የአውራ አምባ ማህበረሰብ 50ኛ ዓመትን በማስመልከት “ዙምራ” የሚል መጽሐፍና ዘጋቢ ፊልም ተመረቀ

ዕረቡ ሰኔ 22 ቀን 2014 (አዲስ ማለዳ) የአውራ አምባ ማህበረሰብ 50ኛ ዓመትን በማስመልከት “ዙምራ” የሚል መጽሐፍና ዘጋቢ ፊልም በአዲስ አበባ ቴአትርና ባህል አዳራሽ በትላትናው ዕለት ተመርቋል።

መጽሐፉ የማህበረሰቡን የግማሽ ምዕተ ዓመት ጉዞ የሚያስቃኝ ሲሆን፤ በዶክተር ዘካርያ ዓምደብርሃን፣ በዶክተር ክንድዓለም ዳምጤና በጋዜጠኛ ጥበቡ በለጠ የተፃፈ ነው።

የዘጋቢ ፊልሙ ደግሞ፤ በአቶ አንዳርጋቸው ፅጌ አማካኝነት ተዘጋጅቶ ለእይታ በቅቷል።

የአውራ አምባ ማኅበረሰብ መሥራች የክብር ዶክተር ዙምራ ኑሩ በዚህ ወቅት “የአውራ አምባ ማህበረሰብ የወገንተኝነት ማስወገድ መርሕ ለኢትዮጵያም ጭምር የሚያገለግል መሆን አለበት” ሲሉ ተናግረዋል።

“የአውራ አምባ ማኅበረሰብ ለዓመታት ያለምንም መከፋፈል አንድ ሆኖ ኖሯል።” ያሉት ዶ/ር ዙምራ፤ ይህም ወገንተኝነትንና ከፋፋይ አስተሳሰብን በማስወገድ ኢትዮጵያን በትብብር መገንባት እንዳለብን ትምህርት የሚሰጥ ነው ብለዋል።

የአውራ አምባ ማህበረሰብ የሕጻናት መብትን መጠበቅ፣የጾታ እኩልነትን ማክበር፣ አቅመ ደካሞችና አረጋውያንን መርዳትና መጥፎ ከመናገርና ከመሥራት መቆጠብ የሚሉ መርሆች እንዳሉት ገልጸዋል።

የአዲስ አበባ ከተማ አስተዳደር ከንቲባ አዳነች አቤቤ በበኩላቸው፤ ከአውራ አምባ ማህበረሰብ በመማር ለሌሎች ሰዎች ሕይወት መቀየር ምን ያህል ምክንያት ሆነናል? ብለን ራሳችንን መጠየቅ እንዳለብን ያሳያል ብለዋል።

የአውራ አምባ ማህበረሰብ አኗኗር ለውጥ ከቤተሰብ፣ ከመንደርና ከአካባቢ መነሳት እንዲሁም ኹሉም የራሱን ድርሻ መወጣት እንዳለበት ትምህርት የሚሰጥ መሆኑን ገልጸዋል።

የተመረቀውም መጽሐፍ ለትውልዱ ማስተማሪያ እንዲሆን በሥርዓተ ትምህርት በማካተት ጭምር መስራት እንደሚያስፈልግ መናገራቸውን ኢዜአ ዘግቧል።

ጠቅላይ ሚኒስትር ዶ/ር ዐቢይ አህመድ በበኩላቸው የአውራ አምባ ማህበረሰብ 50ኛ ዓመት በማስመልከት በትላንትናው ዕለት በማህበራዊ ትስስር ገጻቸው ባሰፈሩት መልዕክት፣ የአውራ አምባ ማህበረሰብ የጾታ እኩልነት፣ የሕጻናትና የአካል ጉዳተኞች ማኅበራዊ ፍትሕ በተግባር ተፈትኖ ያየንበት ማኅበረሰብ ነው ብለዋል።

ሃምሳ ዓመት በእነዚህ ዕሴቶች ጸንቶ መኖር ድንቅ ብቻ ሳይሆን ተአምርም ነው ሲሉም ገልጸዋል።

በአዲስ አበባ ቴአትርና ባህል አዳራሽ ለምርቃት የበቃው የዙምራ መጽሐፍ 417 ገጾች ያሉትና በአስር ምዕራፎች የተከፈለ ሲሆን፤ ዘጋቢ ፊልሙ ደግሞ የአንድ ሰዓት ርዝማኔ ያለው ነው።

Source: Link to the Post

Leave a Reply