የደመራና የመስቀል በዓላት በሰላም እንዲከበሩ አስፈላጊውን ቅድመ ዝግጅት አጠናቆ ወደ ስራ መግባቱን የአዲስ አበባ ፖሊስ አስታወቀ፡፡ በመስቀል አደባባይ የሚካሄደውን ደመራ የመለኮስ ስነ-ስ…

የደመራና የመስቀል በዓላት በሰላም እንዲከበሩ አስፈላጊውን ቅድመ ዝግጅት አጠናቆ ወደ ስራ መግባቱን የአዲስ አበባ ፖሊስ አስታወቀ፡፡

በመስቀል አደባባይ የሚካሄደውን ደመራ የመለኮስ ስነ-ስርአት ተጀምሮ እስከሚጠናቀቅ አሽከርካሪዎች ሌሎች አማራጭ መንገዶችን እንዲጠቀሙ ተጠቁሟል፡፡

***
ሰኞ መስከረም 16 ቀን 2015 ዓ/ም በርካታ የእምነቱ ተከታዮች ፣ የመንግስት ባለስልጣናት እና ጥሪ የተደረገላቸው እንግዶች በሚገኙበት የመስቀል በዓልን ምክንያት በማድረግ ደመራ የማብራት ስነ-ስርዓት በመስቀል አደባባይ ይካሄዳል፡፡ የደመራ እና የመስቀል በዓላት እንደከዚህ ቀደሙ ሁሉ በሰላም እንዲከበሩ የአዲስ አበባ ፖሊስ ዝግጅቱን አጠናቆ ወደ ስራ መግባቱን አስታውቋል፡፡

የበዓሉ አከባበርን በተመለከተ ጉዳዩ በቅርበት ከሚመለከታቸው የቤተ-ክርስቲያኒቱ ኃላፊዎች ጋር በቅንጅት እየሰራ መሆኑን የአዲስ አበባ ፖሊስ አስታውቆ በበዓሉ አከባበር ዙሪያ በልዩ ልዩ መድረኮች ከነዋሪው ጋር ውይይት መደረጉን ገልጿል፡፡

ከዚህ ቀደም የተከበሩ ኃይማኖታዊና ብሄራዊ በዓላት በሰላም እንዲከበሩ ህብረተሰቡ ከፀጥታ ኃይሉ ጋር በመተባበር የድርሻውን መወጣቱ የሚታወቅ ሲሆን በከተማ ደረጃ የደመራ ስነ-ሰርዓት ወደ ሚከናወንበት መስቀል አደባባይ ሆነ ሌሎች ተመሳሳይ ስፍራዎች የጦር መሳሪያ ፣ ስለታም ነገሮችን እና ህገወጥ ቁሳቁሶችን ይዞ መምጣት የተከለከ እና ለጋራ ደህንነት ሲባል ፍተሻ እንደሚኖር ህብረተሰቡ ተገንዝቦ የተለመደ ትብብሩን እንዲያደርግ ፖሊስ ጥሪውን አስተላልፏል፡፡

በመስቀል አደባባይ የሚካሄደው የደመራ ፕሮግራምን መጠናቀቅ ተከትሎ በከተማችን በተለያዩ ደብሮች እና መንደሮች ጭምር ደመራ የማብራት ስነ-ስርዓት የሚካሄድ ሲሆን በየአካባቢው ደመራ ሲበራ ህብረተሰቡ ተገቢውን ጥንቃቄ ሊያደረግ እንደሚገባ እና በማንኛውም ሁኔታ ርችት መተኮስ ፍፁም ክልክል መሆኑን የአዲስ አበባ ፖሊስ አሳስቧል፡፡
በመስቀል አደባባይ የሚካሄደውን የደመራ የመለኮስ ስነ-ስርአት ተጀምሮ እስከሚጠናቀቅ ድረስ የትራፊክ መጨናነቅ እንዳይፈጠር፡
• ከመገናኛ ወደ መስቀል አደባባይ እንዲሁም ከኤድናሞል በአትላሳ ወደ ካዛንቺስ የሚወስደው መንገድ ኡራኤል አደባባይ
• ከጎተራ ወደ መስቀል አደባባይ የሚወስደው መንገድ አጎና ሲኒማ
• ከጎፋ በአዲሱ መንገድ ወደ ለገሃር ለሚመጡ ቂርቆስ ቤተ ክርስቲያን መስቀለኛ ላይ
• ከቡልጋሪያ በሜክሲኮ አደባባይ ወደ ለገሃር የሚሄዱ ጠማማ ፎቅ አካባቢ
• ከሳር ቤት ወደ ሜክሲኮ አደባባይ እንዲሁም ከጦር ኃይሎች በልደታ ከፍተኛ ፍርድ ቤት ወደ ለገሃር የሚወስደው ሚክሲኮ አደባባይ
• ከተከለ ሃይማኖት በጎማ ቁጠባ ወደ ለገሃር ሰንጋተራ 40/60 ኮንደሚኒዬም አካባቢ
• ከጌጃ ሰፈር ፣ በአምስተኛ ፖሊስ ጣቢያ የሚሄዱ አሽከርካሪዎች ጎማ ቁጠባ
• ከመርካቶ በተክለ ሃይማኖት ጥቁር አንበሳ ሆስፒታል ሜትሮሎጂ በር ላይ
• ከራስ ቴአትር በጎላ ሚካኤል ውስጥ ለውስጥ ጎላ ሚካኤል መስቀለኛ
• ከተክለ ሃይማኖት ጥቁር አንበሳ ኢሚግሬሽን ጥቁር አንበሳ ሼል
• ከፒያሳ በቸርችር ጎዳና ለገሃር ቴዎድሮስ አደባባይ
• በአሮጌው ቄራ ፍል ውሃ ንግድ ማተሚያ ቤት
• ከካዛቺስ ወደ ሂልተን ካዛንቺስ ቶታል
• ከአዋሬ በካዛንቺስ ወደ ፍል ውሃ የሚወስደው መንገድ የቀድሞ 6ኛ ፖሊስ መታጠፊያ ላይ
ከቀኑ 5 ሰዓት ጀምሮ ዝግጅቱ እስከሚጠናቀቅ ለተሽከርካሪዎች ዝግ እንሚደረግ ህብረተሰቡ አውቆ አማራጭ መንገዶችን እንዲጠቀም እና በተገለፁት መንገዶች ላይ ለአጭርም ሆን ለረጅም ሰዓት ተሽከርካሪ አቁሞ መሄድ ፍፁም ክልክል መሆኑን አስታውቋል

Source: Link to the Post

Leave a Reply