‹‹የግሉ ዘርፍ ጥምረት በኑሮ ውድነት ላይ›› የሚል መርሃግብር ይፋ ተደረገ

በአዲስ አበባ 25 በመቶ የሚሆኑ ዜጎች ከድህነት ወለል በታች ህይወትን ይገፋሉ ተብሏል

ሐሙስ ሐምሌ 14 ቀን 2014 (አዲስ ማለዳ) የአዲስ አበባ ንግድና ዘርፍ ማህበራት ምክር ቤት በዋነኛነት በአዲስ አበባ ከተማ ያሉ ረዳት ያጡትን ዜጎችንና ዝቅተኛ ደሞዝ ያላቸውን የኩባንያ ሰራተኞችን ታሳቢ አድርጎ የሚደግፍ ‹‹የግሉ ዘርፍ ጥምረት በኑሮ ውድነት ላይ›› የተሰኘ መርሃ ግብር ይፋ አድርጓል።

የዕለት ጉርሳቸውን መሸፈን ለማይችሉ ከ15 ሺህ እስከ 20 ሺህ ለሚደርሱ ዜጎች ለ2 ወራት ያልበሰሉ ምግቦችን ማከፋፈል አንዱ የፕሮጀክቱ አካል ሲሆን፣ ለዚህ የፕሮጀክት ክፍል 16 ሚሊዮን ብር የሚደርስ የበጀት ግምት እንደተቀመጠለት ዛሬ ሐምሌ 14 ቀን 2014 በሒልተን ሆቴል በተካሄደው የመርሃ ግብሩ ማስተዋወቂያና ቃል ኪዳን መግቢያ ዝግጅት ላይ የምክር ቤቱ ዋና ፀሐፊ ሽበሺ ቤተማርያም ለንግድ ምክር ቤቱ አባላት ገለፃ አድርገዋል፡፡

ሌላው የዚሁ ፕሮጀክት መርሃግብር አካል የበሰሉ ምግቦችን የምሳ አቅርቦት ሲሆን፣ በዚህም ከ16 ሺህ 800 እስከ 24 ሺህ ግለሰቦችን ምሳ ማብላትን ያካትታል፡፡ ለዚህም 1 ነጥብ 4 ሚሊዮን ብር የበጀት ግምት ተተምኗል፡፡

ሦስተኛው የፕሮጀክቱ አካል ዝቅተኛ ክፍያ ላላቸው የኩባንያ ሰራተኞች ቀለብ ማቅረብ ነው፡፡ በዚህም በ100 ድርጅቶች ውስጥ ያሉ 4 ሺህ አባወራዎች ድጋፍ ይደረግላቸዋል ተብሏል፡፡ ለሰራተኞቹ የሚመደበው ወጪም እንደሰራተኞቹ ብዛትና በሚከፈላቸው ደሞዝ መጠን ይወሰናል፡፡

ፕሮጀክቱ ከዚህ በተጨማሪም የንግድ ምክር ቤቱን አባላትና የኩባንያ ኃላፊዎችን በአረንጓዴ አሻራ የችግኝ ተከላ መርሃግብር ላይ ማሳተፍንም ይጨምራል፡፡
ጠቅላላ የፕሮጀክቱ ወጪ 20 ሚሊዮን ብር መሆኑም ተገልጿል፡፡

አዲስ አበባ 25 በመቶ የሚኖሩ ዜጎቿ ከድህነት ወለል በታች ህይወትን ይገፋሉ፡፡

በፕሮጀክቱ ማስተዋወቂያ መድረክ ላይ የተገኙት የከተማዋ ምክትል ከንቲባ ዣንጥራር አባይ፤ በአዲስ አበባ ትልቁ ክፍት ገበያ የሆነውና ከፍተኛ የፋይናንስ ዝውውር የሚካሄድበት መርካቶ የሚገኝበት አዲስ ከተማ ክፍለ ከተማን እንደአብነት በመጥቀስ፣ በሥፋራው ምግብና የመኖሪያ ቤት የሚቸግራቸው በርካታ ዜጎች እንዳሉ አንስተዋል፡፡

በከተማዋ ያሉ ችግረኞችን ለመርዳትም ባለሃብቶችን ጨምሮ ሁሉም ሊተባበር እንደሚገባ ያነሱት ምክትል ከንቲባው፣ የከተማ አስተዳደሩ በሚያከናውነው የትምህርት ቤት ምገባ መርሃ ግብር ውስጥ 600 ሺህ ተማሪዎችን እየመገበ መሆኑን መጥቀሳቸውን ኢትዮ የንግድና ኢንቨስትመንት መድረክ ዘግቧል፡፡

የአዲስ አበባ ንግድና ዘርፍ ማኅበራት ምክር ቤት ፕሬዝዳንት መሰንበት ሸንቁጤ በበኩላቸው፤ ምክር ቤታቸው በቅርብ ጊዜ ውስጥ ረዳት የሌላቸውን ዜጎች ለማገዝ 6 ነጥብ 2 ሚሊዮን ብር የሚገመት ድጋፍ ማድረጉን ተናግረዋል፡፡

Source: Link to the Post

Leave a Reply