“የፌደራል እና የኦሮሚያ ክልላዊ መንግስታት በክልሉ እየደረሱ ያሉ ማንነትን መሰረት ያደረጉ ጥቃቶችን በአቸኳይ ያስቁሙ!”፦ ኢሰመጉ

ዕረቡ ሰኔ 29 ቀን 2014 (አዲስ ማለዳ) የፌደራል እና የኦሮሚያ ክልላዊ መንግስታት በክልሉ እየደረሱ ያሉ ማንነትን መሰረት ያደረጉ ጥቃቶችን በአቸኳይ ያስቁሙ ሲል የኢትዮጵያ ሰብዓዊ መብቶች ጉባኤ (ኢሰመጉ) አሳሰበ።

ኢሰመጉ በኦሮሚያ ክልላዊ መንግስት ውስጥ የተፈጸሙ የሰብዓዊ መብቶች ጥሰቶችን አስመልክቶ መግለጫ አውጥቷል።

በመግለጫውም በኦሮሚያ ክልል በሚንቀሳቀሰው የሸኔ ታጣቂ ቡድን ከቅርብ ጊዜ ወዲህ ጥቃቶች እየደረሱ ይገኛሉ ብሏል፡፡

በእነዚህም አሰቃቂ ጥቃቶች በርካታ ቁጥር ያላቸው ንጹሀን ሰዎች ላይ ሞት፣ የአካል ጉዳት፣ ንብረት ውድመት እና ሌሎችም የሰብዓዊ መብቶች ጥሰቶች እየተፈጸሙ ይገኛሉ ያለው ኢሰመጉ፤ መንግስት መሰል ድርጊቶች እንዳይፈጸሙ ቀድሞ የመከላከል እና የዜጎችን ደህንነት እና ሰብዓዊ መብቶች የማስከበር ተቀዳሚ ሀላፊነት ያለበት ቢሆንም፤ ይህ ሳይሆን በመቅረቱ በኦሮሚያ ክልላዊ መንግስት ውስጥ በርካታ ቁጥር ያላቸው ንጹሀን ሰዎች ላይ አሰቃቂ ጥቃቶች እየደረሱ እንደሚገኙ ገልጿል፡፡

ሰኔ 27 ቀን 2014 በቄለም ወለጋ ለምለም ቀበሌ በሚገኙ መንደር 20 እና 21 ውስጥ በሸኔ ታጣቂ ቡድን በተፈጸመ ጥቃት በርካታ ሰዎች መሞታቸውን እና 72 ሰዎች በጅምላ እንደተቀበሩ፣ ይህ ጥቃት የብሔር ማንነትን መሰረት ያደረገና፤ ጥቃቱ በተፈጸመባቸው
አካባቢዎች ውስጥ ይኖሩ የነበሩት የአማራ ብሔር ተወላጆች እንደሆኑ፣ በደረሰው አሰቃቂ ጥቃት ከሞቱት ሰዎች መካከል በርካታውን ቁጥር የሚይዙት ሴቶች እና ህጻናት መሆናቸውን ኢሰመጉ ካሰባሰብኳቸው መረጃዎች ለመረዳት ችያለሁኝ ብሏል፡፡

በተጨማሪም የመንግስት የጸጥታ አካላት በአሁኑ ሰዓት በአካባቢው እንደሚገኙ እና ይህ ጥቃት የደረሰባቸው ሰዎች ብዙዎቹ ንጹሀን ገበሬዎች መሆናቸውን መረዳቱን ገልጿል።

ከዓለም አቀፍ፣ አህጉር አቀፍ እና አገር አቀፍ የሰብዓዊ መብቶች ድንጋጌዎች መንግስት የሰዎችን ሰብዓዊ መብቶች ማክበር፣ ማስከበር እና የማሟላት ሀላፊነት እንዳለበት ያስረዳሉ ያለው ኢሰመጉ፤ ይህ ሳይሆን ሲቀር እና በመንግስት ቸልተኝነት የዜጎች ሰብዓዊ መብቶች ሳይከበሩ ሲቀሩ ዋነኛ ተጠያቂ ሊሆን የሚገባው መንግስት መሆኑን ገልጿል፡፡

በዚህም መሰረት፤ ኢሰመጉ ሰኔ 27 ቀን 2014 በቄለም ወለጋ ለምለም ቀበሌ በሚገኙ መንደሮች ውስጥ የተፈጸመውን ማንነትን መሰረት ያደረገ ጥቃት እያወገዘ፦

● የፌደራል እና የኦሮሚያ ክልላዊ መንግስታት በኦሮሚያ ክልል የሚኖሩ ሰዎችን ሰብዓዊ መብቶች የማስከበር ሀላፊነት ስላለባቸው በሸኔ ታጣቂዎች በተደጋጋሚ እየደረሱ ላሉ ጥቃቶች ቀዳሚ ተጠያቂ እንደሆኑ በመረዳት በአስቸኳይ ትኩረት ሰጥቶ በመስራት እነዚህን በኦሮሚያ ክልል በአማራ ብሔር ተወላጆች ላይ እየተፈጸሙ ያሉ የብሔር ማንነትን መሰረት ያደረጉ አሰቃቂ ጥቃቶችን እንዲያስቆሙ፣

● ሰኔ 11 ቀን 2014 ጊምቢ ወረዳ ቶሌ ቀበሌ እና በቤንሻንጉል ጉሙዝ ክልል ሚዥንጋ ወረዳ ሴነ ቀበሌ ውስጥ እና ሰኔ 27 ቀን 2014 በቄለም ወለጋ ለምለም ቀበሌ በሚገኙ መንደሮች ውስጥ የብሔር ማንነትን መሰረት ያደረገ አሰቃቂ ጥቃት የፈጸሙ አካላት ላይ ገለልተኛ የሆነ ምርመራን በማከናወን ለህግ እንዲያቀርብ፣

● መንግስት በተደጋጋሚ በአካባው የሚደርሱ የሰበዓዊ መብቶች ጥሰቶችን በመቆጣጠር የአካባቢውን ሰላም እንዲያረጋግጥ እና በአካባቢው በቂ የጸጥታ አካላትን በማሰማራት መሰል ጥቃቶች ዳግም እንዳይፈጸሙ እንዲከላከል፣

● የሀይማኖት አባቶች፣ የፖለቲካ ፓርቲዎች፣ የማህበረሰብ አንቂዎች፣ ጋዜጠኞች፣ ሲቪል ማህበራት እና ሰብዓዊነት የሚሰማው በሙሉ በተደጋጋሚ እየደረሱ ላሉ አሰቃቂ ጥቃቶች የፌደራል እና የኦሮሚያ ክልላዊ መንግስት ትኩረት ሰጥተው በመስራት የዜጎችን ሰብዓዊ መብቶች የማስከበር ሀላፊነታቸውን እንዲወጡ በመወትወት የበኩላቸውን እንዲወጡ ኢሰመጉ ጥሪውን አቅርቧል።

Source: Link to the Post

Leave a Reply