ዳዊት ታደሰ | ዘመነ-ተረት

ከሰሞነኛው የጎንደር ክስተት እንጀምር። በውግዘት ብቻ የማይታለፈው አሳፋሪው ድርጊት ተፈጸመና እንደተለመደው አገር በድጋሚ ማቅ ለበሰች። በጉዳዩ ዙሪያ ማብራሪያ መስጠት የሚገባቸው የፌዴራል መንግሥት ባለሥልጣናት በረዥም ዝምታ ተዋጡ። የጸጥታ ኃይሎችም እንደስማቸው ጸጥ

እንዳሉ ነበር። ጠቅላይ ሚንስትሩ በፌስቡክ ገጻቸው በድንገት ብቅ ብለው፣ ለፍቼ ጨምበላላ በዓል የእንኳን አደረሳችሁ መልዕክታቸውን በሲዳምኛ ቋንቋ አስተላለፉ። በሙስሊም ወንድሞቻችን ላይ የተፈጸመው ጥቃት ከተሰማ ከ48 ሰዓታት በኋላ ደግሞ፣ አንድ አጠር ያለች መጣጥፍ በዚሁ ገጻቸው አስፍረዋል። ስለጎንደሩ ጉዳይ የጻፉት እንደሆነ በመገመት በርካቶች ሲወያዩበት ነበር። ምናልባት፣ “አጥፊውን አውግዘን ከተጠቂው ጋር እንቆማለን እንጂ፣ ጥፋቱን በሌላ ጥፋት ለማባባስ መሞከር የለብንም፣” የምትለው ሐረግ ካልሆነች በቀር፤ ድርጊቱን የሚኮንን ወይም የሟች ቤተሰቦችን የሚያጽናና

ወይንም በአጥፊዎች ላይ ሕጋዊ እርምጃ ለመውሰድ መዘጋጀታቸውን የሚገልጽ ምንም ፍንጭ አልሰጡም።

የተረት አባት

 የግብፁ አልሲሲ ለአገሬው ቃል መግባት አይታክተውም። ከሦስት ዐመት በፊት “እንመካከር” በሚል መሪ ቃል ወጣቶች በአገራቸው ጉዳይ የሚወያዩበት መድረክ እንዲዘጋጅ ላይ ታች ሲል ነበር። ‹የምሩን ነው› ብለው ያሰቡት የምስር ልጆች፣ ሥራቸውን ሲጀምሩ ግን የጠበቃቸው እስር ሆነ። የገማል አብደልናስር ታሪክም እንደዚሁ ነው። በአማላይ ዲስኩሩ የወቅቱን ትውልድ አስክሮት ነበር። አጠቃላይ የአገዛዝ ዘመኑ ሲገመገም ግን ከሠራው ይልቅ፣ የካደው ሚዛን ይደፋል። ኦሪታዊ አገራት በዚህ ይመሳሰላሉ። የተረት ክምችታቸው በርከት ስለሚል ነው መሰል፣ የተረት አባቶች አያጡም።

እኛም ጋር የሆነው ይኸው ነው።

እርሳቸው፣ የኢትዮጵያ ጠቅላይ ሚንስትር ሆነው ወደሥልጣን እንደወጡ ቃል የገቡልን ታላቅ አገር እንደሚመሰርቱ ነበር። የወላለቀ ሥርዐት ተረክበው

የተዋጣለት ግዛት በአይናችን ሊያሳዩን እንደሚችሉ አሳመኑን። አሁን ባለው ሁኔታ፣ እንኳን የተዋጣለት ግዛት፣ የወላለቀው ሥርዐትም ቅንጦት ሆኖብናል። ‹የኢትዮጵያን ችግር ይፈታሉ› የተባሉት ሰው ራሳቸው ችግር ሆኑ። እንደ መሲህ ቢመሰሉም፣ መሠረታዊ የአገር ማስተዳደር ዘይቤ ባለማወቃቸው አገራችንን ለጎበዝ አለቆች መጫወቻነት አሳልፈው ሰጡ። ለብሔር ፖለቲካ ጽዩፍ መስለው ቢቀርቡም፣ ቁጥሮች የሚናገሩት ግን በተቃራኒው ነው። ከእርሳቸው በፊት የነበሩት የተሻለ ውጤት አስመዝግበዋል። “ACLED” የተባለ በታጣቂዎች የሚደርስ ጉዳትን የሚያሰባስብ

ዓለም ዐቀፍ ተቋም፣ በቤንሻንጉል ጉሙዝ ክልል እርሳቸው ወደሥልጣን ከመጡ ወዲህ ባሉት ሦስት ዐመታት ከአመፅ ጋር የተያያዙ ግጭቶች 947 በመቶ እንደጨመሩ በጥናቱ ጠቁሟል። ደቡብ ክልል ደግሞ 176 በመቶ ጭማሪ አሳይቷል። አገራዊ አማካይ የግጭት መጠን 33 በመቶ አድጓል። የሰሜኑ ጦርነት ሲመጣ የቦታ ለውጥ መጣና፣ ትግራይ 1,670 በመቶ እመርታ በማሳየት በቤንሻንጉል ጉሙዝ ተይዞ የነበረውን ክብረ-ወሰን አሻሻለች።

ዛሬም ግን፣ ከዚህ መተላለቅ በኋላ የምትመጣው የበለፀገች ኢትዮጵያን በጉጉት እንድንጠብቅ እየወተወቱን ነው። ሰማይ ቤት ለመድረስ ከስጋ ውጭ

ምንም የማይቀምስ በራሪ ፈረስ ይዞ መንገድ የጀመረውን የዋህ የሚያስታውስ ያስታውሰዋል። በጉዞው መሃል ለፈረሱ የጫነው ስጋ ያልቅበትና ከራሱ ሰውነት ላይ እየቦጨቀ በመመገብ በረራውን ይቀጥላል። ሲታይ ቅርብ የመሰለው የሰማይ ቤት መንገድ በረዘመ ቁጥር የሰውየው መጨረሻ ምን ሊሆን እንደሚችል አንባቢ መገመት አይከብደውም። ብልፅግና ላይ እስክንደርስ፣ የእኛም እጣ ፈንታ እንደ ህልመኛው የሰማይ በራሪ እንዲሆን ተፈርዶብናል። እያለቅን እንበለጽጋለን፤ እየበለጸግን እናልቃለን።

Continue reading

 

 

The post ዳዊት ታደሰ | ዘመነ-ተረት appeared first on ፍትሕ መፅሔት.

Source: Link to the Post

Leave a Reply