ጠቅላይ ሚኒስትር አብይ በስድስት ዓመት ውስጥ ለአራተኛ ጊዜ የመከላከያ ሚኒስትር ሹመት ሰጡ 

ጠቅላይ ሚኒስትር አብይ አህመድ ስልጣን ከያዙ ወዲህ ለአራተኛ ጊዜ የመከላከያ ሚኒስትራቸውን ቀየሩ። ጠቅላይ ሚኒስትሩ ዛሬ ሰኞ በሰጡት ሹመት፤ ከመስከረም 2013 ጀምሮ በመከላከያ ሚኒስትርነት ሲያገለግሉ የቆዩት ዶ/ር አብርሃም በላይ ከኃላፊነታቸው ተነስተው በአይሻ መሐመድ ተተክተዋል።

የትግራይ ክልል ጊዜያዊ አስተዳደር ዋና ስራ አስፈጻሚ የነበሩት አብርሃም፤ በመከላከያ ሚኒስትርነት የተሾሙት በ6ኛው አጠቃላይ ሀገራዊ ምርጫ ያሸነፈው የጠቅላይ ሚኒስትር አብይ አህመድ ብልጽግና ፓርቲ መንግስት ሲመሰርት ነበር። አብርሃም የመከላከያ ሚኒስትር ከመሆናቸው በፊት የኢኖቬሽን እና ቴክኖሎጂ ሚኒስትር ሆነው ሰርተዋል።

አብርሃም የመከላከያ ሚኒስትር ሆነው የተሾሙት አሁን የጠቅላይ ሚኒስትር አብይ የደህንነት አማካሪ ሆነው በመስራት ላይ የሚገኙትን ዶ/ር ቀንዓ ያደታን ተክተው ነበር። በዛሬው ሹም ሽር አብርሃምን የተኩት የመስኖ እና ቆላማ አካባቢ ሚንስትሯ አይሻ መሐመድ ለኃላፊነቱ እንግዳ አይደሉም።

አይሻ ከጥቅምት እስከ ሚያዝያ 2011 ዓ.ም. ድረስ የመጀመሪያዋ የኢትዮጵያ ሴት የመከላከያ ሚኒስትር ሆነው ሰርተዋል። ጠቅላይ ሚኒስትር አብይ ስልጣን በያዙ በጥቂት ወራት ልዩነት ካቢኔያቸውን ሲያዋቅሩ ሹመት ከተሰጣቸው 20 ሴቶች አንዷ የሆኑት አይሻ፤ የመከላከያ ሚኒስትርነትን የተረከቡት በቦታው ለ10 ዓመታት ካገለገሉት አቶ ሲራጅ ፈጌሳ ነበር።

በመከላከያ ሚኒስትርነት አንድ ዓመት ለማይሞላ ጊዜ የሰሩት አይሻ በሚያዝያ 2011 ዓ.ም. በአቶ ለማ መገርሳ ተተክተው የከተማ ልማት እና የኮንስትራክሽን ሚኒስትር ሆነዋል። የአፋሯ ተወላጅ አይሻ ከዚህ ቀደም የባህል እና ቱሪዝም ሚኒስትርም ነበሩ።

አይሻ ወደ መከላከያ ሚኒስቴር የሚያዛውራቸው ሹመት እስከተሰማበት እስከ ዛሬው ዕለት ድረስ የመስኖ እና ቆላማ አካባቢ ሚኒስትር ሆነው ሲሰሩ ቆይተዋል። ጠቅላይ ሚኒስትር አብይ ባለፈው ሳምንት የጎንደር ከተማ የውሃ እና መንገድ ፕሮጀክቶች አፈጻጸምን በጽህፈት ቤታቸው በገመገሙበት ወቅት ሪፖርት ካቀረቡ የመንግስት የስራ ኃላፊዎች መካከል አንዷ አይሻ ነበሩ። 

አይሻ በሚመሩት በመስኖ እና ቆላማ አካባቢ ሚኒስቴር ተቆጣጣሪነት ስራውን እየተከናወነ ያለው የመገጭ መስኖ ግድብ ስራ ክፉኛ መጓተት፤ በጠቅላይ ሚኒስትሩ አለመወደዱ በባለፈው ሳምንት ግምገማ ወቅት ተስተውሏል። አብይ ግንባታው ከተጀመረ 11 ዓመት ያስቆጠረው የመገጭ መስኖ ግድብን የያዘው ኩባንያ ኮንትራክት በአንድ ሳምንት ውስጥ እንዲቋረጥ በወቅቱ አዝዘው ነበር። 

ይህንንም ተከታትለው እንዲያስፈጽሙ ጠቅላይ ሚኒስትሩ አይሻን በስም በመጥራት የስራ መመሪያ ማስተላለፋቸው አይዘነጋም። (ኢትዮጵያ ኢንሳይደር)

Source: Link to the Post

Leave a Reply