#ዳሌ ምንድነዉ?በአከርካሪያችን እና በሁለት እግሮቻችን መሃከል ያለ ፤የታችኛዉ የወገባችንን ክፍል ከእግራችን ጋር የሚያገጣጥም እና የመራቢያ አካላት፣ ማህጸን የሽንት ፊኛን የሚሸከም አካል ነ…

#ዳሌ ምንድነዉ?
በአከርካሪያችን እና በሁለት እግሮቻችን መሃከል ያለ ፤የታችኛዉ የወገባችንን ክፍል ከእግራችን ጋር የሚያገጣጥም እና የመራቢያ አካላት፣ ማህጸን የሽንት ፊኛን የሚሸከም አካል ነዉ፡፡

ዳሌ ላይ ከሚያጋጥሙ ጉዳቶች መካከል የዳሌ ዉልቃት /ስብራት አንዱ ነዉ፡፡

ጣቢያችን ኢትዮ ኤፍኤም 107.8 ስለ ዳሌ ዉልቃት በጥቁር አንበሳ ሆስፒታል የመገጣጠሚያዎች እና ቀዶ ህክምና ሰብ ስፔሻሊስት ከሆኑት ከዶክተር ገለታዉ ተሰማ ጋር ቆይታ አድርጓል፡፡

#የዳሌ ዉልቃት/ስብራት እንዴት ይከሰታል?

• በተለያዩ አደጋዎች ይከሰታል፡፡ ከባድ ነገር እላያችን ላይ ሲወድቅ ይከሰታል፡፡

• በተለይ ደግሞ ቤት የሚያፈርሱ ሰዎች ለዚህ የበለጠ ተጋላጭ ናቸዉ፡፡

• የመኪና አደጋ ደግሞ ሌላዉ ምክንያት ነዉ፡፡

• የኮንስትራክሽን ስራዎች ላይ ጥንቃቄ አለመኖር፡፡

• ወደ ክፍለአገር ሲወጣ ደግሞ ከዛፍ ላይ መዉደቅ፤ ወደ ገደል መዉደቅ እንደ ምክንያት ሊሆን ይችላል፡፡

• የዳሌ ዉልቃት ሲያጋጥም ታዲያ ከሆዳችን ወደ እግራችን የሚወርዱ የተወሳሰቡ የደም ስሮች በመኖራቸዉ እና በዚህም የመድማት ሁኔታ ስለሚከሰት ብዙዎቹ በቦታዉ ህይወታቸዉ የማለፍ ዕድሉ ከፍ ያለ ነዉ፡፡

• ሆዳችን ዉስጥ ሳምባ፣ጉበት ፣ ኩላሊት ፣ጣፊያ፣ አንጀታችን ላይ ጉዳት፣ የሽንት ፊኛም ሊቀደድ ይችላል፡፡

• በዚህ ሰዓት ደም በከፍተኛ ሁኔታ ስለሚፈስ በፍጥነት ወደ ጤና ተቋም መሄድ ያስፈልጋል፡፡

• የዳሌዉን አቃፊ በጨርቅ መያዝ አለመቻል በሰዉነታችን ዉስጥ ያለዉ ደም ፈሶ እንዲያልቅ ማድረግ ነዉ በዚህም ህይወት የማለፍ ዕድሉ ከፍተኛ መሆኑን ነዉ ባለሙያዉ የገለጹት፡፡

• የሚያጋጥመን አደጋ የሚያስከትለዉ ዉልቃት ብቻ ሊሆን ይችላል አልያም ስብራት ሊሆን ይችላል አንዳንዴ ደግሞ ሁለቱም ሊሆኑ ይችላል፡፡

#ምልክቶቹ ምንድናቸዉ?
• የማያቆም ከፍተኛ ህመም ይኖራል፡፡

• እግራቸዉ ወይም ዳሌያቸዉ አከባቢ የቅርጽ ለዉጥ ይኖራል፡፡

• እግራቸዉ ሊዞር ይችላል፡፡ የዳሌያቸዉ አቃፊም ቦታዉን ሊቀይር ይችላል፡፡

• መድማት ከዉጪ ልናይ እንችላለን፡፡ መድማት ላይኖርም ይችላል፡፡

• ከወገብ በታች ስሜት አለመሰማት/ፓራላይዝድ/ መሆን እና

• ከፍተኛ ደም ስለሚፈሳቸዉ ደግሞ እራስን መሳት እና እራስ አለማወቅ ሊኖር ይችላል፡፡

#የዳሌ ዉልቃት በምን ይስተካከላል?
• የመጀመሪያዉ ወደ ጤና ተቋም መሄድ መሆኑን ባለሙያዉ ይናገራሉ፡፡

ዳሌዉ ብዙ ጊዜ በአደጋ ምክንያት ስለሚከፈት ባገኘነዉ ጨርቅ በወገባችን ዙሪያ የላይኛዉ የእግራችን ክፍል ድረስ ማሰር አስፈላጊ ጉዳይ ነዉ፡፡

• ይህንን ማድረጋችን ደግሞ ደም በቀላሉ እንዳይደማ እና የደማዉንም እንዲረጋ ያደርገዋል፡፡

• ቀጥሎ ደግሞ የራጅ እና የሲቲ ስካን ምርመራዎች ይደረጋሉ፡፡

• ዉልቃት ከሆነ በቀላሉ ስቦ ማስገባት ይቻላል፡፡

• ዉልቃት እና ስብራት ከሆነ ግን ስብራቱ መያያዝ መቻል አለበት፡፡

• ዳሌ አከባቢም ከሆነ ብረት በማስገባት ከአከርካሪ ጋር ማገናኘት ይቻላል፡፡

• አብዛኞቹ የዳሌ ዉልቃቶች የሚታከሙ ናቸዉ የሚሉት ዶክተር ገለታዉ፤በቶሎ ወደ ጤና ተቋም ስለማይመጡ ግን ህይወታቸዉ የሚያልፍ ሰዎች ቁጥር ብዙ ነዉ ብለዋል፡፡

• ይህን ማድረግ ካልተቻለ ደግሞ የደም መርጋት ስለሚያጋጥም እና የረጋዉ ደም ደግሞ ወደ ሳምባችን ስለሚሄድ በአጭር ጊዜ ዉስጥ ህይወት ያልፋል፡፡

#ህክምናዉ ምን ያህል ጊዜ ይፈጃል?
• የዳሌ ስብራት ወሰብሰብ ያለ ህክምና የሚያስፈልገዉ መሆኑን ዶክተር ገለታዉ ይናገራሉ፡፡

• ብዙዎቹ እስከ ሶስት ወራት ድረስ በተጎዳዉ በኩል መርገጥ ላይችሉ ይችላሉ፡፡ በተለይ በሁለቱም እግራቸዉ ላይ ተከስቶ ከሆነ ደግሞ በዊልቼር ላይ ሊሆኑ ግድ ይላቸዋል፡፡

• አንዳንድ ሰዎች ደግሞ አደጋዉ እንደደረሰ ወዲያዉ መራመድ የሚጀምሩ ሊሆኑ ይችላሉ፡፡ ቀላል ዉልቃት ከሆነ እና ስብራት ከሌለዉ በነጋታዉ መራመድ የሚችሉ ሰዎች አሉ፡፡

• እንደ ጉዳቱ መጠን የመንቀሳቀሻ ግዜያቸዉም ረጅም እና አጭር ሊሆን ይችላል፡፡

• በጣም ጥቂት ሰዎች ግን ከዛ በላይ ጊዜ ሊወስድባቸዉ ይችላል፡፡ የዳሌ ስብራቱ ሲያጋጥም በጣም ከፍተኛ ሃይል ባለዉ አደጋ ስለሆነ ስብራቱ ከአንድ እና ሁለት በላይ ስለሚሆን ያንን ለመጠገን ጊዜ ይወስዳል፡፡

• የተለመደዉ ግን ከሶስት ወር እና ከዛ በላይ ነዉ፡፡

• ህክምናዉን ያገኙ ሰዎች ከሶስት ወር ጀምሮ መንቀሳቀስ ይጀምራሉ ሲሉ ባለሙያዉ ነግረዉናል፡፡

ሰኔ 21 ቀን 2016 ዓ.ም

Source: Link to the Post

Leave a Reply