የአዲስ አበባና የኦሮሚያን አስተዳደራዊ ወሰንን በአዲስ መልክ የማካለል እንቅስቃሴ መጀመሩ ተገለጸ

ዕረቡ ነሐሴ 4 ቀን 2014 (አዲስ ማለዳ) ከዚህ ቀደም ለከረረ ፓለቲካዊ ውዝግብና ተቃውሞ ምክንያት የነበረው የአዲስ አበባና የኦሮሚያ ክልል አስተዳደራዊ ወሰን አዲስ በተዘጋጀ ጥናት መሰረት የማካለል እንቅስቃሴ መጀመሩን ከኹለቱም ወገኖች ካሉ ምንጮች ሰምቻለሁ ስትል ዋዜማ ራዲዮ ዘግባለች።

የወሰን ማካለሉ በኹሉም የአዲስ አበባ ዙሪያ ወረዳዎችና በኦሮሚያ ክልል ሥር ባሉ ልዩ ዞኖች መካከል የሚደረግ ሲሆን፤ እንደየአካባቢው ከአዲስ አበባ ወደ ኦሮሚያ አልያም ከኦሮሚያ ወደ አዲስ አበባ የሚካለሉ አካባቢዎች መለየታቸውም ተገልጿል።

ማክስኞ ዕለት ከአዲስ አበባ መስተዳድር ምንጮች እንደተሰማው ከሆነ፤ አጠቃላይ የከተማዋ አከላለል ዝርዝር ለገዥው ፓርቲ አባል ድርጅቶች፣ ለየክፍለ ከተማና ወረዳ ሀላፊዎች እንዲያውቁት ተድርጎ ወደ ተግባር እንዲገባ መመሪያ ተላልፏል።

በዚህም መሰረት ለገጣፎ፣ የካ አባዶ፣ ቦሌ ቡልቡላ፣ ጆሞ ኮንደሚኒየም ኹለት እስከ ረጲና ወይብላ ማርያም በአዲሱ አከላለል የወሰን ለውጥ የተደረገባቸው አካባቢዎች ናቸው። በሰሜን አዲስ አበባ (እንጦጦ) ከኬላ እስከ ወረዳ 01፣ 06፣ እና 07 ሽግሽግ ይደረጋልም ተብሏል።

የወረዳ እና የክፍለ ከተማ አመራሮችም የወሰን ማካለሉ የሚነካቸውን አካባቢ ነዋሪዎች እንዲያወያዩ መመሪያ ተሰጥቷቸዋል።

ኹለቱን አስተዳሮች በአዲስ ወሰን ለመለየት ተፈጥሯዊ እና ሰው ሰራሽ የሆኑ ምልክቶችን በመጠቀም ጥናት የሰራ አንድ ቡድን ከአዲስ አበባ ክፍለ ከተሞችና ወረዳዎች እንዲሁም ከአዲስ አበባ ጋር ከሚዋሰኑ የኦሮሚያ ክልል አስተዳደሮች ጋር ውይይት ማደረጉን መረዳቷንም ዋዜማ በዘገባዋ አመላክታለች።

ባለፈው ሳምንት መጨረሻ ቅዳሜ ከአዲስ አበባ የአቃቂ ቃሊቲ ክፍለ ከተማ፣ ንፋስ ስልክ ላፍቶ ክፍለ ከተማ እና የከተማ አስተዳደሩ አመራሮች፣ ከኦሮምያ ደግሞ የገላን ክፍለ ከተማ አመራሮች የተሳተፉበት ስብሰባ ተካሂዶ በጉዳዩ ላይ ውይይት መደረጉም ተሰምቷል።

በማካለሉ ጉዳይ ላይ በቀረበው ጥናት መሰረት ከአቃቂ ቃሊቲ ክፍለ ከተማ ወረዳ 13 በከፊል ወደ ኦሮምያ ይካለላል ተብሏል። ይህ ማለት የቱሉዲምቱ ኮንደሚኒየም በተለምዶ ፕሮጀክት 11 የሚባለው ሰፊ የጋራ መኖርያ ቤት ያለበት አካባቢ ወደ ኦሮምያ ይካለላል። ወረዳ 13ትም በዚህ አካባቢ ርክክብ ለማድረግ እየተዘጋጀ እንደሆነ የወረዳው አመራሮች ተናግረዋል።

በዚሁ ወረዳ አስፓልት ተሻግሮ ያሉት ማለትም የደቡብ አፍሪካ ዩኒቨርቲ እና በተለምዶ ፕሮጀክት 12 እየተባለ የሚጠራው የቱሉዲምቱ የጋራ መኖርያ ቤት አካል የሆነው ሥፍራ፤ እንዲሁም አለም ባንክ እየባለ የሚጠራው ሰፈር በአዲስ አበባ አስተዳደር ውስጥ እንዲቀጥሉ ተለይተዋል።

በአንድ ወቅት የውዝግብ መንስዔ የነበረው የኮዬ ፈጬ የጋራ መኖሪያ ያለበት ወረዳ 9 ሌላው ከአቃቂ ቃሊቲ ክፍለ ከተማ ወደ ኦሮምያ ክልል የሚካተት ሲሆን፤ የጋራ መኖርያው እና በዙርያው ያሉ አዳዲስ ሰፈራዎች በሙሉ ወደ ኦሮምያ ክልል እንዲገቡ በጥናቱ ምክረ ሀሳብ እንደቀረበባቸውም ተነግሯል።

በዚሁ ወረዳ ዘጠኝ ሄኒከን ቢራ እና አዲስ አበባ ሳይንስ እና ቴክኖሎጂ ዩኒቨርሲቲ አካባቢ እና በዚያው ሥፍራ ያሉ የቂሊንጦ የጋራ መኖርያ ቤቶች በአዲስ አበባ አስተዳደር ሥር ይቀጥላሉ ተብሏል።

እንዲሁም አቃቂ ቃሊቲ ክፍለ ከተማ የኮዬ ፈጬ ኮንደሚኒየምን ተከትሎ ያሉት ወረዳ 10 እና 11 እስከ ጎሮ መዳረሻ ድረስ ከአስፓልት በስተ ቀኝ ኦሮምያ ውስጥ እንዲካለሉ በስተግራ ደግሞ አዲስ አበባ አስተዳደር ሥር እንዲቆዩ መታሰቡም ተገልጿል።

የቴክኖሎጂ ዘርፍ አገልግሎትና ኢንቨስትመንት ማዕከል የሆነው አይ ሲቲ ፓርክ አዲስ አበባ ውስጥ ይቀጥላል።

በሌላ በኩል በአቃቂ ቃሊቲ ክፍለ ከተማ ወረዳ 4 ውስጥ የገላን ኮንደሚኒየም እና አካባቢው በአዲስ አበባ ከተማ አስተዳደር ውስጥ ሲቀጥል፤ አስፓልቱን ተሻግሮ በስተ ግራ ያሉ የአባ ሳሙኤል ማረምያ ቤት አካባቢዎች በኦሮምያ እንዲካለሉ ታስቧል።

የወሰን ማካለል ጥናቱ ውስጥ ከዚህ ቀደም በሥራ እና ክህሎት ሚኒስትር ሙፈርያት ካሚል መሪነት ጉዳዩን እንዲከታተል ተቋቁሞ የነበረው ቡድን ይሳተፍበት አይሳተፍበት የታወቀ ነገር የለም ተብሏል።

በሌላ በኩልም እንዲሁ የወሰን መካለሉ ሥራ የሚነካቸው አካባቢዎች በስድስተኛው አገራዊ ምርጫ የአዲስ አበባ ምክር ቤት ምርጫ የተከናወነባቸው እንደመሆኑ፤ ጉዳዩ የአዲስ አበባ ምክር ቤት በሂደቱ ላይ የህዝበ ውሳኔ ይኑር አይኑር እስካሁን የተገለፀ ነገር አለመኖሩም በዘገባው ተመላክቷል።

Source: Link to the Post

Leave a Reply