥርዓትን በሚነካ ለሁከትና ብጥብጥ መነሻ የሚሆን የወንጀል ድርጊት ፈጽመዋል ባለቻቸው ግለሰቦችና ተባባሪ ተቋማት ላይ ምርመራ እንዲጣራ ክስ መመስረቷን የኢትዮጵያ ኦርቶዶክስ ተዋሕዶ ቤተ ክርስቲያን አስታወቀች። አማራ ሚዲያ ማዕከል/አሚማ ታህሳስ 12 ቀን 2015 ዓ/ም አዲስ አበባ ሸዋ የኢትዮጵያ ኦርቶዶክስ ተዋሕዶ ቤተክርስቲያን በሕግ አገልግሎት መምሪያ በኩል ለኢትዮጵያ ፌዴራል ፖሊስ ኮሚሽን ወንጀል ምርመራ ዳይሬክቶሬት:_ ፩. ፓስተር ዮናታን አክሊሉ፣ ፪. የአዲስ ኪዳን ካህናት ቤተ ክርስቲያን፣ ፫. ነቢይ ኢዩ ጩፋ፣ ፬. ክራይስት አርሚ ኢንተርናሽናል ቤተ ክርስቲያን፣ በአድራሻቸው ክስ መመስረቷን አስታውቃለች። የአቤቱታው ምክንያት የኢትዮጵያ ኦርቶዶክስ ተዋሕዶ ቤተ ክርስቲያን ላይ ያነጣጠረ የጥላቻ ንግግርና አደገኛ የሆነ የሃይማኖትን ክብር የሚነካ የአምልኮ ሥርዓትና እምነትን የሚያንቋሽሽ የዘለፋ እና ሐሰተኛ ንግግር በመፍጠር ለሁከትና ብጥብጥ መነሻ የሚሆን ድርጊት በፈጸሙ ግለሰቦችና ተባባሪ ተቋማት ላይ የወንጀል ምርመራ እንዲጣራ ጠይቃለች። የኢትዮጵያ ኦርቶዶክስ ተዋሕዶ ቤተ ክርስቲያን በራሷ ሃይማኖታዊ ሕግና መዋቅራዊ አስተዳደር ተቋማዊ ሥራዎቿን ለማከናወን በፍትሐ ብሔር ሕግ ተቋቁማ ሕጋዊ ሰውነት የተሰጣት እንደመሆኑ መጠንና በሕገ መንግስት እና በተለያዩ ሕግጋት የተፈቀዱትን መብቶች ሁሉ ልታገኝና ልትጠቀምባቸው እንዲሁም መዋቅሯንና ሕግጋቷን የማያከብሩትን በፍትሕ ተቋማት ክስ በማቅረብ ክብሯን የማስጠበቅ መብት ያላት ሃይማኖታዊ ተቋም መሆኗ ተገልጧል። ሆኖም ከቅርብ ጊዜ ወዲህ አንዳንድ ግለሰቦች:_ 1) የግላቸውን የተዛባ አመለካከት እና ሃይማኖታዊ አስተምህሮን ተገን በማድረግ በተደጋጋሚ በኢትዮጵያ ኦርቶዶክስ ተዋሕዶ ቤተክርስቲያን ላይ ያነጣጠረ የጥላቻ ንግግርን በመሰንዘር፣ 2) የቤተ ክርስቲያኗ ያልሆነ አስተምህሮን አስተምህሮዋ በማስመሰል የተሳሳተ መረጃን ወደ ሕዝብ በማድረስ በዜጎች መካከል የሃይማኖት ግጭት እንዲፈጠር ሆነ ብለው በመሥራት፣ 3) በተደጋጋሚ ሐሰተኛ መረጃና የሃይማኖት ክብርን የሚነካ የጥላቻ ንግግርን በቀጥታ በመናገር፣ በሕገ መንግሥቱ የተቀመጠውን የእምነትና የሃይማኖት ነጻነትን በጣሰ መልኩ በተለያዩ ሚዲያዎችም ይኸንኑ የወንጀል ድርጊታቸውን በማሠራጨትና የተለያዩ ተንኳሽ ድርጊቶችን በመፈጸም ላይ ይገኛሉ፡፡ ስለሆነም እለት ተእለት የቤተ ክርስቲያኗን እና የእምነቱ ተከታይ የሆኑ ምእመናንን ትእግስት በሚፈታተንና ሕዝብን ላልተፈለገ ሁከት በሚያነሳሳ መልኩ ይኽ የወንጀል ድርጊት በመቀጠሉ ፖሊስ ከዚህ አቤቱታ ጋር አባሪ አድርጋ ያቀረበቻቸው የሠነድ፣ የድምጽ እና ምስል ማስረጃዎቻችንን በመመዘንና በተጨማሪነትም ወደፊት ለአስረጂነት በምታቀርባቸው የሰነድና ልዩ ልዩ የቪዲዮ ማስረጃዎች እንዲሁም የሰው ምስክሮችን መሠረት:_ ፓስተር ዮናታን አክሊሉ እና ነቢይ ኢዩ ጩፋ በተባሉ ግለሰቦችና የአዲስ ኪዳን ካህናት ቤተ ክርስቲያን እና ክራይስት አርሚ ኢንተርናሽናል ቤተ ክርስቲያን በተባሉ የእምነት ተቋማት ላይ ተገቢውን ምርመራ በማድረግና የወንጀል ምርመራ መዛግብትን በማጣራት ለሚመለከተው ውሳኔ ሰጪ የፍትሕ አካል ያቀርብ ዘንድ ቤተክርስቲያኗ ጠይቃለች። ዘገባው የኢትዮጵያ ኦርቶዶክስ ተዋህዶ ቴሌቪዥን ነው።

Source: Link to the Post

Leave a Reply