የአማራ ክልል ፖሊስ ኮሚሽን ኮሚሽነር ሆነው እስከቅርብ ጊዜ ሲያገለግሉ በቆዩት በኮሚሽነር አበረ አዳሙ ሕልፈት የተሰማውን ሀዘን የገለፀው አብን ስለሕልፈታቸው የተጣራ መረጃ በሚመለከተው የመን…

የአማራ ክልል ፖሊስ ኮሚሽን ኮሚሽነር ሆነው እስከቅርብ ጊዜ ሲያገለግሉ በቆዩት በኮሚሽነር አበረ አዳሙ ሕልፈት የተሰማውን ሀዘን የገለፀው አብን ስለሕልፈታቸው የተጣራ መረጃ በሚመለከተው የመንግስት አካል እንዲሰጥ ጠየቀ። አማራ ሚዲያ ማዕከል/አሚማ ሚያዝያ 26 ቀን 2013 ዓ.ም አዲስ አበባ ሸዋ የአማራ ክልል ፖሊስ ኮሚሽን ኮሚሽነር ሆነው እስከቅርብ ጊዜ ሲያገለግሉ የቆዩት ኮሚሽነር አበረ አዳሙ በዛሬው ዕለት በድንገት ሕይወታቸው ማለፋን ሰምተናል ያለው የአማራ ብሔራዊ ንቅናቄ(አብን) በወንድማችን ኮሚሽነር አበረ አዳሙ ኅልፈት የተሰማውን ጥልቅና መሪር ኃዘን ይገልፃል ብሏል። የኮሚሽነሩን ሞት በተመለከተ በማኅበራዊ ድረገፆች እየተንሸራሸሩ የሚገኙ በርካታ ግምቶች ቢኖሩም የሞታቸው ምክንያት «ድንገተኛ» በሚል ከመገለፁ ባሻገር መንስዔው እስካሁን በትክክል አልታወቀም ሲልም አክሏል። ኮሚሽነር አበረ አዳሙ ከነበራቸው የሥራ ሥምሪትና ተያይዞ ከሚነሱት አወዛጋቢ የፖለቲካ ትንታኔዎች አኳያ አጠቃላይ የኢትዮጵያ ሕዝብ በተለይም የአማራ ሕዝብ ትክክለኛውን የኅልፈተ ሕይወታቸውን ምክንያት ማወቅ ይፈልጋል፣ የማወቅ መብትም አለው ያለው ንቅናቄው ስለሆነም የሚመለከተው የመንግስት አካል የኮሚሽነሩን ኅልፈት ትክክለኛ ምክንያት በአስቸኳይ ተጣርቶ ለሕዝብ ይፋ እንዲደረግ አሳስቧል። ትክክለኛ ምክንያቱ ተጣርቶ ይፋ እስኪደረግ ድረስ ሕዝባችን የተለያዩ ፍላጎቶች ባሏቸው አካላት ከሚሰነዘሩ የተሳሳቱና አፍራሽ ሐሳቦች በተለይም መረጃ ከማስተላለፍ፣ ከመዘገብ ወይም ከማቅረብ ያለፈ ዓላማ አንግበው የሚንቀሳቀሱ አካላት ከሚፈጥሯቸው አወዛጋቢ የሴራ ትንታኔዎች እንዲቆጠብና በጥንቃቄ እንዲመለከታቸው መልእክታችንን ማስተላለፍ እንወዳለን ብሏል። በመጨረሻም በአብን በኮሚሽነር አበረ አዳሙ ኅልፈተ ሕይወት የተሰማውን መሪር ኃዘን እየገለጸ ለኮሚሽነር አበረ አዳሙ ቤተሰቦች፣ ወዳጅ ዘመዶችና ለመላው የአማራ ሕዝብ መጽናናትን እንመኛለን ብሏል።

Source: Link to the Post

Leave a Reply