የምርት ገበያ ባለሥልጣን አሠራር ሊፈተሽ ይገባል – የክልል ርዕሳነ መስተዳድራን

የምርት ገበያ ባለሥልጣን አሠራር ሊፈተሽ ይገባል – የክልል ርዕሳነ መስተዳድራን

አዲስ አበባ፣ ህዳር 28፣ 2013 (ኤፍቢሲ) የሀገሪቱን የውጭ ንግድ ለማስፋት ከምርት ገበያ ባለሥልጣን ጋር በተያያዘ የሚነሱ ችግሮችን መፍታት እንደሚገባ የክልል ርዕሳነ-መስተዳድራን ጠየቁ።

የንግድና ኢንዱስትሪ ሚኒስቴር ከክልል ርዕሰ መስተዳድራንና የዘርፉ ተወካዮች ጋር በውጭ ንግድ ችግሮችና መፍትሄዎች የተመለከተ ውይይት ዛሬ አድርጓል።

በውይይቱ ርዕሰ መስተዳድራኑ በክልላቸው የሚስተዋሉ ችግሮችን በማውጣት ዘርፉን ሊያጠናክሩ ያስችላሉ ያሏቸውን የመፍትሄ ሐሳቦች አቅርበዋል።

የደቡብ ክልል ምክትል ርዕሰ መስተዳድር ርስቱ ይርዳው የውጭ ንግድን ለማጠናከር ወደ ውጭ የሚላኩ ምርቶችን በጥራትና በብዛት ማሻሻል ይገባል ብለዋል።

ትናንሽ የእርሻ መሬት ያላቸው አርሶ አደሮችን ሊጠቅሙ የሚችሉ በውጭ ንግድ የተሰማሩ ባለሃብቶችን በስፋት የመሳብ ሥራ ሊጠናከር እንደሚገባ አንስተዋል።

የሚመሩት ክልል እስካሁን የጀመራቸውን ሥራዎች አጠናክሮ እንደሚቀጥል ገልጸው የፌዴራል መንግሥቱም ድጋፉን እንዲያጠናክር ጠይቀዋል።

በተለይም ደግሞ ከምርት ገበያ ባለሥልጣን ጋር የሚነሱትን ቅሬታዎች በቅጡ በማጤን ለችግሩ ሁነኛ መፍትሄ ማፈላለግ ይገባል ነው ያሉት።

የአማራ ክልል ርዕሰ መስተዳድር አገኘው ተሻገር በበኩላቸው፣ የውጭ ንግድ ሥራውን ውጤታማ ለማድረግ የብድር አቅርቦት መስፋት ያስፈልጋል ብለዋል።

በግንባታ ላይ ያሉትን የደረቅ ወደብ አገልግሎቶች በፍጥነት ወደ ሥራ እንዲገቡ በማድረግ አላስፈላጊ ወጭን መቀነስና አሰራርን ማሳለጥ እንደሚገባም አንስተዋል።

ወደ ጎረቤት ሀገራት በሕገ-ወጥ መልኩ የሚወጡትን የእንስሳት ሃብት ለመቆጣጠር ሕጋዊ የግብይት ሥርዓት ሊጠናከር እንደሚገባ ነው ያስረዱት።

የኦሮሚያ ክልል ፕሬዚዳንት ሽመልስ አብዲሳ እንዳሉትም የንግድ ሥርዓቱ አምራቹንና አርብቶ አደሩን ከግምት ያስገባ ሊሆን ይገባዋል ሲሉም ተናግረዋል፡፡

በክልሉ የምርት አቅርቦትን በጥራት ለማስፋት እየተሰራ መሆኑን ገልጸው፤ በፌዴራል በኩል የውጭ ንግድ የተመለከቱ የሕግ ማዕቀፎች ሊታዩ ይገባል ብለዋል።

በተለይም የንግድ ፈቃድ አወጣጥ ሥርዓት ዳግም ሊታይ ይገባዋል ነው ያሉት።

ዘርፉ በውድድር የተሞላ እንዲሆን ማድረግ፣ የብድር አቅርቦት ማስፋትና፣ ለውጭ ንግድ አስፈላጊ የሆኑ የሎጂስቲክ አቅርቦት መሟላት እንዳለባቸውም ተናግረዋል።

የኅብረት ሥራዎች አደረጃጀትና አስተዳደራቸው እንዲሁም የሚቀርብላቸው የፋይናንስ ድጋፍ በተመለከተ የሚደነግጉ ሕጎች ላይ መሻሻል እንደሚያስፈልግም ጠቅሰዋል።

የንግድና ኢንዱስትሪ ሚኒስትሩ መላኩ አለበል በበኩላቸው፣ የውጭ ንግድ ሥራን ለማጠናከር የተለያዩ አዎንታዊ እርምጃዎች መወሰዳቸውን ተናግረዋል።

በተለይም ከብድር አቅርቦት ጋር በተያያዘ ሚኒስቴሩ አቅርቦቱን በስፋት እያመቻቸ እንደሆነና ነገር ግን ብድሩን በአግባቡ በመጠቀም ረገድ ክፍተት መኖሩን ገልጸዋል።

ከመሰረተ ልማት ጋር በተያያዘ ችግሮችን ለመፍታት በርካታ ጥረቶች መደረጋቸውን ገልጸው፤ ከምርት ገበያም ጋር ተያይዞ የሚነሱት ችግሮች የዘርፉ ተዋናዮች በመብዛታቸው ነው ብለዋል።

ያም ሆኖ በክልል ርዕሳነ-መስተዳድራኑ የተነሱትን ሐሳቦች በግብዓትነት እንወስደዋለን ብለዋል።

የጠቅላይ ሚኒስትሩ ከፍተኛ የኢኮኖሚ አማካሪ አምባሳደር ግርማ ብሩ የክልል አስተዳደሮች አሁን ላይ ለውጭ ንግድ ያሏቸውን አቅም ማወቅና መለየት አለባቸው ሲሉ አንስተዋል።

ጎን ለጎንም በውጭ ንግድ ዘርፍ የተሰማሩ ባለሃብቶች በተሰማሩባቸው ዘርፎች ላይ የሚያጋጥሟቸውን ችግሮች በዝርዝር መለየትና መፍትሄም መሰንዘር እንደሚገባ ጠቁመዋል።

ክልሎቹ በዚሁ ጉዳይ ላይ ከዘርፉ ተዋናዮች ጋር በቅርቡ ውይይት እንዲያደርጉና ለችግሮቹ መፍትሄም እንዲያቀርቡ አምባሳደር ግርማ ብሩ ጥሪ ማቅረባቸውን ከኢዜአ ያገኘነው መረጃ ያመለክታል።

ከፌስቡክ ገፃችን በተጨማሪ ወቅታዊ፣ ትኩስ እና የተሟሉ መረጃዎችን ለማግኘት፡-

የፋና ድረ ገጽ https://www.fanabc.com/ ይጎብኙ፤

ተንቀሳቃሽ ምስሎችን ለማግኘት የፋና ቴሌቪዥን የዩቲዩብ ቻናል https://www.youtube.com/c/fanabroadcastingcorporate/ ሰብስክራይብ ያድርጉ

ፈጣን መረጃዎችን ለማግኘት ትክክለኛውን የፋና ቴሌግራም ቻናል https://t.me/fanatelevision ይቀላቀሉ

ከዚህ በተጨማሪም በትዊተር ገጻችን https://twitter.com/fanatelevision ይወዳጁን

ዘወትር ከእኛ ጋር ስላሉ እናመሰግናለን

 

The post የምርት ገበያ ባለሥልጣን አሠራር ሊፈተሽ ይገባል – የክልል ርዕሳነ መስተዳድራን appeared first on Welcome to Fana Broadcasting Corporate S.C.

Source: Link to the Post

Leave a Reply