የራይድ አሽከርካሪዉን የገደሉት ጓደኛማቾች በእድሜ ልክ ፅኑ እስራት ተቀጡ

አርብ ነሐሴ 6 ቀን 2014 (አዲስ ማለዳ) ወንጀል የሚፈፅሙበትን ቦታ ቀድመው አይተው እና መርጠው ከጨረሱ በኋላ የትራንሰፖርት ተጠቃሚ መስለው ራይድ ደውለው በመጥራት ያመቻቹት ቦታ ሲደርሱ አሽከርካሪዉን በመግደል መኪናውን እና ስልኩን ይዘው የተሰወሩት ግለሰቦች በእድሜ ልክ ፅኑ እስራት ተቀጡ፡፡

እንደ ዐቃቤ ህግ መዝገብ 1ኛ ተከሳሽ የአብስራ ሰለሞን እና 2ኛ ተከሳሽ በላይነው ንጉስ ካልተያዘው ግብረ-አበራቸው ጋር በመሆን ነሐሴ 6 ቀን 2012 ከምሽቱ 2፡30 ሰዓት ራይድ ጠርተው አሽከርካሪውን በንፋስ ስልክ ክ/ከተማ ወረዳ 12 ክልል የሰዎች እንቅስቃሴ ወደማይበዛበት ገባ ያለ ቦታ ይጠሩታል።

ሆራ ትራዲንግ ተብሎ የሚጠራው ሥፍራ ሲደርሱም 2ኛ ተከሳሽ እና ያለተያዘው ግብረ-አበራቸው አሽከርካሪ ንጉስ ከፍያለውን አንገቱን አንቀው በመያዝ ወንበር ሥር ሲያስተኙት 1ኛ ተከሳሽም መኪውን እየነዳ ሟችን ወደኋላ በመዞር በተደጋጋሚ በጩቤ ሆዱ ላይ በርካታ ቦታ በመውጋት ህይወቱ እንዲያልፍ አድርገዋል።

በማስከተልም የሟችን ቪትስ መኪና፣ የሞባይል ስልክ እና ያደረገውን ጫማ አጠቃላይ ድምሩ 758 ሺሕ 250 ብር የሚያወጣ ንብረት ወስደው መሰወራቸውን ተከትሎ ፖሊስ ባደረገው ክትትል በቁጥጥር ሥር ውለው ምርመራ ሲደረግ ቆይቶ በፈፀሙት ከባድ ውንብድና ወንጀል በፍትሕ ሚኒስቴር ጠቅላይ ዐቃቤ ህግ ዘርፍ የልዩ ልዩ ወንጀል ጉዳዮች ዳይሬክቶሬት ዐቃቤ ህግ ክስ መስርቶባቸዋል፡፡

ተከሳሾች ክሱ ፍ/ቤት ቀርበው የእምነት ክህደት ቃላቸውን ሲጠየቁ ድርጊቱን አልፈፀምንም በማለት ክደው የተከራከሩ ሲሆን፤ ዐቃቤ ህግ የሰው እና የሰነድ ማስረጃዎች በማቅረብ አስረድተዋል፡፡

በፌዴራል ከፍተኛ ፍ/ቤት ልደታ ምድብ 1ኛ ግድያ እና ከባድ ውንብድና ችሎትም የዐቃቤ ህግ እና ተከሳሾችን ክርክር ሲከታተል ከቆየ በኋላ፤ ተከሳሾች በተከከሰሱበት አንቀፅ ስር ጥፋተኛ ናቸው በማለት እያንዳንዳቸው በእድሜ ልክ ፅኑ እስራት እንዲቀጡ ወስኖባቸዋል ሲል ፍትሕ ሚኒስቴር አስታውቋል፡፡

Source: Link to the Post

Leave a Reply