11ኛው የዶሮ ኤክስፖና 7ኛው የእንስሳት ሃብት አውደ ርዕይ እና ጉባኤ ተከፈተ

ሐሙስ ጥቅምት 17 ቀን 2015 (አዲስ ማለዳ) 11ኛው የዶሮ ኤክስፖና 7ኛው የእንስሳት ሃብት አውደ ርዕይ እና ጉባኤ በዛሬው ዕለት በአዲስ አበባ ስካይላይት ሆቴል በይፋ ተከፍቷል፡፡

አውደ ርዕይ እና ጉባኤውን በኢትዮጵያ የተለያዩ የንግድ ትርኢቶችን በማዘጋጀት የሚታወቀው ፕራና ኤቨንትና መቀመጫውን ሱዳን ያደረገው “ኤክስፖ ቲም“ ከግብርና ሚኒስቴር ጋር በመተባበር አዘጋጅተውታል፡፡

የኢትዮጵያ ግብርና ባለስልጣን ም/ዋና ዳይሬክተር ወንዳለ ወንድሙ በአውደ-ርዕዩ መክፈቻ ላይ ባደረጉት ንግግር፤ አገራችን በእንስሳት ሀብት ከአፍሪካ ቀዳሚውን ስፍራ የያዘች እንደመሆንዋ፤ አውደ ርዕይ እና ጉባኤው ይህንን ሀብት በተደራጀና ዘመኑ በሚጠይቀው ቴክኖሎጂ በመታገዝ የእንስሳት ተዋጽኦ በአግባቡ ለማቀነባበር እንዲሁም የእንስሳት መኖ፣ የእንስሳት ጤና ላይ ትኩረት ሰጥቶ ለመስራት ጥሩ ልምድ የሚገኝበት እንደሚሆን ገልጸዋል፡፡በመድረኩም ኢትዮጵያ በግብርናው መስክ ከእንስሳት እና ከእንስሳት ተዋጽኦ ምርቶች ከፍተኛ ጥቅም ማግኘት በምትችልበት ወቅት ላይ መሆኗ ተመላክቷል።

በእንስሳት መኖ፣ እንስሳት ጤና፣ ዶሮ፣ ስጋ እንዲሁም የወተት እሴት ሰንሰለት ላይ የተሰማሩ ከ10 አገራት የተውጣጡና ከ70 በላይ የሚሆኑ አለም አቀፍ ኩባንያዎች፣ አገር በቀል ድርጅቶች እንዲሁም ተጽኖ ፈጣሪ ባለድርሻ አካላት በአውደ ርዕዩ ላይ ተሳታፊ መሆናቸው ተነግሯል።እነዚህ ተሳታፊዎችም ከጠቅላላው የእሴት አንሰለት ውስጥ ሰፊውን የሚወክሉ መሆናቸው የተገለጸ ሲሆን፤ ከመላው ኢትዮጵያና ከጎረቤት አገራት ከሚመጡ ከ4 ሺሕ በላይ የዘርፉ የንግድ ባለድርሻ አካላትና ባለሙያዎች ጋር የንግድ ግንኙነት ለመፍጠር መዘጋጀታቸውም ተገልጿል።ይኸው ዓለም አቀፍ የዶሮ እርባታ እና የእንስሳት ሃብት አውደ ርዕይ እና ጉባኤ የዘርፉን መሪዎችና ቁልፍ የአገር ውስጥ ባለድርሻ አካላትን በማሳተፍ ለተከታታይ ሦስት ቀናት እንደሚቆይ ተነግሯል።

The post 11ኛው የዶሮ ኤክስፖና 7ኛው የእንስሳት ሃብት አውደ ርዕይ እና ጉባኤ ተከፈተ first appeared on Addis Maleda.

Source: Link to the Post

Leave a Reply