You are currently viewing የሰሜኑን ጦርነት በሰላም ለመፍታት ከተፈለገ፤ የህወሓት ኃይሎች ሶስት ቅድመ ሁኔታዎችን ሊያሟሉ ይገባል- ዲና ሙፍቲ

የሰሜኑን ጦርነት በሰላም ለመፍታት ከተፈለገ፤ የህወሓት ኃይሎች ሶስት ቅድመ ሁኔታዎችን ሊያሟሉ ይገባል- ዲና ሙፍቲ

በሃሚድ አወል

አንድ ዓመት ያስቆጠረውን የሰሜን ኢትዮጵያን ጦርነት በሰላም ለመፍታት ከተፈለገ፤ የህወሓት ኃይሎች ሶስት ቅድመ ሁኔታዎችን ሊያሟሉ እንደሚገባ የውጭ ጉዳይ ሚኒስቴር ቃል አቀባይ ዲና ሙፍቲ አስታወቁ። ቅድመ ሁኔታዎቹ፤ የህወሓት ኃይሎች ጥቃት እንዲያቆሙ፣ ከአማራ እና አፋር ክልሎች እንዲወጡ እንዲሁም የፌደራል መንግስቱን ህጋዊነት እንዲቀበሉ የሚጠይቁ ናቸው። 

ቅድመ ሁኔታዎቹን የውጭ ጉዳይ ሚኒስትር ዲኤታ አቶ ሬድዋን ሁሴን እና የፍትህ ሚኒስትሩ ዶ/ር ጌዲዮን ጢሞቲዮስ፤ ለውጭ ሀገር ዲፕሎማቶች ባለፈው ሳምንት ማሳወቃቸውን አቶ ዲና ተናግረዋል። ሁለቱ ከፍተኛ የመንግስት ባለስልጣናት ስለ ቅደመ ሁኔታዎቹ የተናገሩት፤ ተቀማጭነታቸውን አዲስ አበባ ላደረጉ ዲፕሎማቶች በአስቸኳይ ጊዜ አዋጁ ዙሪያ ማብራራያ በሰጡበት ወቅት ነው።   

ባለስልጣናቱ “በጁንታው የተፈጠሩ የሰላም እንቅፋቶች በሙሉ መነሳት እንዳለባቸው፤ ይሄ እስከሆነ ድረስ በኢትዮጵያ መንግስት በኩል ለሰላም ምንጊዜም ዝግጁነቱ እንዳለ” ለዲፕሎማቶቹ እንዳብራሩ አቶ ዲና ገልጸዋል። በኢትዮጵያ መንግስት በኩል ያለው የሰላም ዝግጁነት “ከአንዴም ሁለቴ በግልጽ ታይቷል” ያሉት ቃል አቃባዩ፤ ለዚህም የፌደራል መንግስት የተናጥል ተኩስ አድርጎ ከትግራይ የወጣበትን ሁነት ለማሳያነት ጠቅሰዋል። 

“ለሰላም እንቅፋት የሆኑ ነገሮች እስከተወገዱ ድረስ [መንግስት] ለሰላም ዝግጁ ነው” ሲሉም የፌደራል መንግስትን አቋም አስታውቀዋል። ቃል አቃባዩ በዛሬው መግለጫቸው ላይ የጠቀሷቸው ቅድመ ሁኔታዎች “ለድርድር የቀረቡ ናቸው ወይ?” በሚል ከጋዜጠኞች ለቀረበላቸው ጥያቄ፤ “ሊሆኑም ላይሆኑም ይችላሉ፤ ወደ ድርድር ስላልገባን” የሚል ምላሽ ሰጥተዋል። ድርድርን በተመለከተ “ተደራደሩ የሚሉ፤ እንድንደራደር የሚፈልጉ ሰዎች አሉ” ሲሉ ሁለቱን ተፈላሚ ወገኖች የማሸማገል ሙከራዎች መኖራቸውን ጠቁመዋል።

በሳምንታዊ መግለጫው ላይ ጥያቄ ከቀረበባቸው ጉዳዮች መካከል፤ በርከት ያሉ የተባበሩት መንግስታት ድርጅት ሰራተኞች ታስረዋል መባሉ ይገኝበታል። ዲና ለዚህ ጥያቄ በሰጡት ምላሽ “ሰራተኞቹ የታሰሩት፤ የኢትዮጵያን ህግ እና ከአስቸኳይ ጊዜ አዋጁ ጋር የተያያዙ ነገሮችን በመጣስ ነው” ብለዋል። ሰራተኞቹ ጥሰዋቸዋል ያሏቸውን ነገሮች ግን በዝርዝር ሳይጠቅሱ አልፈዋል። (ኢትዮጵያ ኢንሳይደር) 

The post የሰሜኑን ጦርነት በሰላም ለመፍታት ከተፈለገ፤ የህወሓት ኃይሎች ሶስት ቅድመ ሁኔታዎችን ሊያሟሉ ይገባል- ዲና ሙፍቲ appeared first on Ethiopia Insider.

Source: Link to the Post

Leave a Reply