የፍቅር ጥያቄ ያልተቀለችውን የዩኒቨርሲቲ ተማሪ በስለት ወግቶ የገደለው ተማሪ በእስራት ተቀጣ። አማራ ሚዲያ ማዕከል/አሚማ ግንቦት 19 ቀን 2014 ዓ.ም አዲስ አበባ ሸዋ በ…

የፍቅር ጥያቄ ያልተቀለችውን የዩኒቨርሲቲ ተማሪ በስለት ወግቶ የገደለው ተማሪ በእስራት ተቀጣ። አማራ ሚዲያ ማዕከል/አሚማ ግንቦት 19 ቀን 2014 ዓ.ም አዲስ አበባ ሸዋ በአርባምንጭ ዩኒቨርሲቲ ጫሞ ካምፓስ ጥር 23/ 2014 ዓ.ም ምሽት 4 ሰዓት ከ50 የሁለተኛ አመት የሆቴል ማኔጅመንት ተማሪ የሆነችውን ጽገሬዳ ግርማይን ደጋግሞ በስለት በመውጋት የገደላት ተከሳሽ ድርጊቱን በማመን እጁን ለፖሊስ መስጠቱን የዐቃቤ ህግ ማስረጃዎች ያመለክታሉ። የጋሞ ዞን ፖሊስ ተከሳሽን በቁጥጥር ስር በማዋል ከዩኒቨርስቲው ተማሪዎችና የጥበቃ ሠራተኞች እንዲሁም ከሐኪም ያገኛቸውን ማስረጃዎችን አጣርቶ ለዐቃቤ ሕግ አቅርቧል። ሟች የቀረበላትን የፍቅር ጥያቄ ባለመቀበሏ ተከሳሽ በእልህ ስለት በመያዝ ጓደኞቿን ይቅርታ እጠይቃታለሁ፤ አገናኙኝ በማለት አስጠርቶ ዘጠኝ ቦታ የወጋት ሲሆን ሟች ባሠማችው የጩኽት ድምጽ የዩኒቨርስቲው ጥበቃ ሰራተኞችና ተማሪዎች ደርሰው ወደ አርባምንጭ አጠቃላይ ሆስፒታል ቢወስዷትም ምሽት 5:00 ህይወቷ ማለፉን የዐቃቤ ህግ መዝገብ ያስረዳል። በወንጀል መዝገብ ቁጥር 43452 ከሳሽ ዐቃቤ ህግ በቁጥር 223/2014 ዓ.ም በተፃፈ የክስ ማመልከቻ ተከሳሽ የወንጀል ህግ ቁጥር 539/1/ሀ ስር የተመለከተውን በመተላለፍ በከባድ ሰው የመግደል ወንጀል ክስ ተመስርቶበታል። ከዐቃቤ ህግ የቀረቡለትን የሰው፣የህክምና እና የሠነድ ማስረጀሠዎች በጥልቀት የተመለከተው የጋሞ ዞን ከፍተኛ ፍርድ ቤት የወንጀል ችሎት የተሻሻለው የወንጀል ቅጣት አወሳሰን መመርያ ቁጥር 2/2006 መነሻ በማድረግ ግንቦት 19/ 2014 ዓ.ም ባስቻለው የወንጀል ችሎት ተከሳሽ ብሩክ በላይነህ ጥፋተኛ ሆኖ በመገኘቱ በ17 ዓመት ፅኑ እስራት እንዲቀጣ ወስኗል። የወንጀል አፈፃፀም ሁኔታው በደረጃ 1 እርከን 38 የሚሸፈን መሆኑ በችሎቱ የተገለጸ ቢሆንም ከተከሳሽ የቀረቡ አራት የክስ ማቅለያዎችን በመውሰድ ከ15 ዓመት እስከ 18 የሚያስቀጣው እርከን 34 መሠረት ውሳኔ መተላለፉን ከከፍተኛ ፍርድ ቤቱ የተገኘ መረጃ አመላክቷል። ዘገባው የጋሞ መንግስት ኮሚዩኒኬሽን ነው።

Source: Link to the Post

Leave a Reply